Гулзор маҳалласи ҳудудида 27 млрд сўмлик 5 та кўп қаватли уй-жойлар қурилмоқда

Бугунги кунда туманимизда катта қурилиш ҳамда бунёдкорлик ишлари амалга оширилиб, туманимиз шаҳар-у қишлоқлари, кўчалари кўркига кўрк қўшилмоқда ҳамда улар замонавий қиёфа касб этмоқда. Инсонларнинг турмуш тарзини яхшилаш борасидаги бунёдкорлик ва ободонлаштириш ишлари киши кўзини қувонтиради.

Маълумот тариқасида келтириш жоизки, туман ҳудудида 2021 йилда жами 112 та объектда лойиҳа қиймати 87 млрд 591,4 млн сўмлик қурилиш-таъмирлаш ишлари олиб борилиши режалаштирилган бўлиб, бугунги кунда барча объектларнинг тендер савдолари ўтказилиб, қурилиш-таъмирлаш ишлари олиб борилмоқда.

Хусусан, аҳолини уй-жой билан таъминлаш борасида Гулзор маҳалласи ҳудудида қиймати 27 млрд 260 млн. сўмлик жами 5 та 5 қаватли, ҳар бири 30 хонадонга мўлжалланган кўп қаватли уй-жойлар қурилмоқда. Шундан 3 таси “Қишлоқ қурилиш инвест” инжиниринг компанияси буюртмачилигида, 2 таси тадбиркорлар ҳисобидан жами 150 хонадонга мўлжалланган уй-жойларни қуриш бўйича пудратчи ташкилотлар томонидан фундамент ишлари олиб борилмоқда.

“Амударё махсус-қурилиш” масъулияти чекланган жамияти туманимизда қурилиш ишларини жадал суръатларда амалга оширишда энг илғор пудратчи ташкилотлардан бири ҳисобланади. Мазкур пуратчи ташкилот 2009 йилда ташкил этилган бўлиб, ташкилот томонидан ҳозирги кунга қадар қатор йирик қурилиш ишлари амалга оширилган. Жамиятда ҳозирда 46 нафар доимий ишчилар фаолият олиб бормоқда. Шундан 7 нафар ҳайдовчи, 3 нафар электро-пайвандчи, 2 нафар сантехник, шунингдек, омбор мудири, ҳисобчи, муҳандис, механик, уста қурувчилар каби ишчилар қурилиш ва бунёдкорлик ишларида қатнашиб келмоқдалар.

Айни пайтда пудратчи ташкилот томонидан Бўстон маҳалласи Қипчоқ кўчасидаги замонавий кўп қаватли турар жой биносининг қурилиш ишлари қизғин паллага кирган. Лойиҳа смета қиймати 7 млрд 859 млн сўм бўлган мазкур қурилиш обьектида ғишт териш ишлари якунланиб, том қисми ёпилган, яна бир қанотда ғишт териш ишлари жадал суръатларда олиб борилмоқда. 5 қаватли 48 хонадонга мўлжалланган бинонинг 1-қаватида 12 та дўконлар ташкил этилиши режалаштирилган.

Ҳозирда 15 нафар ёлланма ишчилар қурилиш ишларини ўз вақтида якунлаш учун тинимсиз меҳнат қилмоқдалар. Кўп қаватли турар жой биносининг қурилиш ишлари 2022 йилнинг март ойларида якунланиши ҳамда бинони Наврўз байрами арафасида фойдаланишга топширилиши режалаштирилмоқда.

Шунингдек, “Амударё махсус-қурилиш” масъулияти чекланган жамияти томонидан Гулзор маҳалласида янги тартибдаги 5 қаватга мўлжалланган кўп хонали турар жой биносининг қурилиш ишлари ҳам амалга оширилмоқда. Лойиҳа смета қиймати 5 млрд 557 млн сўм бўлиб, шундан 2 млрд. 200 млн сўм кредит маблағи ҳисобидан, қолган қисми тадбиркорнинг ўз маблағи ҳисобидан амалга оширилмоқда.

Айни пайтда 30 хонадонга мўлжалланган ушбу кўп хонали уй-жой биносининг 1-қаватида ғишт териш ишлари олиб борилмоқда. Қурилиш ишларига жами 22 нафар ғишт терувчи усталар жалб қилинган. Қурувчилар учун барча зарур шароитлар яратилган бўлиб, уста-қурувчиларга 2 маҳал иссиқ овқат берилади. Мазкур кўп хонали турар-жой биноси 2022 йилнинг апрель ойларида қурилиши якунланиб, фойдаланишга топширилиши режалаштирилмоқда.

Айтиш керакки, бу каби қурилиш ва бунёдкорлик ишлари натижасида аҳоли турмуш тарзи, яшаш шароитлари тобора яхшиланиб, инсонларнинг уй-жой билан боғлиқ бўлган муаммолари бартараф қилинишига хизмат қилади.

Туман ҳокимлигининг Ахборот хизмати.