ҲАРБИЙ ҚИСМДА ОЧИҚ ЭШИКЛАР КУНИ ЎТКАЗИЛДИ

Ўзбекистон Республикаси Қуролли Кучлари ташкил этилганининг 31 йиллиги муносабати билан “Миллий армиямиз – Янги Ўзбекистоннинг мустаҳкам Қалқонидир” шиори остида “Ватан – муқаддас, уни ҳимоя қилиш шарафли бурч!” мавзусида Амударё туманидаги Давлат хавфсизлик хизмати чегара қўшинларига қарашли ҳарбий қисмда 1-, 16-, 30-, 36-, 38-, 55-, 56-сонли мактаблар ўқувчи-ёшлари ҳамда “Ватан таянчи” отряди аъзолари билан биргаликда “Очиқ эшиклар куни” тадбири ташкил этилди.

9 январь куни бўлиб ўтган тадбирда Давлат хавфсизлик хизмати чегара қўшинларига қарашли 9202-Д ҳарбий қисм командирининг тарбиявий ва мафкуравий ишлар бўйича ўринбосари, кичик сержант Шерзод Атаев, Мудофаа ишлари туман бўлими бошлиғининг тарбиявий ва мафкуравий ишлар бўйича ўринбосари Зокир Саъдуллаев, Мудофаа вазирлиги фахрийлари ва мактабларнинг Чақириққа қадар бошланғич тайёргарлик бўйича раҳбарлари қатнашдилар.

Тадбирда ҳарбийлар томонидан ўқувчиларга мамлакатимизда ҳарбий соҳада амалга оширилаётган ислоҳотлар ҳақида кенг маълумот ва тушунчалар берилди. Шунингдек, ҳарбий касб масъулияти, машаққати ҳамда Ватан ҳимояси муқаддас бурч эканлиги кенг тушунтирилди.

Тадбир давомида ҳарбий хизматчи Шерзод Атаев сўнгги йилларда Ўзбекистон Республикаси Президенти ­– Қуролли Кучлар Олий Бош қўмондони Шавкат Мирзиёев раҳнамолигида ҳарбий соҳада кенг кўламли ислоҳотлар амалга оширилаётгани, бугун ҳарбийларнинг мардона хизматлари туфайли юртимиз тинч, осмонимиз мусаффо, давлатимиз чегаралари дахлсиз, болалар, мўътабар оналар, кексалар хотиржам умргузаронлик қилаётганини алоҳида эътироф этди. Шу билан бирга, ҳарбий хизматчилар томонидан ҳарбий соҳада эришилаётган ютуқлар, давлатимиз томонидан қилинаётган ғамхўрлик ҳамда аскарларга берилган имкониятлар тўғрисида батафсил маълумотлар берди. Ундан ташқари, замонавий ҳарбий хизматчи қандай бўлиши кераклигини, билим ва кўникмаларга эга ёшлар ҳарбийликка танлаб олинишини ҳам тушунтирди.

Ёшлар ҳарбий қисмда аскарларнинг яшаш шароити, ҳарбий тайёргарлик борасида ўқув машғулотлари жараёнлари билан ҳам яқиндан танишишди. Ҳарбий қисм аскарларининг ҳарбий-техника ва жанговар қуроллардан фойдаланиш борасидаги кўргазмаларини томоша қилдилар. Мудофаа тизимидаги куч-воситалар, ҳарбий техникалар, замонавий қурол-аслаҳаларни ўз қўллари билан ушлаб кўриб, тактик-техник хусусиятлари билан яқиндан танишган, қурол-аслаҳа билан ишлашда дастлабки кўникмаларни шакллантириш имконига эга бўлган ёшлар келгусида Ватан тинчлиги ва унинг чегаралари дахлсизлигини таъминлаш ҳар бир мард йигитнинг бурчи эканлигини қалбан ҳис этдилар.

Тадбир давомида ўқувчи-ёшлар ҳарбийлик касбини эгаллаш, ҳарбий хизмат бурчини ўташ кабиларга доир ўзларини қизиқтирган саволлар билан мурожаат этиб, тўлиқ жавоблар олдилар. Ушбу тадбир ёшларимизнинг чегара қўшинлари, Миллий армиямиз ва унинг куч-қудратига бўлган ишончини янада мустаҳкамлади.

Озода Худойберганова.