“Тараққиёт кўзгуси” – халқ минбари

"Ўз қутлуғ тарихи, қадри, ҳаёт тарзи ва дунёқараши қандай кечаётганлигини, ҳозирги даврнинг ёрқин қирраларини англашни истаган ҳар бир инсон газеталаримиз тахламлари саҳифасини варақласин, шундагина бир бутун ҳаёт тарзининг бой хазинасидан баҳраманд бўлишига, ўзининг кимлигини чуқурроқ англаб олишига аминман”, - деб ёзган эди фахрий журналист, фалсафа фанлари номзоди Турсунбой Давлатбоев.

Ҳа, бу йил 80 йиллиги нишонлашга қизғин ҳозирлик кўрилаётган туманимиз матбуоти қаерда, қандай номда нашр этилишидан қатъий назар, ҳамиша халқ минбари бўлиб келди, халқ хоҳиш-иродасининг ифодачиси, туманимиз ижтимоий-иқтисодий ва маданий юксалиш босқичларини тарихга муҳрлаган солнома, кишиларни янги кунга умид билан қараб, эзгу мақсадлар йўлида меҳнат қилишга чорлагувчи куч бўлиб келди.

Айни кунда ҳам газета ҳар бир фуқарони ўтмишдан тегишли хулоса чиқариб, бугунги ҳаёт тарзини тўғри белгилай олиши, олдин ким эдиг-у бугун ким бўлганимизни чуқур мушоҳада этиб, истиқлол берган имкониятлардан баҳраманд бўлишга, бунёдкор халқимизни ҳеч кимдан кам бўлмай, она Ватанимизни ривожланган давлатга айлантириш йўлида фидойи меҳнат қилишга ундаётгани билан ҳам қадрлидир.

Шуни алоҳида таъкидлаш жоизки, айрим туман газеталари ойда, икки ойда бир марта 400-500 нусха атрофида чоп этилаётган бир вақтда "Тараққиёт кўзгуси” газетаси ҳар ойда 4 марта, 5000 дан зиёд нусхада чоп этилаётгани ва туманимизнинг барча ҳудудларини қамраб олаётгани билан ҳам диққатга сазовордир. "Тараққиёт кўзгуси”нинг иловаси "Менинг оилам” газетаси ва www.amunews.uz веб сайти эса туманимиз аҳолисини тезкор ва холис ахборот билан таъминлашга ҳисса қўшмоқда.

Шуларни ҳисобга олиб, шу йилнинг 7 июлида туман ҳокимининг мамлакатимиз мустақиллигининг 23 йиллигига ҳамоҳанг тарзда "Мустақилликни мустаҳкамлаш ва миллий истиқлол ғояларини тарғиб қилишда "Тараққиёт кўзгуси” газетасининг ўрни ва аҳамияти” мавзусида тарғибот ойлигини ўтказиш тўғрисида”ги қарори қабул қилинди.

Қарор билан тузилган Ташкилий қўмитага тарғибот ойлиги доирасидаги чора-тадбирларнинг юксак савияда ўтказилишини таъминлаш, тумандаги барча корхона-ташкилотлар раҳбарлари, фуқаролар йиғинлари раисларига ўз меҳнат жамоаларида режага мувофиқ ижодий кечалар, адабий-бадиий учрашувларни ташкил этишга амалий ёрдам бериш вазифаси топширилди.

Таҳририят ижодий жамоаси туманимиз раҳбариятининг матбуотга, матбуот ходимларининг заҳматли меҳнатларига эътибори ва эътирофидан миннатдор бўлиб, янги-янги ижодий парвозларга шайланмоқда.

Азиз газетхон!

Сиз ҳам бизнинг ишимизга бефарқ бўлмасангиз, бизни қўллаб-қувватласангиз тарғибот ойлигида фаол иштирок этинг, туман матбуотида ўз сўзингиз, фикр мулоҳазаларингиз, ижодий ишларингиз билан фаол қатнашинг. Зеро, бизнинг газетамиз, халқ минбаридир.

"Тараққиёт кўзгуси” газетаси таҳририяти.