Туман Ободонлаштириш бошқармаси самарали фаолият юритмоқда

Туманимизнинг кўркига кўрк қўшиш, шаҳар-у қишлоқларнинг кўкаламзорлаштирилишида, ободлиги ва озодалигини таъминлашга, янгича қиёфа касб этишида туман Ободонлаштириш бошқармаси самарали фаолият юритиб келмоқда.

Ўзбекистон Республикаси Вазирлар Маҳкамасининг 2013 йил 10 январда қабул қилинган “Республика аҳоли пунктларини ободонлаштириш ишларини ташкил этишни такомиллаштириш чора-тадбирлари тўғрисида” қарори асосида республика шаҳарлари ва туманларидаги ободонлаштириш масалалари бўйича ташкилотлар, бўлинмаларнинг негизида ободонлаштириш бошқармалари қайта ташкил этилиб, Амударё тумани Ободонлаштириш бошқармаси мазкур қарор билан белгиланган асосий вазифалар ижросини таъминлаб келмоқда.

Хусусан, туман ҳудудидаги ободонлаштириладиган ва кўкаламзорлаштириладиган майдонларда экилган манзарали дарахтлар ва гул кўчатларини парвариш қилиш, бошқарма балансида бўлган пиёдалар йўлакчаларининг тозалигини таъминлаш, Манғит шаҳри ҳудудидаги ички ирригация тармоқларини тозалаш, туман ҳудудидаги тунги кўча ёритиш чироқларининг доимий ишлашини таъминлаш каби ишлар амалга оширилмоқда.

Шунингдек, бошқарма томонидан ички кўча йўлларини давлат дастурлари асосида таъмирланиши ва янгидан қурилиши ташкил қилиниб, назоратсиз ҳайвонларни тутиш ва уларни санитария талаблари асосида йўқ қилиш, қабристонлар ҳудудларини ободонлаштириш ва кўкаламзорлаштириш ишлари олиб борилмоқда. Бошқармада жами 180 нафар ишчи ходимлар мавжуд бўлиб, мазкур вазифалар уларнинг машаққатли меҳнатлари эвазига амалга оширилмоқда.

Ҳозирда туман Ободонлаштириш бошқармаси энг улуғ ва энг азиз байрам – мустақиллигимизнинг 30 йиллигини муносиб нишонлаш мақсадида ҳудудларни байрамга тайёрлаш ишларини олиб бормоқда.

Шунингдек, бошқарма томонидан Қипчоқ йўли бўйидаги ариқларни, Исломобод кўчасида йўл бўйида жойлашган пиёдалар йўлакчаси атрофини тозалаш, Буюк турон кўчасидаги қуриган дарахт кўчатларини кесиш, Холимбег овули ҳудудидаги “Янгиберди Хўжа” ва Тўлқин овулидаги “Хўжа бобо” қабристонларини ўраб турган тўсиқ деворларни таъмирлаш ишлари амалга оширилмоқда.

Шу билан бирга, жорий йилда “Обод қишлоқ” ва “Обод махалла” давлат дастурига киритилган Жумуртов шаҳарчаси ва Хитой овули ҳудудларидаги ички кўча йўлларини таъмирлаш ишлари ташкил этилиб, аҳоли томорқаларига оқар сув етказиб бериш мақсадида ариқ қазиш ишлари амалга оширилмоқда. Қолаверса, ҳудудлардаги ижтимоий ҳимояга муҳтож, кам таъминланган оилаларнинг турар жойларини ҳам таъмирлаш ишлари олиб борилмоқда.

Таъкидлаш керакки, тозалик, орасталик бизнинг қон-қонимизга сингиб кетган, ота-боболаримиздан мерос бўлиб қолган эзги қадриятлардан биридир. Маҳалламиз, кўчаларимиз, юртимиз ободлиги, фаровонлигига ҳар биримиз масъул эканлигимизни инобатга олган ҳолда, ободонлаштириш ва тозалик ҳар кунлик ҳаётий эҳтиёжимизга айланиши лозим. Ушбу хайрли ва эзгу ишлар асло мавсум танламайди. Зеро, саранжом-сариштали жойда қут-барака бўлади.

Чарос Арслонова, туман ҳокимлигининг Ахборот хизмати раҳбари.