ЎЗБЕКИСТОН РЕСПУБЛИКАСИ ИЧКИ ИШЛАР ВАЗИРЛИГИ ИШЧИ ГУРУҲИ ТУМАНИМИЗДА БЎЛДИ

Мамлакатимиз аҳолисининг 30 фоизи 14 ёшдан 30 ёшгача бўлган ёшлардир. Уларнинг таълим олиши, касб-ҳунар эгаллаши учун замонавий шароит ва имкониятлар яратилган. Шу билан бирга, ёшларнинг бўш вақтини мазмунли ўтказишни ташкил этиш долзарб масала ҳисобланади. Ёшлар қанчалик маънавий баркамол бўлса, турли ёт иллатларга қарши иммунитети ҳам шунча кучли бўлади.

Ушбу вазифалар ижросини таъминлаш мақсадида Президентимиз томонидан кўплаб қарорлар ва фармонлар қабул қилинди. Жумладан, Ўзбекистон Республикаси Президентининг 2022 йил 19 январь кунги “Маҳалларда ёшлар билан ишлаш тизимини тубдан такомиллаштириш чора-тадбирлари тўғрисида”ги қарорининг қабул қилиниши ёшларга қаратилаётган юксак эътибор ва ишончнинг намунаси дейишимиз мумкин.

 Мазкур қарор ижросинини назорат қилиш ва ёшлар етакчиларига зарурий кўрсатма ва тавсиялар бериш мақсадида 5 февраль куни Амударё тумани ҳокимлигининг катта мажлислар залида йиғилиш бўлиб ўтди.

Йиғилишда Ўзбекистон Республикаси Ички ишлар вазирлиги ишчи гуруҳи аъзолари, туман ҳокими Султонбой Йўлдашев ҳамда туман Ички ишлар бўлими профилактика инспекторлари, маҳалла раислари, туман сектор раҳбарлари, ёшлар етакчилари ва соҳавий ташкилот вакиллари қатнашди.

Маълумки, давлатимиз раҳбари ижтимоий, маънавий-маърифий соҳалардаги ишларни янги тизим асосида йўлга қўйиш бўйича 5 та муҳим ташаббусни илгари сурган эди. Йиғилишда ишчи гуруҳ томонидан туманимиз бўйлаб 5 та муҳим ташаббус доирасида амалга оширилган ишлар борасида фикрлар билдирилиб, бугунги кунда ёшлар масаласи давлат сиёсати даражасига кўтарилганлиги, уларнинг бўш вақтини мазмунли тарзда ўтказиш долзарб масала эканлиги қайд этиб ўтилди.

Таъкидлаш жоиз, туманимизда “Бешта муҳим ташаббус” доирасида 2 февраль куни ташкил этилган спорт мусобақалари, маҳорат дарслари ва заковат интеллектуал ўйинлари эндигина униб ўсаётган йигит-қизларнинг бўш вақтини мазмунли ўтказишларида катта аҳамиятга эга бўлди. Айни кунларда бу тадбирлар маҳаллалар кесимида намунали тарзда ташкил этилиб давом эттирилмоқда.

Ушбу тадбирлани ташкил этишда маҳаллалардаги ёшлар етакчилари ташаббуcкор ва фаол ҳаракат қилишмоқда. Йиғилишда ишчи гуруҳ вакиллари томонидан етакчиларга ҳоким ёрдамчилари билан ҳамкорликни йўлга қўйиши лозимлиги, муаммоли ёшлар билан ишлаш тизимини қандай ҳолатда йўлга қўйганликлари бўйича бир қанча саволлар билан мурожаат қилинди.

Етакчилар ишчи гуруҳ вакиллари томонидан берилган саволларга атрофлича жавоблар беришди.

Бундан ташқари йиғилишда, ёшлар билан ишлашнинг янгича бошқарув механизмларини жорий этиш, ёшлар муаммоларини бевосита маҳаллаларда хал этиш, таълим муассасаларида маънавий-маърифий ва тарбиявий ишларнинг самарадорлигини янада ошириш бўйича бир қанча тавсиялар бериб ўтилди.

Таъкидланганидек, ёшлар етакчилари ўзлари бириктирилган маҳаллалардаги йигит-қизларнинг ижтимоий фаоллигини ошириш, иқтидори, истеъдоди ва ташаббусларини рағбатлантириш ҳамда ҳаётда ўз ўрнини топишларига кўмаклашадилар. Шунингдек йиғилишда, ёшлар етакчилари ҳуқуқбузарлик содир этишга мойилиги бўлган ёшлар билан тизимли ишлаши, ёшлар орасида маданият ва саънатни тарғиб қилиши, соғлом турмуш тарзи ва спортни оммалаштириши, ёшлар ўртасида тадбиркорлик ғояларини қўллаб-қувватлашлари лозимлиги алоҳида қайд этиб ўтилди.

Туман ҳокимлигининг ахборот хизмати