ИСТИҚБОЛЛИ РЕЖАЛАР БЕЛГИЛАНДИ

2022 йилнинг 20 декабрь куни ҳаммамиз Ўзбекистон Республикаси Президенти Ш.М.Мирзиёевнинг парламентга Мурожаатномасини тингладик. Президентимиз ўз Мурожаатларида давлат ва жамиятимизни ривожлантиришнинг асосий йўналишлари, келгусида ҳар бир соҳада бажариладиган ишларнинг кўлами ва уларни амалга ошириш йўлларини кўрсатиб ўтдилар. Мен ҳам депутат ва Халқ таълими тизими вакиласи сифатида Мурожаатни тинглар эканман, сўнгги йилларда таълим тизимида қилинган ишларни кўз олдимга келтирдим.

Янги 2023 йил “Инсонга эътибор ва сифатли таълим йили”  деб эълон қилинди. “Биз Ўзбекистонда олиб бораётган давлат сиёсатининг марказида инсон ва унинг манфаатларини таъминлашни устувор вазифа қилиб белгиладик” – деди Президент.

Таъкидланганидек, ўқувчиларнинг чет тилларини мукаммал даражада ўрганишлари, компьютер саводхонлигига эришишлари ҳам келажакда уларнинг жамиятда ўз ўринларини топишларига ёрдам беради. Бугун кўпчилик ёшлар дастурлаш тизимларини пухта эгаллаб, моддий манфаат кўраётганлигини биламиз. Келаётган йилда Хоразм ва Қорақалпоғистондаги бошланғич синф ўқувчилари каби Ўзбекистондаги барча бошланғич синф ўқувчилари учун бепул тушлик берилиши режалаштирилаётгани, бунинг учун давлат бюджетидан 2,3 триллион сўм ажратилиши кўзда тутилгани давлатимизнинг ёш авлоднинг соғлом ва баркамол улғайишига замин ҳозирлаётганининг исботидир.

Мурожаатни тинглар эканман, жамиятда бўлаётган ҳар бир ўзгаришни, давлатимиз бераётган имтиёзларни аҳолига етказишда халқ вакиллари бўлган депутатларга масъулият юкланаётгани, депутатлик назоратини жиддий олиб бориш зарурлигини англадим. Негаки, давлатимиз томонидан ажратилаётган маблағларнинг мақсадли сарфланишини назорат қилиш, уларнинг талон-тарож қилинишига йўл қўймаслик ҳар биримизнинг бурчимиздир.

Мана, Янги йил эшик қоқмоқда. Халқимизнинг келаётган йилдан умидлари катта. Президентимиз таъкидлаганларидек, аниқ мақсад йўлида бирлашсак, кўзлаган мақсадларимизга етишимизга шубҳа йўқ.

Санобар Хўжамуродова,

Жўқорғи Кенгес депутати, 40-сонли мактаб директори.