Дийдор қувончи
52-сонли умумий ўрта таълим мактабининг 11-синфини 1994 йилда битирган собиқ ўқувчилари 2014 йил 13 август куни жонажон мактаби бағрида тўпланишиб, ўзларига 11 йил давомида таълим-тарбия берган устозлари билан учрашдилар. Собиқ ўқувчилар орадан йигирма йил ўтиб мактабга, жонажон синфхоналарига ўзгача бир кайфиятда, ички ҳаяжон билан бирин-кетин кириб келишди. Синфлари озода, парталари янги, бугунги кун талаби даражасидаги компьютерлар ва техник воситаларга эга синф ҳаёти ва бугунги таълим жараёнини акс эттирган деворий газеталар, стендлар, баннерларга бой шароитни кўриб собиқ ўқувчиларнинг ҳаваслари келиб кетди.
Учрашув мактаб биносида эрталабки соат 9 да бошланди. Тадбирда собиқ битирувчилар билан биргаликда меҳнатфахрийлари, мактаб педагогика жамоаси, маҳалла фаоллари иштирок қилдилар. Тадбирни собиқ ўқувчи, ҳозирда шу мактабнинг директори лавозимида ишлаётган Қодирберган Ешчанов очиқ деб эълон қилди. Собиқ ўқувчиларни ўзларининг синф раҳбарлари, меҳнат фахрийси, тарих фани ўқитувчиси Холбой ака Аҳмедов ва ҳозирги кунда мазкур мактаб директорининг ўқув-тарбия ишлари бўйича ўринбосари вазифасида ишлаётган Баҳром Ражабов, биринчи ўқитувчиси марҳум (охиратлари обод бўлсин) Иброҳим ака Матюсуповнинг рафиқаси Сопоргул опа ва Гулнора опа Артиқованинг қизи Райҳонлар дийдор онлари билан қутладилар. Учрашувга ҳаётдан бевақт кўз юмиб кетган собиқ синфдошлари Мухторжон ва Ҳусанжонлар (охиратлари обод бўлсин)нинг ота-оналаридан Турсунбой ака Абдуллаев, Гулора опалар ҳам ташриф буюрдилар.
Собиқ синфдошларнинг йигирма йиллик айрилиқдан сўнгги дийдорлашуви, вақтнинг тезкор ва учқурлиги, ҳар ким ҳар тарафга ҳаёт тақозоси билан тарқалиб кетишларига қарамай, ҳаммалари бир-бирлари билан дўстлик, ўртоқлик ришталарини узмасдан сақлашнинг ўзи улар учун бир бахт эканлиги кўриниб турар эди.
Мактаб ҳаёти билан танишувдан ва дўстона дийдорлашувдан сўнг, туман марказидаги "Осиё” тўйхонасида собиқ ўқувчилар-у устозлар ёқимли куй-қўшиқлар оғушида анча пайт суҳбатлашиб ўтирдилар, мактаб ва ёшлик дамларини эслашиб, эсда қолган воқеаларни яна бир бор ёдга олдилар. Бугунги дориломон замон ва инсонга яратилган шарт-шароитлар, имкониятлар тўғрисида ширин суҳбатлар қурилди. Турсунбой ака ва Холбой акалар ўзлари ижод қилган шеърларини кеча қатнашчиларига ўқиб бердилар.
Гулмирза БОБОЖОНОВ,
52-сонли мактаб директорининг маънавий ва маърифий ишлар бўйича ўринбосари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
