Ёшлар муаммолари туман ҳокимининг доимий эътиборида

Мамлакатимизда ёш авлодни ҳар томонлама қўллаб-қувватлаш, истеъдод ва қобилиятини рўёбга чиқаришга кўмаклашиш мақсадида тизимли ишлар амалга оширилмоқда.

Шунингдек, ёшларнинг муаммолари тегишли корхона, ташкилот мутасаддилари томонидан жойида ҳал қилиниб, мурожаат эгаларига амалий ёрдамлар кўрсатилиб келинмоқда. Бу борадаги ишларни ташкил этишда мунтазам равишда ўтказилиб келинаётган “Ҳоким ва ёшлар учрашувлари” муҳим аҳамият касб этмоқда.

13 октябрь куни Амударё туманининг Уйшин маданият марказида туман ҳокимининг ёшлар билан навбатдаги учрашуви бўлиб ўтди.

Унда туман ҳокими Султонбой Йўлдашев, туман Халқ қабулхонаси бўлими мудири Эркин Ражабов, ҳоким ўринбосари Маҳмуд Шерметов ҳамда тегишли ташкилот масъуллари иштирок этишди.

Учрашувда туман Халқ қабулхонаси бўлими мудири Эркин Ражабов юртимизда фаол, аниқ мақсадига эга, тадбирли, билимдон йигит-қизларни қўллаб-қувватлаш давлат сиётининг етакчи мақсадига айланлигини таъкидлаб, бу борадаги тадбирларни самарали амалга ошириш, ҳар бир ёш билан алоҳида ишлаб, уларнинг муаммоларига ечим топиш, катта ҳаётга дадил қадам қўйишларида қанот бўлишини айтиб ўтди.

Шундан сўнг, туман ҳокими Султонбой Йўлдашев ёшларга яратилаётган имкониятлар хусусида тўхталиб ўтди. Жумладан, Ўзбекистон Республикаси Президентининг 2022 йил 31 август кунги “Қорақалпоғистон Реcпубликасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги Фармонида тадбиркорларга берилаётган имтиёзлар, оилавий тадбиркорликни ривожлантириш дастурлари доирасида яратилаётган енгилликлар, шунингдек, олий таълим муассасаларига қабул учун ажратилган қўшимча квоталар ҳақида батафсил маълумот берди.

Шундан сўнг, ёшларнинг таклиф ва муаммоларидан иборат мурожаатлари тингланди. Уйшин маҳалласида истиқомат қилувчи ёшлардан бири Набижон Жумамуратов ҳамда Матлуба Янгибоева контракт тўлови қоплаб берилиши бўйича мурожаат қилдилар. Мурожаат эгаларининг оилавий шароитлари шу еринг ўзида ўрганиб чиқилиб, муаммо ижобий ҳал қилинадиган бўлди.

Ундан ташқари, маҳалланинг фаол ёшларидан Дилдора Тилеумуратова тикувчилик касбининг сир-асрорларини қунт билан ўрганганлигини, бугунги кунда бир нечта шогирдлари борлигини, аммо тикувчилик цехи очиш учун аҳоли зич тарзда жойлашган ердан қулай бино топа олмаётганлигини айтиб, туман ҳокимига мурожаат қилди. Ушбу мурожаат ҳам жойида ўрганиб чиқилиб ижобий ҳал қилинадиган бўлди.

Ҳозирги кунда ёшларга оид амалга оширилаётган ислоҳотларнинг ўзи давлат ташкилотлари олдига янги-янги вазифаларни қўймоқда. Зеро, олдимизга қўйилаётган вазифалар замирида элу юртимизнинг тинчлиги ва осойишталигини мустаҳкамлаш, халқимиз, хусусан, қишлоқларда истиқомат қилувчи ёшларнинг бандлигини таъминлаш, ҳеч кимдан кам бўлмаган баркамол авлодни тарбиялашдек эзгу ниятлар мужассам.

Туман ҳокимлигининг Ахборот хизмати.