ЙЎЛ-ПАТРУЛЬ ХИЗМАТИ ХОДИМЛАРИ ТРАНСПОРТ ҲОДИСАЛАРИНИНГ ОЛДИНИ ОЛИШ МАҚСАДИДАГИ РЕЙД ТАДБИРЛАРИНИ ЎТКАЗИШДИ

Йўлларда ҳайдовчилар томонидан йўл ҳаракати қоидалари ва ҳаракат хавфсизлиги асосларини бузиш ҳолатларини аниқлаш мақсадида мунтазам равишда рейд тадбирлари ташкил этилиб борилади. Бундай тадбирлар йўллардаги ҳаракатларни тартибга солиш, шунингдек, турли хавфли ҳодисаларнинг олдини олишда муҳим аҳамият касб этади.

Амударё туманида ҳам Ички ишлар бўлимининг йўл-патруль хизмати бўлинмаси ходимлари томонидан рейд тадбирлари ўтказилиб, қоидабузарликлар ва турли кўринишдаги транспорт ҳодисаларининг олдини олишга доир тегишли чора-тадбирлар амалга оширилиб борилмоқда.

Туман ҳудудидаги транспорт йўлларида кўнгилсиз ҳодисаларнинг олдини олиш, ҳаракат хавфсизлигини таъминлаш мақсадида ўтказилган навбатдаги рейд тадбирида ҳам 15 нафар йўл-патруль хизмати ходимлари қатнашишди. Ушбу ходимлар томонидан турли кўринишдаги қоидабузарлик ҳолатлари аниқланди ва тегишли тартибда баённомалар расмийлаштирилди.

Тадбир давомида йўл ҳаракати хавфсизлиги қоидаларини бузгани учун маъмурий жазога тортилган ва қарздорлик муддати 60 кундан ўтган ҳамда ҳужжатлари носоз бўлган 123 нафар ҳайдовчилар аниқланди. Уларга бу ҳолат бўйича баённомалар расмийлаштириб, автотранспорт воситалари тегишли тартибга кўра вақтинчалик жарима майдончасига қўйилди.

Маълумки, 2019 йилда қабул қилинган Ўзбекистон Республикаси Қонунига кўра Маъмурий жавобгарлик тўғрисидаги Кодекснинг йўл ҳаракати қоидабузарликлари тўғрисидаги айрим моддаларига тузатишлар киритилган эди. Кодекснинг 126-моддаси бўйича биринчи бор қоидабузарлик содир этилганда жарималар энг кам иш ҳақининг 25 бараваригача ва маъмурий жазо чораси қўлланилганидан кейин бир йил давомида такрор содир этилганда жарималар энг кам иш ҳақининг 40 бараваригача оширилди. Шунингдек, автомобилнинг қорайтирилган ойнаси техник регламентга мувофиқ бўлмаганда ёхуд ҳайдовчида махсус рухсатнома мавжуд бўлмаганда жарималар қўлланилади.

Светофорнинг таъқиқловчи сигналида ёки йўл ҳаракатини тартибга солувчининг таъқиқловчи ишорасида тўхташ чизиғини босиб кирганлик ва «қизил»да ўтганлик учун алоҳида жавобгарлик белгиланди. Ушбу қоидаларга кўра светофорнинг ёки тартибга солувчининг таъқиқловчи ишорасида тўхтаганда транспорт воситасининг энг олдинги нуқтаси тўхташ чизиғи устига чиқиб кетмаслиги керак. Агар қоидабузарлик содир этилса, бунга ҳам тегишли миқдорида жарима солинади.

Ўз навбатида йўл ҳаракати қоидаларини бузганлик учун жарималарни тўлаш муддати узайтирилди. Энди у фото ва видео қайд этиш техника воситалари орқали қайд этилган ёки қайд этилмаганидан қатъий назар, қарор чиқарилган кундан эътиборан 60 кундан кечиктирилмай, унинг устидан шикоят берилган ҳолларда эса – шикоят қаноатлантирилмай қолдирилганлиги тўғрисида хабар берилган кундан эътиборан 30 кундан кечиктирмай жаримани тўлаш керак. Илгари ушбу муддатлар фақат камера объективлари остига тушган жарималар бўйича қўлланилар эди, қолган ҳолларда эса қоидабузар 15 кунда уни тўлаши талаб этиларди.

Рейд тадбири давомида йўл-патруль хизмати ходимлари томонидан қоидабузарларга ушбу тартиб тўғрисида тўлиқ тушунчалар берилиб, тегишли ҳужжатлар расмийлаштирилди. Шу билан бирга йўл ҳаракати қоидаларига мунтазам равишда амал қилиниш кераклиги, бу билан турли кўнгилсиз ҳодисаларнинг олдини олиш мумкинлиги батафсил тушунтирилди.

М.Мирзамуродов, туман ИИБ ЖХКБ бошлиғи, майор.