ХИТОЙ ОВУЛИДА ДАВЛАТ ХИЗМАТЛАРИ МАРКАЗИНИНГ ФИЛИАЛИ ИШ БОШЛАДИ

Хитой овулидаги фуқаролар йиғини маъмурий биноси қайта таъмирланиб, фойдаланишга топширилди. Ушбу бинода Давлат хизматлари маркази филиали ҳам ташкил этилди.

Шу муносабат билан бўлиб ўтган тадбирда Давлат хизматлари агентлигининг Қорақалпоғистон Республикаси бошқармаси бошлиғи М.Абдижалиев ҳамда туман ҳокими С.Йўлдашев сўзга чиқиб, мамлакатимизда амалга оширилаётган ислоҳотлар хусусида сўз юритдилар.

Шунингдек, туман фаоллари номидан Т.Абдуллаев нутқ сўзлаб, бу каби бунёдкорлик ишлари юртимизнинг янада тараққий этишида муҳим аҳамият касб этиши хусусида тўхталди.

Мамлакатимиздаги давлат хизматлари марказлари томонидан олис ҳудудларга чиқиб, сайёр давлат хизматларини кўрсатиш амалиёти йўлга қўйилган бўлиб, туман Давлат хизматлари маркази жорий йилнинг шу даврига қадар 3 мингга яқин давлат хизматларини сайёр тартибда амалга оширган.

Давлатимиз раҳбарининг “Давлат хизматлари кўрсатиш миллий тизимини жадал ривожлантириш бўйича қўшимча чора-тадбирлар тўғрисида”ги Фармонига кўра, шаҳарчалар, қишлоқлар ва овуллардаги маҳаллаларда Давлат хизматлари марказлари филиалларини босқичма-босқич ташкил этиш белгилаб берилди.

Мазкур ҳужжат асосида туман марказидан 22 км. олисда жойлашган Хитой овулида ҳам Давлат хизматлари маркази филиалининг ташкил қилиниши ҳудудда истиқомат қилувчи аҳолининг узоғини яқин, оғирини енгил, вақтини ҳамда моддий харажатларини тежаш имконини беради.

Тадбирда сўзга чиққанлар Хитой овулида ташкил этилган Давлат хизматлари маркази филиалининг самарали фаолият юритишида муваффақият тиладилар.

Ҳашар – элга ярашар

Туманимизда умумхалқ Хайрия ҳашари уюшқоқлик билан ЎТКАЗИЛДИ

Жорий йилнинг 21 август санасида мамлакатимизда умумхалқ ободонлаштириш хайрия ҳашари ўтказилиб, юртимиз бўйлаб барча ҳудудларда ободонлаштириш ва тозалаш ишлари амалга оширилди.

“Янги Ўзбекистонда эркин ва фаровон яшайлик!” шиори остида ўтказилган хайрия ҳашарида аҳолининг барча қатламлари иштирок этиб, юртимиз ободлиги ва фаровонлигига ўз ҳиссаларини қўшдилар.

Туманда “Маҳаллаларни ободонлаштириш” ойлигида самарали ишлар ташкил қилиниб, ободонлаштириш хайрия ҳашари доирасида маҳаллалар, аҳоли яшаш хонадонлари, кўп қаватли уйлар атрофлари, гузар ва хиёбонлар, зиёратгоҳ ва қабристонлар, болалар майдончаларида кенг кўламли ободонлаштириш  ва кўкаламзорлаштириш ишлари олиб борилди.

Шунингдек, ҳашар иштирокчилари томонидан туманимиздаги ёрдамга муҳтож, боқувчисини йўқотган оилалар, ёлғиз яшовчи ҳамда ногиронлиги бўлган фуқаролар, кексалар ҳолидан хабар олиниб, уларнинг яшаш шароитлари яхшиланиб, уй-жойларини таъмирлашга кўмаклашилди. Маҳалла фаоллари бошчилигида эҳтиёжманд кишиларнинг таъмирталаб ҳолга келиб қолган уй-жойларини таъмирлаш ишлари олиб борилди, уйлари оҳаклаб берилди.

Улуғ айём кунлари арафасида амалга оширилган бу каби хайрли ишлар халқимизнинг энг эзгу анъаналаридан бирига айланган. Кўнгли ўксик ҳамюртларимиз бу каби эътибор ва ғамхўрликдан ғоят хурсанд бўлдилар ҳамда масъулларга миннатдорчилик билдирдилар.

Туман ҳокимлигининг Ахборот хизмати.