Ҳарбий хизматчилар ёшлар билан учрашди

Мамлакатимизда ёшларни ёт ғоялар ва таҳдидлардан ҳимоя қилиш, ўз мустақил фикрига эга, иродали инсонлар қилиб тарбиялаш бугунги кунда энг асосий вазифалардан саналади. Бунинг учун ҳар бир ўғил-қиз кўнглида Ватанга, ўз оиласига муҳаббат, юрт учун фидойилик туйғуларини қарор топтириш, юртимиздаги тинч-осудаликни, бахтиёр ва фаровон ҳаётни қадрлашга ўргатиш жуда муҳим.

Ватанпарварлик тарбияси эса умумий тарбиянинг бир қисми бўлиб, ёшларда Ватанни фидокорона ҳимоя қилишга тайёргарлик ва бунга қодир бўлиш салоҳиятини шакллантиришга йўналтирилган. Бунда умумий ўрта таълим мактабларида ёшларни чақириққача тайёргарлик фани муҳим ўрин тутади. Дарс машғулотларида ўқувчиларда халқимиз тарихига ва маънавий қадриятларига юксак ҳурмат туйғусини уйғотиш, Ватан ҳимоясига, унинг миллий хавфсизлиги, ҳудудий яхлитлиги ва суверенитетини таъминлашга доимо шай туриш туйғулари тарбияланмоқда. Таълим масканларида Қуролли Кучларимиз сафларида хизмат қилаётган, муддатли ҳарбий хизмат бурчини ўтаётган ўғлонлар билан учрашувлар ташкил қилиниб, ёшларимизнинг ҳарбий хизмат борасида, мамлакатимиз Мудофаа тизимидаги янгиликлар борасида билимлари бойитилмоқда.

Шу йилнинг 11 март куни Амударё туманининг Бўз солма маҳалласида жойлашган 70-сонли мактабда ўтказилган учрашув ҳам шу мақсадга қаратилди. Учрашувни мактаб директори Орифжон Ўтабоев, ёшларни чақириққа қадар тайёрлаш фани ўқитувчиси Шерифбой Жумабоев, маҳалла ёшлари етакчиси Фаррух Мадраҳимовлар ташкиллаштирдилар. Унда ҳудудда жойлашган Давлат хавфсизлик хизмати чегара қўшинларига қарашли ҳарбий қисм хизматчилари – 1-даражали сержант Отабек Маҳмудов, 1-даражали сержант Сирожиддин Эркинов ва муддатли ҳарбий хизматни ўтаётган аскар Махсудбек Мадаминовлар иштирок этдилар.

Мактаб фаоллар залида бўлиб ўтган тадбирда ҳарбий хизматчиларни ўқувчилар очиқ чеҳра билан қарши олдилар. Ўзларининг китобхонлигини намойиш этиш учун ўқиган китоблари, севимли адабий қаҳрамонлари тўғрисида қисқача суҳбатлашиб, шеърлар ёд айтдилар.

Шундан сўнг ўқувчи-ёшларнинг ақл-идроки ва салоҳиятини синовдан ўтказиш учун “Заковат” интеллектуал ўйини ўтказилди. Ўқувчилар ҳарбий хизматчилар саволларига батафсил жавоблар беришга ҳаракат қилдилар.

Ўтказилган шахмат-шашка мусобақалари ҳам таассуротларга бой бўлди. Маълумки ушбу спорт турлари одамдан юксак тафаккурни, ақл-идрокни талаб қилади. Шахмат-шашка ақл гимнастикаси дейилиши ҳам бежиз эмас. Ушбу мусобақанинг ташкил этилиши тадбирнинг яна ҳам қизиқарли бўлишини таъминлади. Мактаб ҳовлисида ҳарбий қуролларни қисмларга ажратиш ва яна қайта йиғиш машғулотлари ўқувчиларнинг бу борада билим ва кўникмаларга эга эканлигини намойиш этди.

Самимий суҳбатлар чоғида ҳарбий хизмат Ватанимизнинг ҳар бир ўғлони учун муқаддас бурч эканлиги ёшларга сингдирилди.

Ўқувчи-ёшлар қалбида ватанпарварлик руҳини ошириш мақсадида ўтказилган тадбир барчада улкан таассуротлар қолдирди.

Ойгул РАЖАБОВА.