4-босқич “Аёллар дафтари” нинг ҳужжатларини тўғри шакллантириш бўйича йиғилиш бўлиб ўтди

14 февраль куни туман ҳокимлигининг мажлислар залида Амударё туманида 4-босқич “Аёллар дафтари” ҳужжатларини шакллантириш масалаларига бағишланган йиғилиш бўлиб ўтди.

Йиғилишда туман ҳокими Султонбой Йўлдашев, Ўзбекистон Касаба уюшмалари Федерацияси раиси ўринбосари Қобилжон Қирғизалиев, Ўзбекистон Касаба уюшмалари Федерациясининг Қорақолпоғистон Кенгаши раиси Улуғбек Жалменов, секторлар раҳбарлари, туман ҳокимининг ўринбосарлари, халқ депутатлари туман Кенгаши депутатлари, тижорат банклари раҳбарлари, тегишли ташкилот ва муассаса масъуллари, фуқаролар йиғинлари раислари, хотин-қизлар фаоллари ҳамда оммавий ахборот воситалари вакиллари иштирок этишди.

Йиғилишни туман ҳокими Султонбой Йўлдашев очди ва олиб борди.

Туман ҳокими дастлаб йиғилганларни кун тартибидаги масала билан таништириб ўтди ҳамда туманда “Аёллар дафтари”га киритилган ижтимоий ҳимояга муҳтож аёлларни ҳар томонлама қўллаб-қувватлаш бўйича амалга оширилаётган ишлар ҳақида кенг тушунчалар берди.

Шундан сўнг, Ўзбекистон Касаба уюшмалари Федерацияси раиси ўринбосари Қобилжон Қирғизалиев “Аёллар дафтари” рўйхатини шакллантиришни белгиланган меъзонлар асосида ташкил этиш зарурлигини таъкидлади.

Амалдаги тартибга мувофиқ “Аёллар дафтари” га 30 ёшдан ошган, ижтимоий ҳимояга муҳтож ишсиз, тадбиркорлик қилиш истагида бўлган ва боқувчиси бўлмаган, ижтимоий ёрдамга муҳтож I ва II гуруҳ ногиронлиги бўлган эҳтиёжманд хотин-қизлар, шунингдек, уй-жойга муҳтож, қарамоғида ногиронлиги бўлган фарзанди мавжуд эҳтиёжманд хотин-қизлар киритилиши лозим.

Йиғилишда Ўзбекистон Касаба уюшмалари Федерациясининг Қорақалпоғистон Республикаси Кенгаши раиси Улуғбек Жалменов хотин-қизларнинг муаммолари, эҳтиёжлари ва қизиқишлари секторлар ишчи гуруҳлари, фуқаролар йиғинлари ходимлари, хотин-қизлар фаоллари барча йўналишдаги муаммоларни уйма-уй юриш орқали ўрганиб чиқиши лозимлигини таъкидлади.

Шунингдек, Оила ва хотин-қизлар бўлими, секторлар раҳбарлари ҳамда маҳалла ва нуронийларни қўллаб-қувватлаш бўлими билан биргаликда муаммоларнинг ҳаққонийлиги ўрганилиши, ўрганиш жараёни ниҳоясида “Аёллар дафтари”га киритилиши лозим бўлган хотин-қизлар рўйхати Халқ депутатлари туман Кенгашига тақдим этилиши зарурлиги айтиб ўтилди.

Ундан ташқари йиғилишда хотин-қизларга бериладиган турли имтиёзлар хусусида ҳам сўз юритилди. Жумладан, тадбиркорликни йўлга қўйиш учун хотин-қизларга 33 млн сўмгача 14 фоизлик кредитлар ажратилади. Бунда оилавий тадбиркорлик йўналиши бўйича 3 ойдан 6 ойгача имтиёзли давр билан 3 йил муддатга, чорвачилик, балиқчилик, паррандачилик учун 1 йилгача имтиёзли давр билан 3 йил муддатга ҳамда боғдорчилик, узумчилик ва лимончилик учун 3 йилгача имтиёзли давр билан 7 йил муддатга кредитлар ажратилади.

Йиғилишда аёллар бандлигини таъминлаш асосий вазифалардан бири эканлиги таъкидланди. Айтиб ўтилганидек, аёлларнинг ҳаммаси ҳам тикувчилик, пазандачилик каби касбларни эгаллай олмайди. Қишлоқ хўжалиги соҳасида яратиб берилаётган имкониятлар асосида ўз томорқасида иссиқхона қуриб, полиз маҳсулотларини етиштираёган аёллар ҳам юқори даромад манбаига эга бўлиши мумкин.

Йиғилишда “Аёллар дафтари”ни юритишга оид бошқа масалалар ҳам кўриб чиқилди ва муҳокама қилинди.

Туман ҳокимлигининг Ахборот хизмати.