БОБУР НОМЛИ ОВУЛДА “КЕКСАЛАР УЧУН ТУРИЗМ ОЙЛИГИ” ДОИРАСИДАГИ ТАДБИРЛАР ЎТКАЗИЛДИ
Амударё туманида “Кексалар учун туризм ойлиги” доирасидаги тадбирлар қизғин тарзда ўтказилиб, барча ҳудудларда нуроний отахон ва онахонларга алоҳида ҳурмат ва эҳтиром кўрсатилди. Кексаларни қўллаб-қувватлаш, уларнинг вақтини мазмунли ташкил этиш мақсадида соғломлаштириш машғулотлари, спорт мусобақалари, турли учрашув ва давра суҳбатлари, юртимиздаги диққатга сазовор, тарихий масканларга саёҳатлар ташкил этилди.
Шу йил 28 ноябрь куни барча ҳудудларда бўлгани каби Амударё туманининг Бобур номли овулида ҳам кекса авлод вакиллари иштирокида катта тадбирлар ташкил этилди.
Дастлаб тадбирга ташриф буюрган барча меҳмонлар фуқаролар йиғини биноси олдида овулдаги 83-сонли мактаб ўқувчиларининг қўл меҳнати намуналаридан тайёрланган кўргазмани томоша қилдилар ва ёшларнинг ҳунар эгаллаш борасидаги маҳоратларига муносиб баҳо бердилар. Тадбирлар давомида фуқаролар йиғини раиси Гулбаҳор Раимова бошчилигида йиғин масъуллари, овулнинг нуроний отахон ва онахонлари “Яшил макон” умуммиллий лойиҳаси доирасида ҳудудда яратилган боғда 300 дона турли мевали ва манзарали дарахтлар кўчатларини ўтқазишди. Овулдаги деҳқончилик бўйича катта тажрибага эга бўлган нуронийлар ёшларга кўчат экиш, боғ яратиш бўйича маслаҳатлар ва тавсиялар ҳам бердилар.
Шундан кейин йиғин биноси олдидан “Саломатлик учун 5000 қадам” шиори остида пиёда юриш марафони бошланди. Овул кексалари пиёда юриш давомида жисмоний фаоллик, тўғри овқатланиш тартибига риоя этишнинг афзалликлари хусусида суҳбатлашдилар, бу борадаги фойдали маслаҳатларни бир-бирлари билан баҳам кўрдилар.
Марафондан сўнг, тадбир иштирокчилари бўлган кексалар овул ҳудудида янгидан барпо этилган спорт майдончасида соғломлаштириш машқларини бажаришди. Машғулотлар давомида “Беш ташаббус” мусобақаларининг 1-мавсумида иштирок этган овулнинг иқтидорли ёшларидан Умида Ибрагимова шашка бўйича Ўзбекистонда 2-ўрин соҳибаси бўлиб, ҳудудга спорт майдончасини қуриш учун 7 млн. сўмлик сертификатни қўлга киритгани алоҳида таъкидлаб ўтилди. Мазкур спорт майдончаси қисқа фурсат ичида ушбу маблағ эвазига қурилиб, фойдаланишга топширилгани ҳам фахр билан эътироф этилди. Шунингдек, овулда туманимиз шарафини муносиб ҳимоя қиладиган ёшлар кўпайиши учун янада кўпроқ имконият яратилгани таъкидланди.
Ойлик доирасидаги тадбирлар овул ҳудудидаги “Жасурбек” кафесида давом эттирилиб, нуронийлар иштирокида “Уч авлод учрашуви” ташкил этилди. Ушбу учрашувда овулдаги фахрий ўқитувчилар Малика Шукуруллаева, Гулойим Ҳайитбоева, фаол аёл Гулора Қутлимуродовалар ўрта ва ёш авлодга ўзлари ишлаб ўтган давр муҳити, қийинчиликлари, шароитлари ҳақида гапириб, Янги Ўзбекистонимизда ишлаш, тадбиркорлик қилиш, ўқиш истагидаги ҳар бир инсонга яратилаётган имкониятларга ҳавас қилишлари, ушбу имкониятлар қадрига етиш ва улардан унумли фойдаланиш зарурлигини айтиб ўтдилар. Қизғин суҳбатлардан ибрат олган овул ёшлари ҳам ўзларининг бугунги кундаги ютуқлари тўғрисида сўзлашди. Учрашув якунида барча нуронийларга совғалар топширилди.
Тушлик маҳали кафеда очиқ дастурхон атрофида давом этган тадбирга овулдаги Бобур номли маданият марказининг “Ёш ҳаваскорлар” тўгараги аъзолари ижросидаги жўшқин куй-қўшиқлар янада файз киритди. Миллий таом – ош тановул қилинганидан сўнг, ёшу-қари иштирокчилар даврани ўйин-кулгулар билан давом эттиришди.
Шу куни фуқаролар йиғини раиси Гулбаҳор Раимова, ҳоким ёрдамчиси Алишер Йўлдошев ҳамда туман Маҳалла ва нуронийларни қўллаб қувватлаш бўлими масъуллари Баҳодир Болтабоев, Бекман ота Аллабергановлар касал ётган онахон, таълим соҳаси фахрийси Хадича Авазмуродова ҳамда 80 ёшдан ошган онахон Тожигул Матсафоевалар хонадонига бориб, уларнинг ҳолидан хабар олишди. Онахонлар ўзларига кўрсатилган бундай эътибордан ниҳоятда мамнун бўлиб, миннатдорчилик билдирдилар.
Бобур номли овулда “Кексалар учун туризм ойлиги” доирасида ўтказилган тадбирлар иштирокчиларда унутилмас таассуротлар қолдирди.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
