ЎРТА ҚАЛЪА ОВУЛИДА “КЕКСАЛАР ҲАФТАЛИГИ” ДОИРАСИДА ҚАТОР ТАДБИРЛАР ЎТКАЗИЛДИ

Ўзбекистон Республикаси Вазирлар Маҳкамасининг 2019 йил 27 сентябрдаги “Кекса авлод вакилларининг жамиятдаги ўрни ва ижтимоий фаоллигини янада ошириш чора-тадбирлари тўғрисида”ги Қарорига асосан ҳар йили октябрь ойининг биринчи ҳафтасида бутун мамлакатимиз миқёсида “Кексалар ҳафталиги”ни ўтказиш белгиланган.

“Кексаларни эъзозлаш, уларга ҳурмат-эҳтиром кўрсатиш халқимизга хос эзгу фазилат” деган бош ғояни ўзида мужассам этган “Кексалар ҳафталиги” Амударё туманида ҳам кўтаринки руҳда ўтказилди.

6 октябрь куни туманнинг Ўрта қалъа овули ҳудудида яшовчи кекса авлод вакиллари – нуроний отахон ва онахонлар ўз фарзандлари билан биргаликда 5 минг қадам дастури доирасида эрталабки бадантарбия машқларини бажаришди.

Тадбирда нуроний кексалар билан бирга уларни қўллаб-қувватлаш мақсадида ёшларнинг ҳам фаол иштирок этаётгани нуроний отахон ва онахонларга руҳий кўтаринкилик бағишлади.

Айниқса, бутун Ўрта қалъаликларнинг ҳурматли отахони Йўлдош бобонинг бу каби тадбирлар нафақат кексалар саломатлигини мустаҳкамлаш, балки қалбларда ўзаро ҳурмат, эътибор ва эҳтиром туйғуларини уйғотишга хизмат қилиши ҳақидаги фикрлари тонгги бадан тарбия машғулотлари иштирокчиларини янада руҳлантириб юборди.

Айтиш керакки, туманда мазкур ҳафталик доирасидаги ижтимоий-маърифий тадбирларни кекса авлод вакилларига нисбатан ҳурмат-эҳтиром, меҳр-мурувват ва саховат тамойиллари асосида ўтказиш мақсадида Амударё тумани ҳокими Султонбой Йўлдашев бошчилигида мажлис ўтказилиб, зарур топшириқлар берилди.

Туманда ўтказиладиган ижтимоий ва маънавий-маърифий тадбирлар режаси ишлаб чиқилиб, белгиланган жадвал асосида барча овул ва маҳаллаларда, жамоат ташкилотларида нуронийлар ҳолидан хабар олиш, уларни моддий ва маънавий қўллаб-қувватлаш, ҳурмат-эҳтиром кўрсатиш мақсадида қатор тадбирлар ўтказилди. Ҳафталик доирасидаги тадбирларнинг “маҳаллабай” амалга оширилиши якка-ёлғиз, ўзгалар парваришига, меҳр-мурувватига муҳтож инсонлар қалбига қувонч бағишламоқда.

Ўрта қалъа овул фуқаролар йиғини ходимлари ҳам ойлик доирасида қатор тадбирларни ташкил қилишди. Овул нуронийларининг туманимиздаги тарихий-ўлкашунослик музейига саёҳати ҳам шулар жумласидандир.

Бу музей нафақат аму элининг, балки бутун қорақалпоқ халқининг буюк ва бетакрор тарихи ҳақидаги манбаларга эга бўлган, олис ўтмишга саёҳат қилдирувчи масканга айланди. Бугунги кунда ушбу масканга фақат туманимиздангина эмас, Республикамизнинг турли ҳудудларидан ташриф буюрувчилар сони ортмоқда.

Саёҳат давомида овул нуронийлари туманимиз тарихи, ота-боболаримизнинг ҳаёт тарзи билан яқиндан танишдилар. Музей раҳбари Шавкат Чоршамов ҳар бир экспонатнинг тарихи ҳақида маълумотлар берди.

Айтиш керакки, “Кексалар ҳафталиги” доирасида Ўрта қаъла овул фуқаролар йиғини масъуллари овулга бириктирилган шифокорлар билан биргаликда якка-ёлғиз, ногиронлиги, бор кексаларнинг хонадонларида бўлишиб, уларнинг яшаш шароитлари, соғлигини кўздан кечиришди, муаммоларини ўрганиб, ижобий ҳал этиш бўйича чора-тадбирлар ишлаб чиқишди.

Овулнинг Нонвойқалъа мавзесида яшовчи 1934 йилда туғилган Турсун момо Тожимуродова умр бўйи ўз фидойи меҳнати билан эл-юрт фаровонлигига муносиб ҳисса қўшган онахонлардан биридир. “Кексалар ҳафталиги” доирасида овул масъуллари Турсун момо Тажимуродованинг хонадонида бўлишди ва момонинг соғлиги шифокорлар кўригидан ўтказилди.

Ҳафталик доирасидаги бу каби меҳр-мурувват, кекса авлодга эҳтиром кўрсатиш тадбирлари деярли ҳар куни амалга оширилди.

“Кексалар ҳафталиги” доирасида амалга оширилаётган барча тадбирларда овулда истиқомат қилувчи меҳнат фахрийлари, кексалар ва шу баробарида ёшлар ҳам фаол иштирок этишдилар.

Робия ЙЎЛДОШЕВА.