Туман ҳокимлиги биносига қуёш панеллари ўрнатилди

Бутун жаҳонда тикланадиган энергия манбаларига қизиқиш кундан-кунга ошиб бормоқда. Буларга биринчи навбатда қуёш, шамол ва биоенергия манбаларини киритишимиз мумкин.

Сўнгги йилларда нефт, газ, кўмирга нисбатан тикланадиган энергия манбаларининг рақобатдошлиги сезиларли даражада ўсди.

Шу мақсадда яқин истиқболга мўлжалланган дастурлар доирасида иқтисодиёт тармоқлари, аҳоли ва ижтимоий соҳа объектларида қайта тикланувчи энергия манбаларидан кенг фойдаланиш устувор вазифалардан қилиб белгиланди.

Амударё туманида айни вазифалар ижроси доирасида туман ҳокимлиги биносига 15 кВт дан иборат қуёш панели ўрнатилди.

Ўрнатилган 42 та қуёш панели 360W ни ташкил қилиб 1 соатда 15 кВт электр энергиясини етказиб беради.

Булутли кунларда эса қуёш панелининг иш самарадорлиги бир мунча пасайиб 70-80 фоиз электр энергиясини узатади. Ва натижада қуёшли кунларда 1 соат ичида 15 кВтни етказиб берган қуёш панели булутли об-ҳаво сабаб 11-12 кВАэлектр энергиясини етказиб беради.

Ҳеч кимга сир эмас, ҳозирги кунда жойларда аҳолини кундалик эҳтиёжлари учун берилаётган электр таъминотидаги узилишлар ўз навбатида аҳолининг турмуш шароитига салбий таъсир кўрсатади.

Ундан ташқари, кам таъминланган, ижтимоий ҳимояга муҳтож фуқаролар коммунал тўловларни ўз вақтида амалга оширолмаслиги ҳам айни ҳақиқат.

Ушбу ҳолатлар инобатга олинган ҳолда туман маҳаллий бюджети маблағлари ҳисобидан туманнинг турли овул ва маҳаллаларида истиқомат қилувчи ижтимоий ҳимояга муҳтож 12 нафар фуқарога субсидия асосида қўёш панеллари қуриб берилди.

Вақти келиб қачондир табиий ресурсларнинг барчаси тугайди.

 Биз учун табиат инъоми бўлган қуёш− текин энергия манбаидир. Қуёшдан энергия ишлаб чиқарувчи қуёш панели аҳоли учун катта ижобий янгилик бўлди.

Туман ҳокимлигининг Ахборот хизмати.