БАХТЛИ КУНЛАР ЎЗ-ЎЗИДАН КЕЛМАГАН
Мустақиллик… сен булутларни ёриб чиққан қуёшсан, қанча-қанча бобокалонларимизнинг кўнглидаги асрий армон, асрий орзусан!
Ҳақиқатан, мустақиллик бизнинг қадр-қимматимизни, миллийлигимизни ва мухтасар қилиб айтганда, ўзлигимизни қайтариб берган улуғ неъматдир.
Мустақиллик тўғрисида сўз кетганида: мустақиллик бизга нима берди? кеча ким эдиг-у бугун ким бўлдик? каби саволлар хаёлимизни чулғаб олади. Бешак, мустақиллик бизга эркин нафас ва янги фаровон ҳаёт ато етди. Яқин ўтмишга назар соладиган бўлсак, бизнинг халқимиз таҳқирланган, инсоний шаъни ва қадр-қиммати топталган, Республикамиз аграр ва қолоқ ҳудуд эди. Бугун эса ҳар томонлама ривожланган, ҳар бир соҳа тараққий топган, баркамол фарзандлари иқтидорлари билан дунёни лол қолдираётган, юксак маънавиятли, ҳур миллатга айландик. Истиқлолга эришишимиз натижаси ўлароқ, асрлар силсиласида ўз маҳобатини йўқотмай келаётган муқаддас қадамжоларимиз, масжид-у мадрасаларимиз қайта бўй тиклади. Юртимизга келаётган сайёҳларнинг сони кундан-кунга ортиб бораётганлиги бунинг ёрқин мисолидир.
Бугун Ўзбекистонимиз мустақиллиги йигирма уч ёшда. Мана шу қисқа фурсат ичида она халқимизнинг моддий ва маънавий аҳволи тубдан ўзгариб кетди. Юртимиз жамоли таниб бўлмас даражада чирой очиб, бугун дунё аҳли ҳавас қилгулик даражада юксалиб бормоқда. Албатта, бу ўзгаришлар, бу юксалишлар замирида истиқлол берган улкан имкониятлар ётади.
Айниқса биз ёшларга қаратилаётган эътиборни кўриб, қалбларимиз фахру-ифтихорга тўлади. Чунки истиқлолнинг илк кунларидан бошлаб ёшларга эътибор давлат сиёсати даражасига кўтарилди. Ўқув масканларимиздаги замон талабларига тўлиқ жавоб берадиган, ёруғ ва шинам хоналаримиз, барча талабларга жавоб берадиган қанчадан-қанча ўқув лаборатория хоналари ва спорт заллари, биз ёшларнинг илм олишга қанчалик ғамхўрликлар қилинаётганини кўрсатиб турибди.
Президентимиз И.А.Каримовнинг Ўзбекистон республикаси мустақиллигининг йигирма уч йиллигига бағишланган тантанали маросимидаги табригини тинглаб, тўғрисини айтсам, кўзимдан ёш чиқиб кетди. Давлатимиз раҳбари биз ёшларга шундай бир ишонч билан, шундай бир ғурур билан мурожаат қилаяптиларки, менинг ҳам кўнглимда мана шундай озод элнинг фарзанди эканлигимдан фахрланиш, ифтихор туйғулари жўш урди.
Президентимизнинг:
-Азиз болаларим!
Менинг фарзандларим бўлмиш бутун Ўзбекистон ёшларига қалбимда, юрагимда бўлган фикрни айтмоқчиман: ҳар қачон сизлар билан учрашганда, сизларнинг ёниб турган кўзларингизни, навқирон қадди-қоматингизни, сизлар эришаётган ютуқларни кузатганда, кўпчилик қатори мен ҳам ўзимда xуддики қанот пайдо бўлгандек ҳис қиламан.
Сизлар қаерда, қайси соҳада бўлмасин-билим олиш, илму-ҳунар чўққиларини эгаллаш, энг замонавий касб-ҳунарларни ўзлаштириш, бизнес соҳасини ривожлантиришда, спорт майдонларида Ўзбекистоннинг шуҳратини тараннум етишда барчага намуна бўлаётганингиз, сўзсиз ҳаммамизни қувонтиради, - дея ишонч билдиргани ҳурмат ва эҳтиром билан, ишонч ва самимият билан алқаганликларини кўриб қалбим ёришиб кетди. Мана шундай ўйлар мендан бошқа яна неча-неча ўзбекистонлик ёшларнинг кўнглидан ўтган бўлса ажаб емас. Собиқ иттифоқ ҳукмрон бўлган ўша йилларда, ҳали она сути оғзидан кетмаган гўдакларнинг қаҳратон қишда совуқ қорларни кечиб пахта терганликларини, уларнинг айни ўқиб илм оладиган паллалари мана шундай қора меҳнатда, пайкалларда кечганини ўйласам,бугунги кунимизнинг қадрини теранроқ англагандай бўламан. Ҳар қадамимда, ҳар нафасимда. Ва шу баробарида фарзандлик бурчимни, бундай дориломон кунлар ўз-ўзидан келмаганини ҳам. Бизга ана шундай улуғ бахтни ато этган энг улуғ, энг азиз байрамимиз муборак бўлсин, азизлар!
Азиза МАДРАҲИМОВА,
Манғит шаҳридаги Иқтисодиёт касб-ҳунар коллежи 3-босқич ўқувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
