ОТАБЕК – ТУМАНИМИЗ ЁШЛАРИНИНГ ФАХРИ ВА ИФТИХОРИ

Мамлакатимизда ёшлар учун яратилаётган шароит ва имкониятлар кўлами бугун жуда кенг. Бундан фойдаланиб камолга етаётган, мустақил фикрлайдиган, замонавий илм-фан ва касб-ҳунарларни пухта эгаллаган, ўз юрти ва халқига фидойи, аждодларимиз бошлаб берган ишни давом эттиришга қодир бўлган, ҳар томонлама соғлом ва баркамол авлодни асло енгиб бўлмайди. Ўз мақсадларига етишда дадил ва доим янгилик сари интилувчи ёшлар элимизнинг фахри ва ғуруридир.

Амударё туманида ҳам юксак чўққиларни забт этаётган,  ўз  устида тиним билмасдан ишлаётган, ўз оиласи ва Ватани олдидаги бурчини чин юракдан ҳис қилиб, таълим олаётган ёшлар бисёр. Ана шундай илғор фикрли, дунёқараши кенг, маънавиятли, мард ва жасур ўғлонлардан бири Отабек Раҳимбоевни юрт тараққиёти учун интилаётган ёшлардан, десак асло адашмаган бўламиз.

Отабек Раҳимбоев  Амударё туманининг Юқори қишлоқ маҳалласида, зиёли оилада туғилиб, вояга етди. Онаси Зулфия Ёдгорова география фани ўқитувчиси. Ҳам оилада, ҳам мактабдаги юксак маънавий муҳит остида катта бўлган Отабек ҳам  ота-онасининг соҳасини танлади.

2017 йилда Бердақ номидаги Қорақалпоқ давлат университетининг география ва табиий ресурслар факультети гидрометеорология таълим йўналиши талабаси бўлди. Талабалик давриданоқ устозлар эътирофига сазовор бўлиб, 50 дан ортиқ танлов, конференция ва  олимпиадалар  ғолибига айланди.

Изланувчан ва билимга чанқоқ Отабек 2020 йил 26 август куни  Президентимиз томонидан таъсис этилган “Мард ўғлон” давлат мукофоти билан тақдирланди. Ушбу мукофотга сазовор бўлиш ҳаммага ҳам насиб қилавермайди. Улар орасида Отабекнинг ҳам борлиги бизга ўзгача ғурур ва ифтихор бағишлайди.

Жорий йил 10 январь куни Отабек муҳандислик геологияси фанидан Бутунроссия талабалар ва магистрантлар ўртасида ўтказилган онлайн олимпиадада қатнашиб, фахрли биринчи ўринни эгаллади.

Юртимизда ёшларнинг билим олишлари, касб-ҳунар эгаллашлари учун барча шарт-шароит ва имкониятлар яратилган. Ёшлардан эса фақатгина яратилган имкониятлардан фойдаланиш талаб қилинади, холос.

Ҳозирги кунда Отабек Ислом Каримов номидаги Тошкент давлат техника университети Геология-қидирув ва кон металлургия факультети гидрогеология ва муҳандислик геологияси ва геофизикаси кафедраси 1-босқич магистранти. Илмий салоҳияти ва эришган ютуқлари туфайли  магистратурага имтиёзли равишда қабул қилинган.

У ҳозирда илмий раҳбари Мираббос Зокиров раҳбарлигида “Оролбўйи ҳудудларининг антропоген омиллар таъсири остида муҳандислик геологик шароитларнинг ўзгаришини ўрганиш” мавзусида илмий тадқиқот ишларини олиб бормоқда.

Туманимизнинг интилувчан, билимга чанқоқ, изланувчан ўғлонига келгуси ўқиш ва ишларида муваффақиятлар тилаб, бунданда баланд марраларни забт этишига умид қилиб қоламиз.

Ф.Эшимбетова.