АМУДАРЁДА УЧ АВЛОД ВАКИЛЛАРИ УЧРАШИШДИ
Юртимизда кексаларни эъзозлаш, эртамиз эгаларини баркамол инсонлар қилиб вояга етказиш давлат сиёсатининг устувор йўналишларидан бири ҳисобланади. Шунга кўра ўтмиш, айни кун ва келажакни ўзида мужассам этган “Уч авлод учрашуви” каби маънавий-маърифий тадбирларни ташкил этиш эл-юртимиз ҳаётидаги гўзал анъаналардан бирига айланди. Амударё туманида ҳам барча овул ва маҳаллаларда ёши улуғ инсонлар, бугунги кунда жамият ҳаётида фаол бўлган фидойилар ва ёш авлод вакиллари иштирокида учрашувлар бўлиб ўтмоқда.
16 декабрь куни Президентимизнинг шу йил 19 январдаги “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги ҳамда 15 мартдаги “Нуронийларни ҳар томонлама қўллаб-қувватлаш, уларнинг турмуш даражасини оширишга доир қўшимча чора-тадбирлар тўғрисида”ги Қарорларига кўра “Уч авлод учрашуви” деб номланган катта маънавий-маърифий тадбир ўтказилди.
Тадбирда туман ҳокими Султонбой Йўлдашев, Қорақалпоғистон Республикаси Маҳалла ва нуронийларни қўллаб-қувватлаш вазири ўринбосари, Нуронийлар жамғармаси раиси Турсунбой Абдужабборов, секторлар раҳбарлари, туман ҳокими ўринбосарлари, идора-ташкилотлар раҳбарлари, Маҳалла ва нуронийларни қўллаб-қувватлаш бўлими ходимлари, 90 нафарга яқин нуронийлар, 80 нафардан ортиқ ўрта ёш авлод вакиллари ҳамда 70 нафардан ортиқ ёшлар иштирок этишди.
Тадбир Олмазор маҳалласи ҳудудида жойлашган туман тарихий-ўлкашунослик музейидан бошланди. Уч авлод вакиллари музейда юртимиз тарихига оид турли экспонатлар билан танишдилар. Меҳмонлар қадим ва яқин ўтмиш даврлар тарихидан ҳикоя қилувчи турли уй-рўзғор буюмлари, шу ерлик аҳолига хос бўлган миллий кийимлар ва бошқа экспонатларни томоша қилиб, аждодларимизнинг турмуш тарзи, ҳаёти ҳақидаги қизиқарли маълумотлар, ҳикояларни тингладилар. Шунингдек, шу юрт озодлиги учун курашган, ҳаётини, жонини фидо қилган мард ва жасур ота-боболаримизнинг хотираси, қаҳрамонликларини ёдга олдилар.
Туман Маданият маркази биносида “Янги Ўзбекистонда эл азиз, инсон азиз!” шиори остида давом этган тадбирда кексалар, ўрта ёш авлод вакиллари ва ёшлар туманимиз ҳунармандларининг қўл меҳнати намуналари, тадбиркорларнинг маҳсулотларидан ташкил этилган кўргазмани томоша қилдилар. Шундан сўнг, марказнинг концертлар залида маънавий-маърифий тадбир ўтказилди.
Тадбирда Қорақалпоғистон Республикаси Маҳалла ва нуронийларни қўллаб-қувватлаш вазири ўринбосари, Нуронийлар жамғармаси раиси Турсунбой Абдужабборов, туман ҳокими Султонбой Йўлдашев, туман Нуронийлар жамоатчилик Кенгаши раиси ўринбосари Бекман Алламберганов, Қорақалпоғистонда хизмат кўрсатган журналист, шоира Робия Йўлдошева, ёш ижодкор Барно Самандаровалар сўзга чиқиб, сўнгги йилларда халқимизнинг турмуш фаровонлигини янада яхшилаш йўлида амалга оширилаётган тизимли ислоҳотлар ва уларнинг аҳамиятига тўхталишди. Шунингдек, кексалик гаштини суриш баробарида эл-юрт равнақи йўлида меҳнат қилиб келаётган нуронийларга алоҳида миннатдорчилик билдирди ва ютуқларга эришиб келаётган фаол ёшларнинг келгуси ишларида зафарлар тилаб, ҳар бирини юрт келажагига муносиб инсонлар бўлиб вояга етишга даъват этишди.
Тадбирда иштирок этган нуронийлар ва ёшларга туман ҳокимлиги ҳамда Маҳалла ва нуронийларни қўллаб-қувватлаш бўлими томонидан эсдалик совғалари топширилди.
Шундан кейин Ўзбекистон кинематография агентлиги буюртмаси асосида “Dilshoh media” киностудияси томонидан суратга олинган Амударё туманининг собиқ ҳокими, давлат ва жамоат арбоби, халқимизнинг суюкли фарзанди марҳум Ражапбай Йўлдашев ҳақидаги “Эл фарзанди” номли ҳужжатли фильм намойиш этилди. Тадбир иштирокчилари Ражапбай Йўлдашевнинг эл-юрт ободлиги ва халқ фаровонлиги йўлида қилган фидокорона хизматларини ёдга олдилар.
Маданият бўлими томонидан тайёрланган концерт дастури эса барча иштирокчиларга хуш кайфият бағишлади.
Шундан сўнг уч авлод вакиллари “Хон” ресторанида очиқ дастурхон атрофида бир пиёла чой устида суҳбатни давом эттирдилар.
Тадбир давомида сўзга чиққан ёши улуғ отахон ва онахонлар машаққатларга тўла ҳаёт йўли ва меҳнат фаолияти, ёшлик давридаги ўзига хос қийинчиликлар, меҳнат палласидаги машаққатлар ҳамда нуронийлик пайтида уларга кўрсатилаётган ҳурмат-эҳтиром ҳақида ўз дил сўзларини, самимий фикрларини билдирди.
Эл-юрт равнақи йўлида мамлакатимиз раҳбарига яқин кўмакчи, камарбаста бўлиш лозимлиги уч авлодга мансуб юртдошларимиз ўртасида кечган самимий суҳбатлар бош мавзусига айланди. Ундан ташқари, нуронийлар халқимиз ҳаёти ва турмуш тарзини бутунлай ўзгартириб юборган кўплаб эзгу ишлар ҳақида гапириб, келажакни барпо этишда ёшларнинг ўрни қандай бўлиши кераклиги ҳақида ўзларининг қимматли маслаҳатларини беришди. Ёшлар ҳам юртимизда уларга яратиб берилаётган имкониятлар, улардан унумли фойдаланаётганликлари ва ютуқларга эришаётганликлари ҳақида гапирдилар.
Суҳбат давомида нуронийларимизнинг бой тажрибаси, ўрта авлод вакилларининг меҳнати, ёш авлоднинг шижоати биргаликда катта куч бўлиши, уч авлоднинг мамлакатимиз тараққиётидаги ўрнини алоҳида эътироф этилди.
Тадбир давомида туманда узоқ йиллар давомида юрт равнақи, ёш авлод таълим-тарбияси йўлида фидокорона меҳнат қилган кекса авлод вакилларига эсдалик совғалари топширилди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
