Ички ишлар органлари ходимлари куни кенг нишонланди

Ҳар йили мамлакатимизда 25 октябрь − Ички ишлар органлари ходимлари куни сифатида кенг нишонланиб келинади. 1991 йил 25 октябрда Ўзбекистон Республикаси Вазирлар Маҳкамасининг 270-сонли қарори асосида Ўзбекистон Республикаси Ички ишлар вазирлиги ташкил қилинган эди. 2006 йил 6 декабрда қабул қилинган қонунга мувофиқ эса ушбу сана, яъни 25 октябрь Ўзбекистон Республикаси Ички ишлар органлари ходимлари куни этиб белгиланди. Бу йил Ўзбекистон Республикаси Ички ишлар вазирлиги ташкил этилганига 31 йил тўлди.

Сана муносабати билан 31 октябрь куни Амударё туманидаги “Хон сарой” меҳмонхонасида байрам тадбири бўлиб ўтди.

Тадбирда туман ҳокими Султонбой Йўлдашев, секторлар раҳбарлари, туман Ички ишлар бўлими шахсий таркиби, нафақадаги фахрийлар ҳамда жамоатчилик вакиллари иштирок этишди.

Тадбирда туман ҳокими Султонбой Йўлдашев ички ишлар тизимида сўнгги йилларда амалга оширилган ислоҳотлар ҳақида тўхталиб ўтди ва ўз ҳаётини фуқароларимизнинг тинчлиги ҳамда осойишталиги, ҳуқуқ ва эркинликларини ишончли ҳимоя қилиш, жамиятимизда қонун устуворлигини таъминлашдек шарафли ва масъулиятли ишга бағишлаб келаётган орган ходимларини, тингловчи-курсантларни ҳамда фахрийларни байрам билан самимий муборакбод этди.

Шунингдек, тадбирда ички ишлар органлари ходимларининг фидокорона меҳнатларини эътироф этлиб, уларга чуқур миннатдорлик билдирилди.

Байрам тадбирида туман Ички ишлар бўлими бошлиғи Жамаладдин Юсупов барча ҳамкасбларини байрам билан самимий табриклаб, тизимда эришилган ютуқлар ҳақида айтиб ўтди.

Ўтган йили қабул қилинган “Ички ишлар органларида маънавий-маърифий ишларни ташкил этиш концепцияси”нинг ҳаётга изчил татбиқ этилиши натижасида соҳа ходимларида ватанпарварлик руҳини кучайтириш, уларнинг маънавий дунёқарашини бойитиш, муомала маданиятини юксалтириш бўйича амалга оширилаётган тизимли чора-тадбирлар аҳоли билан ишлаш амалиётига ижобий таъсир кўрсатаётгани таъкидланди.

Тадбирда 4-сектор раҳбари, туман Давлат солиқ инспекцияси бошлиғи Айдос Сейитов ҳам соҳа ходимларини касб байрами билан самимий табриклади. Эл-юрт тинчлиги ва осойишталиги йўлида фидокорона меҳнат қилаётган ходимларнинг оилаларига тинчлик, хотиржамлик, келгуси ишларида зафарлар ёр бўлишини тилади. Шунингдек, ўз хизмат вазифасини бажариш чоғида ҳалок бўлган тизим ходимларининг оила аъзоларига, яқинларига марҳумларнинг ўз вақтида юртимизда осойишталикни таъминлашга қўшган ҳиссалари учун миннатдорлик билдириб, уларнинг ёди ҳамиша қалбларга муҳрланганини айтиб ўтди.

Тадбир давомида туман Халқ қабулхонаси бўлими мидири, ички ишлар фахрийси Эркин Ражабов истиқлолимизнинг илк даврида ташкил топган ички ишлар органлари ўтган синовли йиллар давомида машаққатли ва шарафли йўлни босиб ўтгани ҳамда халқимизнинг чинакам таянчи ва ҳимоячиси сифатида шаклланганлигини ғурур билан тилга олди.

Шунингдек, соҳа ходимлари ўз фаолиятини бошлаган дастлабки кунлардан иккита энг устувор масалага – жамиятимизда тинчлик ва осойишталикни сақлаш ҳамда аҳоли соғлиғини муҳофаза қилишга алоҳида эътибор қаратиб келаётганлигини, алоҳида таъкидланди.

Тадбирда ўз хизмат вазифасини намунали бажариб, халқимизнинг тинчлиги ва осойишталигини таъминлашга бор куч-ғайратини сафарбар этиб келаётган соҳа ходимларининг бир нечтасига капитан, майор, лейтенант унвонлари берилди.

Шунингдек, нафақадаги ходимлардан Махсуд Ўразимбетов, Икром Усенов, Амат Сапарбаевлар “Ўзбекистон ички ишлар фахрийси” кўкрак нишони билан тақдирланди. Ундан ташқари, тадбирда иштирок этган соҳа ходимлари эсдалик совғалари билан тақдирланди.

Тадбир туман Маданият бўлими томонидан тайёрланган бадиий чиқишлар билан давом этди. Туманимизнинг таниқли санъаткорлари томонидан она Ватан, дўстлик, муҳаббатни тараннум этувчи гўзал-куй қўшиқлар янгради.

Тизимда фаолият юритаётган ҳар бир ходим Ватанимизнинг асл ўғлонлари сифатида замонавий билимларни эгаллаган, маънавий ва маърифий дунёси бой, ҳар қандай хавф-хатарга қарши матонат билан курашишга тайёр халқимизнинг чин маънодаги ҳимоячиларидир.

Уларни яна бир бор касб байрамлари билан табриклаб, келгуси ишларида зафарлар тилаймиз!

Туман ҳокимлигининг Ахборот хизмати.