ТУМАН МУДОФАА ИШЛАРИ БЎЛИМИ МАСЪУЛЛАРИ ЎҚУВЧИ-ЁШЛАР УЧУН ЙИҒИЛИШ ЎТКАЗИЛДИ

Ёшларни ҳарбий ватанпарварлик руҳида тарбиялаш – бу миллати, тили ва касбидан қатъий назар, ёшларда Ватанга садоқат туйғусини шакллантириш, уларни ўз фуқаролик бурчи ва конституцион мажбуриятларини бажаришга, жамият ва давлат манфаатларини ҳимоя қилишга қодир шахслар қилиб тарбиялашга йўналтирилган фаолиятдир.

Бугунги кунда мамлакатимизда фаолият юритаётган умумий таълим мактабларида ёшларни чақириққа қадар бошланғич тайёргарлик фани ёшларни Ватан ҳимояси учун муносиб хизмат қилишга руҳан ва жисмонан тайёрлашга йўналтирилган, шунингдек, миллий армиямиз сафларида хизмат қилиш учун жисмонан бақувват, маънан етук ёшлар зарурлиги, ҳарбий хизматнинг аҳамияти, Қуролли Кучларда олиб борилаётган ислоҳотлар ҳақида улар батафсил хабардор қилиб борилади.

28 март куни Амударё туманидаги 16-сонли мактабда ушбу муассаса ёшларни чақирувга қадар бошланғич тайёргарлик фани ўқитувчиси Акмал Саидов ва туман Мудофаа ишлари бўлими масъуллари ҳамкорлигида ҳарбий ватанпарварлик тарбиясига бағишланган йиғилиш бўлиб ўтди. Тадбирда Манғит шаҳрида фаолият юритаётган мактабларнинг 9- ва 11-синфлари битирувчилари иштирок этдилар.

Йиғилишда туман Мудофаа ишлари бўлими бошлиғи, подполковник Шерзод Муродов, ёшларни ҳарбий хизматга тайёрлаш бўлинмаси бошлиғи Роман Рўзметовлар сўзга чиқиб, иштирокчиларга кенг турда тушунчалар берди. Таъкидланганидек, мамлакатимизда ўсмирларни ҳарбий – ватанпарварлик руҳида тарбиялаш ҳамда Ўзбекистон Республикаси Қуролли Кучлари ва давлат хизмати учун кадрлаш заҳирасини тайёрлаш тизимини такомиллаштириш бўйича қатор амалий ишлар қилинмоқда. Шу мақсадда қабул қилинган Президент қарорига кўра Мудофаа, Ички ишлар, Фавқулодда вазиятлар вазирликлари, давлат хавфсизлик хизмати, миллий гвардия таркибида “Темурбеклар мактаби” ҳарбий-академик лицейлари ташкил этилди. Ушбу лицейларга умумтаълим мактабларининг 9-синфини аъло баҳоларга тамомлаган, соғлиғининг ҳолатига кўра ўқишга яроқли деб топилган ҳамда саралаш танловидан муваффақиятли ўтган ўсмир ўғил болалар қабул қилинади. “Темурбеклар мактаби” ҳарбий-академик лицейларида ўқиш давомийлиги икки йил эканлиги, битирувчиларга мазкур соҳаларда ишлаш ё ўқишни давом эттириш учун яратилган имкониятлар ҳақида батафсил маълумот бердилар.

Ҳарбий хизмат – ҳар бир йигитнинг муқаддас бурчидир. Юртимизда ҳарбий хизматга боришни, олий ҳарбий билим юртларида таҳсил олиб, етук ҳарбий мутахассис бўлиб, Қуролли Кучларимиз сафида хизмат қилишни, юртимиз тинчлик-осойишталигига ҳисса қўшишни орзу қиладиган йигитлар кўпчиликни ташкил этади.

Мактабда ўтказилган тадбирда ўқувчиларга юртимиздаги мавжуд ҳарбий олий таълим муассасаларига ўқишга кириш шартлари кенг тушунтирилди.

Тадбир сўнгида ёшларни чақириққа қадар бошланғич тайёрлаш фани ўқитувчиси Акмал Саидов сўзга чиқиб, ўз фаолиятида ўқувчи-ёшларни билимли, кучли, юрт корига ярайдиган ватанпарвар қилиб вояга етказиш мақсадида амалга ошираётган ишлари, эришаётган ютуқлари ҳақида маълумот берди. Учрашув ташкилотчилари ўқувчиларни “Темурбеклар мактаби”да, ҳарбий олий таълим муассасаларида ўқишга, иқтидорли ҳарбий мутахассислар бўлиб етишиб, ватанимиз равнақига, осойишталигига муносиб ҳисса қўшишга чақирди.

Тадбир ўқувчиларда улкан таассуротлар қолдирди.

О.РАЖАБОВА.