НУРОНИЙЛАР УЧУН ТАДБИР ЎТКАЗИЛДИ

Мамлакатимизда ҳеч бир соҳа вакили эътибордан четда қолаётгани йўқ. Бунинг исботини эса янгидан қабул қилинаётган қонун ва қарорлардан яққол кўришимиз мумкин.

2017 йил августда қабул қилинган Қонунга мувофиқ декабрь ойининг иккинчи якшанбаси “Ўзбекистон Республикаси қишлоқ хўжалиги ходимлари куни” қилиб белгиланди. Шунингдек, қишлоқ хўжалиги ходимларининг жамоа-шартномавий ҳужжатларда меҳнат хавфсизлиги даражасини кўтариш, иш ўринларида санитар-гигиеник вазиятни яхшилаш, ходимларни якка тартибдаги ва жамоавий ҳимоя воситалари, санитар-маиший хоналар билан таъминлаш, меҳнат муҳофазаси қоидаларига риоя этиш масалаларига алоҳида эътибор қаратилмоқда.

Ҳа, ҳалол, машаққатли меҳнатлари эвазига халқимизнинг ризқини бутун, дастурхонини тўкин қилаётган қишлоқ хўжалиги ходимлари ҳар қанча эъзоз-эътирофга сазовордир.

Шуни таъкидлаш жоизки, орамизда туманимиз қишлоқ хўжалиги ривожига муносиб ҳисса қўшган, бугунги кунда ўзларининг деҳқончиликдаги тажрибаларини ёшларга ўргатиб соҳа сир-асрорларидан сабоқ бериб келаётган нуронийлар талай.

Янги йил байрами муносабати билан туман Маҳалла ва оилани қўллаб-қувватлаш бўлимида ана шундай табаррук инсонлар учун байрам тадбири ташкил этилди.

Тадбир бошланишидан олдин нуронийлар Маҳалла ва оилани қўллаб-қувватлаш бўлими ҳузурида ташкил этилган “Нуронийлар” маскани, нуронийлар кутубхонаси, маънавият хонаси ва тренажер зали билан танишиб, бу ерда улар учун яратилган шарт-шароитлар ва эътибордан мамнун бўлдилар, тренажер залида ўрнатилган спорт анжомларида жисмоний машқлар бажариб, таналарини чиниқтирдилар.

Тадбирда туман ҳокимининг қишлоқ ва сув хўжалиги масалалари бўйича ўринбосари Ислом Маткаримов, Маҳалла ва оилани қўллаб-қувватлаш бўлими бошлиғи ўринбосари Баҳодир Балтабаев, Фермер, дехқон хўжаликлари ва томорқа ер эгалари Кенгаши раиси Илҳом Полвоновлар нуронийларни байрам муносабати билан табрикладилар.

Амударё туманида истиқомат қилувчи, қишлоқ хўжалиги соҳасига муносиб ҳисса қўшган 12 нафар нуронийларга “Нуроний” жамғармаси Республика Бошқаруви раиси, Маҳалла ва оилани қўллаб-қувватлаш вазири ўринбосари, Ўзбекистон Қаҳрамони, Сенат аъзоси Содиқжон Турдиевнинг байрам табрикномаси ва эсдалик совғалари тақдим қилинди. Шундан сўнг, нуронийлар байрам муносабати билан ташкил қилинган “Дийдор ширин” байрам дастурхонига таклиф қилинди ва бир пиёла чой устида биргаликда суҳбат қурдилар.

Тадбир якунида нуронийлар ўзларига кўрсатилаётан ҳурмат ва эътибордан мамнун бўлиб, ташкилотчиларга рахмат айтдилар ва дуо қилдилар.

Аслида бировнинг кўнглини кўтариш, унинг эртаги кунга ишончини мустаҳкамлаш учун дунёлар шарт эмас, озгина меҳр-эътибор кифоя. Буни қишлоқ хўжалиги соҳасида фидойи меҳнат қилган нуронийлар учун ташкиллаштирилган тадбир мисолида ҳам яққол кўриш мумкин эди.

Ойгул РАЖАБОВА.