ФИДОЙИ ХОТИН-ҚИЗЛАР ФАОЛИ

Ўзбекистон Республикаси Президентининг 2022 йил 1 мартдаги “Оила ва хотин-қизлар билан ишлаш, маҳалла ва нуронийларни қўллаб-қувватлаш тизимини такомиллаштириш чора-тадбирлари тўғрисида”ги Фармонига мувофиқ овул ва маҳаллаларда хотин-қизлар фаоли лавозими жорий этилиб, ҳудудларда хотин-қизлар ҳаётига оид муаммоларни жойига чиққан ҳолда тизимли ҳал қилиш имконияти яратилди.

Амударё туманининг Чойкўл овул фуқаролар йиғинида ушбу лавозимда Сайлихон Муратбоева фаолият олиб боради. Сайлихон ўз фаолиятини хонадонма-хонадон юриб, ҳудуд хотин-қизларининг турмуш тарзи, турли ёш тоифасидаги аёлларни қийнаб келаётган муаммоларни ўрганишдан бошлади.

Чойкўл овулида 1091 та хонадон таркибидаги 1122 та оилада 6945 нафар аҳоли истиқомат қилади. Шундан 3473 нафари аёл-қизлар бўлиб, 30 ёшдан ошган аёллар 1551 нафарни ташкил этади.

Хотин-қизлар ҳаётига оид ижтимоий муаммоларни ўрганиш жараёнида Сайлихон аввало 10 ёшгача ва 100 ёшдан ошган кекса онахонлар рўйхатини шакллантириб, турли байрам саналари муносабати билан айнан ана шу тоифадаги нуронийлар ҳолидан хабар олиш, уларнинг кайфиятини кўтариш мақсадида “Аёл – ҳамиша эъзозда” мусиқий тадбири, шунингдек, “Кексалар – хонадонларимиз фаришталари”, “Қари билганни пари билмас” мавзуларида ҳудуддаги мактаблар ўқувчилари иштирокида давра суҳбатлари ўтказишни йўлга қўйди.

Ижтимоий ҳимояга муҳтож оилалар рўйхатини шакллантириш мақсадида ўтказилган сўровнома натижаларига кўра, 107 нафар аёл-қизлар “Аёллар дафтари” рўйхатига киритилди. 6 та йўналиш бўйича мазкур дафтар рўйхатига киритилган аёлларнинг муаммоларини ўрганишда ҳоким ёрдамчиси ва ОФЙ раиси билан ҳамкорликда режа ишлаб чиқилиб, ушбу режага мувофиқ 1-тоифа дафтардаги 68 нафар аёл-қизнинг иш билан бандлиги таъминланди. Уларнинг айримлари ижарага ер олиб, деҳқончилик билан шуғулланмоқда, 6 нафари Аму Брикет МЧЖга мавсумий ишга, 1 нафари туман кўп тармоқли поликлиникасига ҳамшира сифатида, 8 нафар аёл-қиз жамоатчилик ишларига жойлаштирилди. 13 нафар аёл-қизлар эса тикувчилик, ошпазлик, ҳунармандчилик йўналишлари бўйича касб-ҳунарга ўқитилди. 2 нафар аёл субсидия асосида иссиқхона хўжалигини юритишни йўлга қўйди ва бир нафар аёлга тикув машинаси олиб берилди.

Иккинчи тоифадаги рўйхатга олинган 10 нафар аёл-қизларнинг ҳам муаммолари хотин-қизлар фаолининг хонадонма-хонадон кириб бориб, муаммоларни ўрганиши натижасида ижобий ҳал этилди. Уларнинг тикувчилик йўналишида ўз тадбиркорликларини бошлашлари учун ҳар бирига 3 млн. сўмлик имтиёзли кредит маблағлари олишларида амалий ёрдам кўрсатилди. 1 нафар аёлга эса мотокултиватор олишда кўмаклашилди.

Шунингдек, ҳудуддаги 39 нафар боқувчисини йўқотган аёл-қизлар Сайлихон Муратбоеванинг доимий назоратида. Уларга турли ҳомийлик ёрдамлари ҳамда туман ҳокимлигининг ташаббуси билан кундалик озиқ-овқат маҳсулотлари билан таъминланишига эътибор қаратилмоқда.

Ногиронлиги бўлган аёл-қизларга тиббий ёрдам кўрсатиш, ижтимоий ҳимояга, меҳр-оқибатга муҳтож аёллар ҳаётини яхшилашга қаратилган чора-тадбирлар туфайли Моҳимжон Тўрабоевага туман ҳокимлиги томонидан бўш турган бинонинг бир хонаси ажратиб берилиб, фарзанди МТТга бепул жойлаштирилди. 2 нафар ижтимоий ҳимояга муҳтож аёл Хива ва Урганч шаҳарларига саёҳатга юборилди. Қарамоғида ногирон фарзанди бўлган 16 нафар аёл-қизлар ҳолидан тез-тез хабар олиниб, ҳомийлик ёрдамлари кўрсатиб келинмоқда.

Овул ҳудудида истиқомат қилувчи ҳомиладор ва чақалоғи бор аёллар ва уларнинг фарзандлари саломатлиги 1-сонли оилавий поликлиника шифокорлари томонидан доимий назоратга олингани боис, оналар ва болалар ўртасида мавсумий касалликларга чалиниш ҳолатлари кескин камайиб бормоқда.

Эҳтиёжманд оилалар ва уларнинг фарзандлари ҳолатини ўрганиш жараёнида Вазирлар Маҳкамасининг тегишли Қарори асосида 10 нафар аёл-қизларга ОТМларда ўқиши учун тавсияномалар берилди. Шунингдек, 5 йиллик меҳнат стажига эга лекин ўз фаолияти соҳаси бўйича олий маълумотга эга бўлмаган 3 нафар аёл-қизларнинг давлат ОТМларида ўқиб, олий маълумот олишлари учун шароит яратилиб, туман Оила ва хотин-қизлар бўлими томонидан тавсияномалар олишларида амалий ёрдам кўрсатилди.

Хотин-қизлар фаолининг ҳоким ёрдамчиси ва ёшлар етакчиси билан ҳамкорлиги туфайли эҳтиёжманд оилалар фарзандларидан 8 нафарининг ўқиш учун тўлов-шартнома маблағи, сафарбарлик чақирув резервидаги 6 нафар ёшнинг тўлов бадали, 3 нафар ёшнинг ҳайдовчилик гувоҳномаси олиш мақсадидаги ўқиши учун тўлов бадаллари тўлаб берилди.

Сайлихон Муратбоеванинг ҳар бир иш куни халқ орасида, халқ билан мулоқотларда ўтади. Ҳудуддаги мактабларда, “Ос”, “Чоқча”, “Шайх қалъа”, “Чорвадор”, “Қорақипчоқ”, “Шоғол овул” каби маҳаллаларда тез-тез бўлиб, пир-у бадавлат отахон ва онахонлар иштирокида “Оила - муқаддас даргоҳ”, “Маънавият – оиладан бошланади”, “Миллий қадриятлар ва урф-одатлар бувижонлар талқинида”, “Сариштали уй – фариштали уй”, “Аёл – ҳамиша эъзозда” мавзуларида давра суҳбатлари, уч авлод вакилларининг учрашувларини ташкил этади. Бу тадбирларнинг ҳар бирига камида 100-120 нафар аёл-қизлар қамраб олиниб, овул онахонлари ёшлар билан миллий-маънавий қадриятларнинг ёшлар ҳаётидаги аҳамияти хусусида дилдан суҳбат қилишади.

Чойкўл маданият маркази ходимлари, ёшлар етакчиси билан Сайлихон Муратбоеванинг ҳамкорлиги эса овул ёшларининг маънавиятини юксалтириш, уларнинг бўш вақтларини мазмунли ўтказишларида муҳим омил бўлмоқда. Хусусан, ҳамкорликдаги “Намунали қайнона”, “Намунали келин” кўрик-танловлари, “Аёл – ҳамиша эъзозда” “Янги Ўзбекистонда эл азиз, инсон азиз” мавзуларидаги адабий-мусиқий тадбирлардан овул аҳли, айниқса ёшлар олам-олам завқ оладилар. Кекса авлод вакиллари эса ўзларига кўрсатилаётган ҳурмат ва эътибордан, эҳтиромдан мамнун.

Хотин-қизлар фаоли Сайлихон Муратбоева эса ҳар бир иш кунини аввалдан белгиланган режаларига мувофиқ деярли ҳар кунини хонадонма-хонадон кириб, аёл-қизларнинг ҳаётига оид муаммоларини жойида ўрганиш, имкони бўлса, тез ва ижобий ҳал этиш мақсадида халқ орасида ўтказади. Халқ орасида кечадиган иш кунлари Сайлихон учун ҳақиқий меҳнат онларини бахш этади. Бу меҳнат онларида элим, юртим, деган фидойи аёлнинг овулдошларига нисбатан меҳри, муҳаббати мужассам. Зеро, халқим, деб халқига интилганларни халқи ҳам эъзозлайди. Сайлихон ана шундай фидойи хотин-қизлар фаоли.

Робия ЙЎЛДОШЕВА.