Қирқ йилдан кейинги дийдор

Жорий йилнинг 4 июн куни Амударё туманидаги 24 – сонли умумий ўрта мактабни 1980 йилда тугатган собиқ битирувчиларнинг 40 йиллик юбилей учрашуви бўлиб ўтди. Ушбу даргоҳни қирқ йил муқаддам тамомлаган собиқ ўқувчилар дийдорлашуви мактаб биносида ташкил этилди.

Учрашувга Республикамизда фан, таълим, ҳарбий соҳада, хусусий тадбиркорликда, педагогика соҳасида фаол меҳнат қилиб келаётган 25 дан зиёд битирувчилар келишди. Учрашувга келган битирувчилар  нафақат туманимизда, балки Республикамизда ҳам ўзларининг фаол хизматлари, улкан тажрибалари билан танилган етук мутахассислар бўлиб, Ватанимиз равнақи учун ҳисса қўшаётган, ҳозирги кунда ўзининг бой амалий тажрибаси билан ўсиб келаётган ёш авлодга ўрнак бўлаётган азиз инсонлардир.

Учрашувда мактабнинг 25 дан зиёд собиқ ўқувчилари ҳамда уларнинг устоз – мураббийлари, собиқ ўқитувчиларидан Подшагул Эрниязова, Болтабой Алимбоев, Омонгул Қайирбергенова, Нағишбой Нурниязовлар қатнашдилар.

Мактаб ўқувчилари томонидан ташкил этилган узоқ йиллик синфдошлар учрашуви байрам тантаналарига айланиб кетди. Тадбирниинг ташкилий қисми мактаб биносида ўтказилди.

Тадбирда Қозоғистондан ташриф буюрган ёши улуғ собиқ устозлар, фахрий ўқитувчилар сўзга чиқиб, собиқ ўқувчиларни 40 йилик учрашув билан муборакбод этдилар. Уларга мактаб ҳаёти, ўқувчилик йилларига доир қизиқарли маълумотлар, ҳаётнинг тотли онлари хусусида илиқ фикрларини баён этдилар. Собиқ синфдошлар ҳам олтин ёшликнинг унутилмас лаҳзалари, қадр – қиммат, устозларга эъзозлар ҳақида дил изҳорларини баён қилдилар.

Замонавий жиҳозланган хоналарда таълим олаётган бугунги кун ўқувчисига ҳавас билан қарашар экан, бугун юртимизда илм – фан ва технологияларнинг бугунги глобал дунёда жадал ўсиши, ёшларга кенг имкониятлар яратилиб, уларнинг истеъдоди ва қобилятларини тўлиқ амалга оширишга алоҳида эътибор қаратилганлигини таъкидлаб ўтдилар.

Синф парталарида ўтирар экан, мактаб даврида кечган қизиқарли воқеалар, ажойиб саргузаштларни мириқиб эслашди. Учрашувга келган битирувчилар мактабнинг ҳозирги ҳаёти, илм – фандаги ютуқлари, янги технологиялар билан танишдилар ва ўзларининг таассуротлари, болалик хотиралари билан ўроқлашдилар.

Бундан 40 йил олдин мактабни тугатган собиқ ўқувчилар таълим маскани олдида эсдалик фотосуратларига тушдилар ва устозларга таъзим бажо келтириб, мактаб раҳбариятига, устоз – мураббийларига улкан зафарлар ва муваффақиятлар, яхши ниятлар ва истаклар билдиришди.

Синфдошлар ўртасидаги дўстлик туйғуси инсонни маънавий қўллаб – қувватловчи, унинг оғирини енгил қилувчи, руҳиятини кўтарувчи, ўзига ишонч орттирувчи куч ҳисобланади. Инсонда дўстлик, биродарлик, ўзаро ишонч туйғулари дарҳол юзага келиб, ўз – ўзидан мустаҳкамланиб қолмайди, балки йиллар давомида шаклланиб боради.

Ташкилотчилар узоқ ва яқиндан келган битирувчиларни бир паёла чойга таклиф қилдилар, дўстлар учун ёзилган дастурхон атрофида дўстона суҳбат ва ўйин – кулгулар билан битирувчилар тантанаси узоқ вақт давом этди. Синфдошларнинг соғинчли дийдорлашуви узоқ йиллар хотирада муҳрланиб қоладиган даражада юқори савияда ўтказилди.

Учрашув жараёнида собиқ битирувчиларнинг дил сўзлари бир – бирига уланиб кетди, шўх- шодон  ўйин – кулгулар авж олиб, куй – қўшиқлар янгради.

Севара ИСМОИЛОВА, ҚДУ талабаси