ТУМАН ДАВЛАТ АРХИВИДА МИЛЛИЙ АРХИВ ФОНДИГА ДОИР ҲУЖЖАТЛАР ТЎПЛАНМОҚДА

Мамлакатимизда давлатимиз томонидан яратиб берилган имкониятлар ва шароитлар натижасида архив ҳужжатларини қамраб олиш имконияти кенгайтирилиб, давлат архивларида сақланаётган ҳужжатларнинг сони ортмоқда. Тизимнинг моддий-техник базаси ҳам босқичма-босқич ривожлантирилмоқда. Давлат архивлари барча шароитлар билан таъминланиб, интернет тармоғи мавжуд замонавий компьютер техникалари билан жиҳозланмоқда.

Бугунги кунда «Ўзархив» агентлиги тизимида ҳужжат айирбошлаш электрон ҳужжат айланиши тизими орқали юритилиб, сақланаётган ахборот ресурслари бўйича электрон базаларни яратиш, ҳужжатларини рақамлаштириш ишлари амалга оширилмоқда.

Амударё тумани Давлат архивида ҳам аҳолининг моддий ва маънавий ҳаётини акс эттирган, тарихий-илмий ва маданий аҳамиятга эга бўлган миллий архив фонди ҳужжатларини тўплаш ишларига алоҳида эътибор қаратилиб, бойитиб борилмоқда. Архив фондида 2006 йилдан 2021 йилнинг ҳозирги даврига қадар совет ва мустақиллик даврларига тегишли 220 та фонд ва уларда миллий архив фонди таркибга кирувчи доимий сақланадиган 20 мин 417 та ҳужжатлар, шахсий таркибга оид 14 минг 606 та, жами 35 минг 23  ҳужжатлар сақланмоқда.

Мазкур йилда режа доирасида миллий архив фондидаги ҳужжатларнинг сақловини таъминлаш бўйича 60 та ҳужжатларда таъмирлаш, 75 та ҳужжатларда муқовалаш ва тикиш ишлари олиб борилди. Архив иши, давлат сақловидаги архив ҳужжатларини сақланиш ҳолати, архив муассасаларида замонавий ахборот-комуникация технологияларини жорий қилиш, моддий-техника базасини яхшилаш бўйича 2021 йилнинг ўтган даврида битта замонавий компьютер, бир дона қоғоз шаклидаги ҳужжатларни рақамлаштириб, электрон ҳужжатга айлантирувчи ускуна харид қилинди. Ушбу технологиялар ёрдамида 2021 йилнинг шу даврига қадар миллий архив фонди ҳужжатларидан 10 минг 500 та кадр электрон нусха яратилди.

Миллий архив фонди ҳужжатларининг давлат ҳисоби илмий маълумотлар аппаратини ташкил этиш ва ривожлантириш, фондлар ва ҳужжатларни қабул қилиш бўйича 2021 йилнинг ўтган даври давомида  доимий ва шахсий таркибга оид 7 фондга 1232 та ҳужжат қабул қилинди. Давлат архивида сақланаётган ҳужжатларнинг мавжудлигини ва хатловини ташкил қилиш бўйича 2021 йилнинг ўтган даври давомида 700 дан ортиқ ҳужжатларнинг мавжудлиги текширилди.

Ундан ташқари, шу пайтга қадар туман Давлат архивида сақланаётган ҳужжатлар доираси фуқароларнинг ижтимоий ҳуқуқий ва мавзули сўровларидан жами 2081 та мурожатлар келиб тушди. Шулардан 2056 та мурожаат кўриб чиқилди ва барчасига ижобий жавоблар берилди, тушунтириш ишлари олиб борилди. Мурожаатлар таҳлил қилинганида, мавзули сўровлардан жами 564 та тушганлиги аниқланди ва барчасига тегишли жавоблар қайтарилди.

Амударё тумани Давлат архиви ҳисобига 2021 йилнинг шу кунига  қадар пуллик кўрсатиладиган  хизматлар бўйича ҳужжатларни тартибга келтириш, архив соҳасига оид норматив ҳужжатларни тайёрлаш, ҳужжатларни депозитар сақловга қабул қилиш, мавзули сўровлар ва бошқа йўналишлар бўйича 75 млн. сўм маблағ киритилди. Ушбу маблағлар соҳанинг асосий йўналишларига сарф қилиниб келинмоқда.

Архивларда ўтган даврга тегишли бўлган ижтимоий-сиёсий ва шахсий таркибга оид ҳужжатлар сақланади. Ушбу ҳужжатлар, айниқса, узоқ йиллардан бери сақланаётганлари намлик ва ҳарорат узлуксиз назоратда бўлган шинам хоналарда сақланиши керак. Шу боис, туман Давлат архиви замонавий ва барча имкониятларга эга бўлган бинода жойлаштирилган. Етарлича шароитда хизмат қилаётган туман Давлат архивининг келгуси йилги режаларига архивда сақланётган ҳужжатларни мобиль стеллажлар билан таъминлаш, кадрлар малакасини ошириш, барча ҳужжатларнинг электрон тарзидаги нусхаларини яратиб бориш кабилар киритилган.

Б. Жуманиёзов, туман Давлат архиви директори.