Туман ҳокими Султонбой Йўлдашев мактаб таълимини ривожлантириш масаласида Халқ таълими бўлими жамоаси билан йиғилиш ўтказди
Президентимиз Шавкат Мирзиёев раислигида 28 январь куни Ўзбекистон Республикаси Халқ таълими тизимини янада ривожлантиришда вазирлик ва маҳаллий ҳокимликларнинг масъулиятини ошириш бўйича 2022 йилда амалга ошириладиган устувор вазифаларга бағишланган видеоселектор йиғилиши бўлиб ўтган эди.
Мазкур йиғилишда мактаб таълимини ривожлантириш бўйича қатор устувор вазифалар белгилаб берилди.
Амударё тумани ҳокими Султонбой Йўлдашев 1 февраль куни туман Халқ таълими бўлими жамоаси билан учрашиб, Президентимиз томонидан белгилаб берилган устувор вазифалар, жумладан, мактабларда таълим сифати ва самарадорлигини ошириш, янги ва қўшимча бинолар қуриш, “маҳорат мактаби”га эга ўқитувчларни рағбатлантириш, “Мобиль методик гуруҳлар” ташкил этилиши каби масалалар бўйича мутасаддилар билан суҳбатлашди.
Бундан ташқари йиғилиш давомида туман ҳокими давлат томонидан ажратиладиган маблағдан ташқари маҳаллий бюджет тушумларининг ҳам бир қисми мактабларга йўналтирилишини, энг муҳими, янги мактаблар маҳалла фаоллари, ота-оналар ва жамоатчилик назорати остида қурилиши ва фойдаланишга топширилиши, шунингдек, 2022 йил мобайнида таълим соҳаси учун маҳаллий бюджет маблағларидан 21,8 млрд. сўм миқдорда маблағ ажратилишини таъкидлади.
Йиғилишда мактаблар фаолиятини янада яхшилаш фақат туман Халқ таълими бўлимининг эмас, балки барча идора-ташкилотлар, зиёлилар, кенг жамоатчиликнинг вазифаси бўлиши кераклиги таъкидланди.
Туман Ҳалқ таълими бўлими мудири Акмал Исмоилов мактаблар аҳволини яхшилаш бўйича 2022 йилда амалга оширилиши белгиланган ишлар хусусида маълумотлар бериб ўтди. Унга кўра, туманимиздаги 18-, 36-, 56-сонли мактаблар биноларини реконструкция қилиш ва капитал таъмирлаш ишлари амалга оширилади.
Бундан ташқари, Намуна маҳалласи ҳудудида жойлашган 78-сонли бошланғич таълим мактабини 9 йиллик мактабга айлантириш ҳамда маҳаллий бюджет ҳисобидан қуввати 60 ўринли янги бино қуриш режалаштирилган.
Шунингдек, йиғилишда Туман халқ таълими бўлими томонидан мактабларнинг бошланғич синфларида соғлом овқатлантиришни ташкил қилиш, битирувчиларнинг олий таълим муассасаларига кириш қўрсаткичларини ва педагог кадрларнинг малака тоифаларни ошириш бўйича 2022 йилда кўплаб тизимли ва самарали ишлар олиб борилиши қайд этиб ўтилди.
Президентимиз раислигида ўтказилган видеоселектор йиғилишида айтиб ўтилган ҳар бир вазифа ижроси бўйича туман хокими томонидан кўрсатмалар берилиб, доимий равишда назоратга олиниши таъкидланди. Бундан буёғига мактаб таълим тизимидаги ҳар қандай масала кенг жамоатчилик муҳокамасига қўйилиши маълум қилинди.
Президентимизнинг “Тақдиримиз муаллимлар қўлида” деб айтган сўзлари – айни ҳақиқат. Ватанимизнинг тараққиёти, фаровонлиги ва иқтисодиётининг гуллаб яшнашида эртанги кун эгалари бўлган ёш авлодни тарбия қилаётган ўқитувчиларнинг хизматлари катта аҳамиятга эга. Шундай экан, мактабларда таълими сифати ва самарадорлигини ошириш доимий равишда жамоатчиликнинг назоратида ва диққат марказида бўлиши лозим.
Амударё тумани ҳокимлигининг ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
