ХОТИРА ХИЁБОНИДА “ЯНГИ ЎЗБЕКИСТОННИ БИРГАЛИКДА ҚУРАМИЗ” ШИОРИ ОСТИДА КАТТА ТАДБИР ЎТКАЗИЛДИ

Юртимизда Ватанимиз мустақиллигининг 30 йиллик байрамини муносиб нишонлаш учун қизғин тайёргарлик кўрилмоқда. Байрам арафасида халқимизга кўтаринки кайфият, байрамона руҳ бағишлаш мақсадида барча ҳудудларда турли тадбирлар ташкил этилмоқда. Тадбиркорлар ва ишбилармонлар ҳаракати – Ўзбекистон Либерал-демократик партияси томонидан ҳам республикамизнинг барча ҳудудларида мустақиллигимизнинг ўттиз йиллиги ҳамда партия ғоялари тарғиботига бағишланган “Янги Ўзбекистонда эркин ва фаровон яшайлик” шиори остида оммавий тадбирлар ўтказиб келинмоқда.
Амударё туманидаги Хотира хиёбонида ҳам “Янги Ўзбекистонни биргаликда қурамиз” шиори остида катта тадбир ўтказилди.
20 август куни Ўзбекистон Либерал-демократик партияси туман Кенгаши томонидан таниқли санъаткорларни жалб қилган ҳолда аҳолига байрамона кайфият улашиш, O‘zLiDeP ғоя ва мақсадларини аҳоли кенг қатлами онгига сингдириш мақсадида ташкил этилган ушбу тадбирда Ўзбекистон Олий Мажлиси Қонунчилик палатаси депутати Мухтор Ибрагимов, O‘zLiDeP Қорақалпоғистон Республикаси Кенгаши аппарат раҳбари Шараф Ўтемисов, туман ҳокими Султонбой Йўлдашев, партия фаоллари, депутатлар иштирок этишди.

Сўзга чиққан масъуллар юртимизда кейинги беш йилда амалга оширилаётган ислоҳотлар натижаси бугун шаҳарларимизда, узоқ қишлоқларимизда ўз аксини топаётганини, Президентимиз раҳбарлигида амалга оширилаётган ушбу ўзгаришлар жараёнларида Ўзбекистон Либерал-демократик партияси ҳам ўзининг муносиб улушини қўшиб, фаол иштирок этиб келаётганини алоҳида таъкидлашди.
Ундан ташқари, мустақиллик туфайли эришилган ютуқлар, янгиланаётган Ўзбекистонда “Халқ бой бўлса, давлат ҳам бой ва қудратли бўлади” тамойилини ҳаётга жорий этиш орқали аҳолини тадбиркорликка кенг жалб этиш, бизнес юритиш шартларини енгиллаштириш, оилавий тадбиркорлик ва касаначилик, ҳунармандчиликни рағбатлантириш учун яратилган янги имкониятлар борасида тўлқинланиб гапиришаркан, тадбир иштирокчиларини O‘zLiDeP билан бирга бўлишга, янги Ўзбекистонни биргаликда қуришга чорлаб қолишди.
Ушбу тадбирда иштирок этган партия фаоли, Маҳалла ва оилани қўллаб қувватлаш бўлими бошлиғи ўринбосари Муқаддас Бекназарова ҳамда бошқалар сўзга чиқиб, ўтган беш йил Қорақалпоғистон Республикаси ҳаётида ҳам мислсиз ўзгаришларга бой бўлганини эътироф этишди. Шу йиллар давомида қурилган ўнлаб янги ижтимоий объектлар, сони тобора ошиб бораётган тадбиркорлик субъектлари, замонавий ва шинам уй-жойлар, нафақат амударёликлар, балки бутун Қорақалпоғистон ҳаётидаги улкан воқеа – Амударё дарёси устига қурила бошлаган замонавий кўприк, автомобиль ва темир йўлларини чексиз ғурур, фахру-ифтихор билан тилга олишди.
Тадбирда Тадбиркорлар ва ишбилармонлар ҳаракати – Ўзбекистон Либерал демократик партияси атрибутлари ва шиорлари осиб қўйилган саҳнада катта экранда партиянинг фаолиятига оид, ҳудуддаги ижтимоий-иқтисодий ўзгаришларга бағишланган видеороликлар намойиш этилди. Партия шиорлари ёзилган паннолар, O`zLiDeP рамзи туширилган байроқлар, шарлар, либослар майдонга байрамона руҳ бағишлади.
Тадбир мобайнида “Янги Ўзбекистонни биргаликда қурамиз”, “Янги Ўзбекистон: биргаликда юксалиш  сари”, “Янги Ўзбекистонда эркин ва фаровон яшайлик!” шиорлари баралла янгради.
Очиқ майдонда ўтказилган тадбирда туман Маданият бўлими ҳаваскорлари томонидан намойиш этилган мусиқий дастур, санъаткорлар ижросидаги Ватан мадҳига бағишланган қўшиқлар, дилрабо рақслар туман аҳолисини янада хушнуд этди.

Озода Худойберганова.