Амударё тумани Давлат хизматлари марказида семинар бўлиб ўтди

Мамлакатимизда давлат хизматлари кўрсатиш тизими изчиллик билан такомиллаштирилмоқда ва модернизация қилинмоқда. Жумладан, халқ оғирини енгил қилиш, уларга “давлат-фуқаро” муносабатларида қулайлик яратиш ва шаффофликни таъминлаш мақсадида кўплаб тизимли ишлар амалга оширилмоқда.

Амударё тумани Давлат хизматлари марказида маънавий-маърифий ишларнинг янги тизимини яратиш ҳамда давлат тили тўғрисидаги қонун ҳужжатларига риоя этилишини таъминлаш, шунингдек, фуқароларга давлат хизматлари кўрсатилиши қандай тартибда амалга оширилиши билан яқиндан таништириш мақсадида кўргазмали семинар ташкил этилди.

Семинар туман Адлия бўлими Давлат хизматлари маркази бошлиғи Мўъминжон Матюсупов, юридик хизмат кўрсатиш маркази бошлиғи Нилуфар Жуманиязова ва бош юрисконсультлари Мансур Матюсупов, Шавкат Ваисниязов, Журъат Авезов, Аброр Тожибоев, Саид Султановлар бошчилигида ўтказилди.

Семинарни туман Адлия бўлими Давлат хизматлари маркази бошлиғи Мўъминжон Матюсупов очиб берди ва давлат хизматлари соҳасида янгидан тадбиқ этилган давлат хизматлари турлари бўйича тушунчалар берди.

Шундан сўнг, фуқароларга Юридик хизмат кўрсатиш маркази ходимлари томонидан идора ва ташкилотларда юридик тусдаги ҳужжатларини расмийлаштирилиш тартиби, йиллик меҳнат таътилларини бериш, таътилни узайтириш ва бошқа муддатга кўчириш, меҳнат шартномасини бекор қилиш, меҳнат дафтарчаларини юритиш тартиби ва my.mehnat.uz сайти орқали расмийлаштириш жараёнлари, ходимларни интизомий жазога тортиш ва муддатидан олдин олиб ташлаш тартиблари ҳақида кенг турда маълумотлар берилди.

Семинар давомида фуқароларга электрон давлат хизматларидан фойдаланиш тартиб ва қоидалари бўйича тушунчалар берилиб, фуқаролардан келиб тушган барча саволларга тўлиқ жавоблар берилди.

 Шу билан бир қаторда E-huquqshunos тизими орқали келиб тушаётган юридик тусдаги ҳужжатларни расмийлаштиришда эътибор қаратилиши лозим бўлган муҳим жиҳатларга тўхтаб ўтилди.

Семинарда туман Адлия бўлими Фуқаролик ҳолати далолатномаларини ёзиш бўлими бошлиғи Санобар Холбаева кўрсатилаётган давлат хизматлари ва Фуқаролик ҳолати далолатномаларини ёзиш хизматларини соддалаштириш ҳамда аҳолига яратилаётган қулайликлар юзасидан қонунчиликдаги янгиликлар бўйича маъруза қилди.

“Мадад” нодавлат нотижорат ташкилотининг бош маслаҳатчиси Даврон Пирманов эса маслаҳат бюросига келиб тушаётган меҳнат низолари, оилавий муносабатлар, фуқароларнинг ижтимоий муҳтож қатламига нафақа олиш ҳамда қонунчиликдаги янгиликлар бўйича кенг тарзда тушунчалар берди.

Семинар давомида ҳар бир мавзу бўйича иштирокчилар ўзларини қизиқтирган саволларига қонуний асослантирилган жавоблар олдилар ва семинардан мамнун бўлиб, бундай семинарлар туманимизнинг чекка ҳудудларида ҳам сайёр тарза ташкил этилиши лозимлиги бўйича ўз таклифларини билдирдилар.

Амударё тумани Адлия бўлими.