ОЛИЙ МАЖЛИС ҚОНУНЧИЛИК ПАЛАТАСИ ДЕПУТАТЛАРИ ТУМАНИМИЗНИНГ ЯШИЛ ҲУДУДИ КЕНГАЙИШИГА ҲИССА ҚЎШДИЛАР

Мамлакатимизда Президентимиз томонидан илгари сурилган “Яшил макон” умуммилий лойиҳаси доирасида кўчат экиш зарбдор 40 кунлиги давом этмоқда. Кўчалар, яшил майдонларга, корхона-ташкилотлар, ўқув муассасалари атрофларига, ариқлар бўйларига мевали ва манзарали дарахтлар, буталар кўчатларини экиш, чор-атрофда ҳаво мусаффолигини таъминлайдиган кўкаламзорлар барпо этиш ишлари олиб борилмоқда.

Туманимизда ҳам бу умуммиллий ҳаракати туфайли дарахт кўчатлари экиш ишларига улкан эътибор қаратилмоқда.

Шу йилнинг 30 ноябрь куни Ўзбекистон Республикаси Олий Мажлис Қонунчилик палатаси депутатлари Зумрад Бекатова, Руслан Жумамуродовлар туманимизга ташриф буюрдилар ва Манғит шаҳрининг “Олмазор” маҳалласи Баркамол авлод кўчаси бўйидаги “Яшил ҳудуд” учун ажратилган майдонга мевали, манзарали дарахтлар, кўпйиллик буталар кўчатларини ўтқазишди. Улар билан бирга туман ҳокими Султонбой Йўлдошев, Халқ  депутатлари туман Кенгаши депутатлари ҳамда кенг жамоатчилик бу ҳаракатда фаол иштирок этдилар.

Маълумки, Олий Мажлис Қонунчилик палатаси депутатлари жорий йилнинг 26 ноябридан 1 декабрга қадар ҳудудлардаги ижтимоий-иқтисодий аҳвол, фуқароларнинг турмуш шароитларини ўрганиш, жойларда мавжуд муаммоларни аниқлаш ва кечиктирмасдан ҳал этиш мақсадида жойларда бўлиб, фуқаролар билан жонли мулоқотлар ташкил қилиши режалаштирилган эди.

Мазкур режа асосида Зумрад Бекатова ва Руслан Жумамуродовлар Қиличбой овулида жойлашган, Зумрад Бекатова таълим олган 15-сонли мактабга ташриф буюрдилар. Уларни мактаб ўқитувчилар жамоаси ва ўқувчилар мусиқа садолари остида нон-туз билан шодон қарши олдилар.

Мактаб ўқувчилари масъуллар ташрифидан миннатдорлигини шеърлар, қўшиқлар билан ифода этдилар. Зумрад Бекатова ва Руслан Жумамуродовлар ўзларига билдирилган ҳурмат-эҳтиром учун миннатдорчилик билдириб, ҳозирги кунда ўқувчи-ёшларнинг билим олишлари ва интиллектуал салоҳиятини ривожлантиришлари учун улкан имкониятлар яратилаётганлиги, ёшлар бундан унумли  фойдаланишлари лозимлигини таъкидладилар, мактаб кутубхонаси аҳволи билан қизиқиб, ўқувчиларни кўпроқ китоб ўқишга чорладилар.

Самимий, очиқ мулоқот тарзида ўтган учрашувда 15-сонли мактаб ўқитувчиси Гўзал Бекмуродова мактабда вариатив синф ташкил этганлигини, бироқ синфга Бешовул, Юқори қишлоқ маҳаллаларидан ўқувчиларнинг  қатнаши қийин бўлаётганини, бу муаммони ҳал этиш учун ушбу ҳудудларга йўналишли транспорт қатновини йўлга қўйишда ёрдам сўради.

Шунингдек, Қиличбой овули кўчаларига, хусусан, мактаб атрофига тунги чироқлар ўрнатиш лозимлиги таъкидланди.

Депутат ўқитувчининг ва бошқа фуқароларнинг мурожаатларини ҳал қилишга амалий ёрдам беришга ваъда берди.

Овул аҳолиси ўзларининг ҳаётидаги муаммоларни ўрганиш учун ташриф буюргани учун Олий Мажлис Қонунчилик палатаси депутати, шу овулда ўсиб, вояга етган Зумрад Бекатовага чуқур миннатдорлик билдирди.

Ойгул РАЖАБОВА.