ОЙБЕК НОМЛИ МАҲАЛЛАДА ФҲДЁ МАСЪУЛЛАРИНИНГ САЙЁР УЧРАШУВИ ЎТКАЗИЛДИ

Мамлакатимиздаги Фуқаролик ҳолатларини қайд этиш бўлимлари фаолиятида экстерриториал тамойилнинг жорий этилиши муносабати билан фуқароларга ва юридик шахсларга доимий  яшаш жойидан, жойлашган еридан қатъий назар, исталган ҳудудда мурожаат қилиш имконияти яратилди. Мазкур тизим аҳолига кўрсатиладиган хизматларнинг сифат жиҳатидан яхшиланишини ва осонлашишини таъминламоқда.

Амударё туманидан ҳам Фуқаролик ҳолатларини қайд этиш бўлими томонидан бу борадаги ишлар самарали йўлга қўйилган. Бўлим томонидан ҳудудларга борган ҳолда аҳоли билан учрашувлар ўтказилиб, мазкур тамойил асосида фуқароларга ҳужжатлаштириш ишларида кўмак берилмоқда.

1 октябрь куни Ойбек номли маҳаллада ҳам сайёр учрашув ўтказилиб, тизим фаолиятини такомиллаштириш борасида амалга оширилаётган чора-тадбирлар ҳақида маълумот берилди. Учрашувга ташриф буюрган фуқароларга шу йилнинг 1 июнидан эьтиборан фуқароларнинг доимий рўйхатдан ўтган жойидан қатъий назар фуқаролик ҳолати далолатномаларини қайд этиш, никоҳланувчи шахсларни тиббий кўрикдан ўтказиш ва хорижга чиқиш биометрик паспортини расмийлаштириш экстерриториал тамойил асосида амалга оширилаётгани айтиб ўтилди. Шунингдек, нотариал хизматларни амалга ошириш жараёнида ҳам фуқаролик ҳолати далолатнома ёзувлари билан боғлиқ барча маълумотлар нотариал идоралари томонидан давлат хизматлари агентлиги ёхуд Фуқаролик ҳолати далолатномаларини қайд этиш органларига мурожаат қилмасдан мустақил равишда, фуқаролардан ортиқча маълумот талаб этмасдан, “ФҲДЁнинг ягона электрон архиви” ахборот тизими орқали олинаётгани маълум қилинди.

Таъкидланганидек, Президентимизнинг 2018 йилдаги “Фуқаролик ҳолати далолатномаларини қайд этиш тизимини янада такомиллаштириш чора-тадбирлари тўғрисида”ги Қарорига асосан туман ҳудудида қонуний никоҳдан вақтида ўтмасдан яшаётган фуқаролар, вақтида фарзандларига туғилганлик ҳамда яқинларининг ўлими  ҳақида гувоҳномаларини ҳужжатлаштирмаган эътиборсиз, бепарво оилалар билан учрашувлар ўтказилиб, тушунтиришлар берилган. Ўтган давр мобайнида жами  9 та туғилганлик ҳақидаги, 6 та ўлим ҳақидаги, ўз вақтида қайд қилинмаган 101 та оиланинг никоҳ гувоҳномалари расмийлаштирилган.

Ҳозирги кунда муддатида қайд қилинмасдан қолган фуқаролик ҳолати далолатномаларини ўз вақтида қайд қилишда давлатимиз томонидан кўпгина имкониятлар яратиб келинмоқда. Экстерриториал тамойил асосида фуқароларнинг доимий ва вақтинча рўйхатдан ўтган жойидан қатъий назар фуқаролик ҳолати далолатномаларини қайд этиш, никоҳланувчи шахсларни тиббий кўрикдан ўтказиш ва хорижга чиқиш биометрик паспортини расмийлаштириш амалга оширилмоқда. Туманимизда бошқа ҳудудлардан келган 8 та ҳужжат экстерриториал тартибда жўнатилди ҳамда 7 та ҳужжат туман Фуқаролик ҳолатларини қайд этиш бўлими томонидан фуқароларга бошқа вилоятлардан олиб берилди. Бунинг натижасида фуқароларимизнинг оғири енгил бўлиб, ортиқча оворагарчиликларининг олди олинмоқда.  

Учрашув давомида маҳалла фуқароси Муродбой Саидовга 1990 йилда вафот этган, ўлими айрим сабабларга кўра  қайд қилинмасдан қолган  бувиси Айим Карабаеванинг ўлими тегишли ҳужжатлар асосида расмийлаштирилди ва гувоҳнома тегишли шахсга топширилди.

Бўлим масъуллари маҳалла фуқаролари томонидан берилган саволларга батафсил жавоблар бериб, ҳужжатларни расмийлаштириш тартибини тушунтиришди. Маҳалла фуқаролар йиғини масъуллари ва фаоллари ҳуқуқий билимларини бойитиб, тушунчаларини кенгайтиришда кўмак берган бўлим ходимларига миннатдорчилик билдиришди.

М.Эшмурадова, туман ФҲДЁ бўлими инспектори.