Прокуратура органлари ходимлари куни олдидан тарғибот тадбирлари ўтказилди

Пракуратура органлари вазирликлар, давлат қўмиталари, идоралар, фуқароларнинг ўзини ўзи бошқариш органлари, жамоат бирлашмалари, корхоналар, муассасалар, ташкилотлар, ҳокимлар ва бошқа мансабдор шахслар томонидан қонунларнинг ижро этилиши устидан назорат қилувчи орган ҳисобланади. Прокуратура органлари томонидан жамиятда қонунийликни мустаҳкамлаш, қонун устуворлигини таъминлаш, жиноят ва ҳуқуқбузарликларнинг олдини олиш, умуман, барча йўналишларда салмоқли ишлар қилинмоқда ва муҳим натижаларга эришилмоқда.

Мамлакатимизда ушбу орган фаолиятини ташкил этиш, қўллаб-қувватлашга доир бир қанча ҳуқуқий-меъёрий ҳужжатлар қабул қилинган.  Хусусан, 1992 йил 8 январда Ўзбекистон Республикаси Президентининг “Ўзбекистон Республикаси прокуратура органлари тўғрисида”ги фармони қабул қилинди. Ушбу сана прокуратура органларида хизмат қиладиган барча ходимлар, жумладан, фахрийлар қалбидаги орзу-умидлар рўёбга чиққан санадир. 2016 йилдан буён 8 январь прокуратура органларининг касб байрами сифатида кенг нишонланиб келмоқда.

Шу муносабат билан айни кунларда Республикамизнинг барча ҳудудларида  прокуратура органлари томонидан  байрамолди  тарғибот тадбирлари, иншолар танловлари, конференциялар ўтказилмоқда.

Шундай тадбирлардан бири 23 декабрь куни Амударё туманидаги 9-сонли Болалар мусиқа ва санъат мактабида ҳам бўлиб ўтди. Тадбирда Амударё тумани прокурори Жавлонбек Муфтуллаев, туман ҳокимининг Ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Маҳмуд Шерметов, Маҳалла ва оилани қўллаб-қувватлаш бўлими бошлиғи Алишер Йўлдашев, Халқ таълими бўлими мудири Акмал Исмоилов, Ёшлар ишлари агентлиги Амударё туман бўлими бошлиғи Жасур Давлетов ҳамда муассаса раҳбарлари, тегишли ташкилот масъуллари, умумтаълим мактаби ўқувчилари қатнашдилар.

Тадбир аввалида Амударё тумани прокурори Муфтуллаев Жавлонбек сўзга чиқиб,  мамлакатимизда сўнгги йилларда амалга оширилаётган ишлар натижасида прокуратура ислоҳ қилиниб, жазоловчи орган эмас, балки том маънода инсон ҳуқуқ ва эркинликлари ҳимоясини таъминловчи идорага айланганини, бутун фаолият тизимли муаммо ва камчиликларни аниқлаб бартараф этишга йўналтирилаётганлигини, прокуратура органлари ходимлари халқ билан бевосита мулоқот қилиб, уларнинг муаммоларини жойида ҳал этишаётганлигини таъкидлаб ўтди. Бу борадаги ишлар айниқса, прокурорларнинг ўзлари бириктирилган секторлардаги фаолиятларида янада яққол намоён бўлаётир.

Шунингдек, сектор раҳбарлари ҳам сўзга чиқиб, прокуратура ходимлари томонидан туманда қонун устуворлигини  таъминлаш, адолатни қарор топтириш борасида қилинаётган ишлар алоҳида эътирофга сазорорлигини ва бу борада тинимсиз меҳнат қилаётган ходимларнинг ўрни катта эканлигини алоҳида таъкидлади.

Тадбирда келгусида ҳуқуқни муҳофаза қилувчи органларда ишлашни ният қилган ўқувчиларга тавсиялар берилди.

Шундан сўнг, тумандаги кам таъминлаган оилаларнинг 50 нафар болаларига прокуратура томонидан Янги  йил совғалари топширилди.

Тадбир якунида мутассадди ташкилот раҳбарлари ҳамда иштирокчилар прокуратура органлари ходимларини касб байрами билан табриклаб, олийжаноб халқимизнинг ҳақиқий ҳимоячиси, адолат ва қонунийлик посбони бўлиб, халқ манфаати йўлида сидқидилдан хизмат қилишларида мувафаққиятлар  тиладилар.

Фотима Эшимбетова