Давлат кадастрлари палатаси Қорақалпоғистон Республикаси бошқармаси туманда сайёр қабул ўтказди

8 июль куни Амударё туманида Давлат кадастрлар палатаси Қорақалпоғистон Республикаси бошқармасининг сайёр қабули бўлиб ўтди.

Сайёр қабулда Давлат кадастрлари палатаси Қорақалпоғистон Республикаси бошқармаси бошлиғи ўринбосари Адил Эренов, бошқарма юридик бюроси бошлиғи Тўребек Гаипов, бошқарманинг Амударё тумани филиал бошлиғи Шокиржон Давлатовлар ҳамда аҳоли вакиллари иштирок этдилар. Қабул жараёнида дастлаб соҳага оид қабул қилинган қатор қонун ҳужжатлари мазмун-моҳияти хусусида сўз юритилди.

Хусусан, Ўзбекистон Республикаси Президентининг “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида”ги фармони мазмун-моҳияти ҳақида тушунчалар берилди.

Мазкур фармон билан ерга оид муносабатларда янгича тартиблар белгиланиши кўзда тутилган бўлиб, ерни ҳақиқий маънода бозор активига айлантиришга хизмат қилади. Жумладан, 2021 йил 1 августдан бошлаб ер участкалари хусусий секторга – мулк ва ижара ҳуқуқи асосида, давлат органлари, муассасалари, корхоналари, фуқароларнинг ўзини ўзи бошқариш органларига — доимий фойдаланиш ҳуқуқи асосида ажратилиши белгиланган.

Мерос қилиб қолдириладиган умрбод эгалик, доимий эгалик, вақтинча фойдаланиш ҳуқуқи билан ер ажратиш тартиби бекор қилиниб, бунда илгари ажратилган ер участкаларига бўлган бундай ҳуқуқлар уларнинг эгаларида амалдаги тартибда сақланиб қолиши кўрсатилган.

Шунингдек, мазкур ҳужжатга кўра, барча ҳолларда ер участкалари фақат бўш турган ва захирага олинган ерлардан ажратилиши, айни бир ҳужжат билан ёки бир вақтнинг ўзида ер участкасини олиб қўйиш, захирага олиш, бошқа шахсга ажратиш ер бериш тартибини бузиш ҳисобланиши ва қонунга мувофиқ жавобгарликка тортиш учун асос бўлиши белгиланди. Бундан ташқари, маҳаллий давлат ҳокимияти органларининг ер муносабатларига оид қарор, фармойиш ёки бошқа турдаги ҳужжат қабул қилиш ҳуқуқи 2021 йил 1 августдан бекор қилинди.

Сайёр қабул аҳоли вакиллари томонидан йўлланган мурожаатларни тинглаш билан давом эттирилди. Қабул жараёнида, фуқаролар томонидан жами 10 та мурожаатлар келиб тушди. Мурожаатларнинг аксариятини фуқароларнинг кўчмас мулк обектларига кадастр ҳужжатини расмилаштириш ва давлат рўйхатидан ўтказиш мазмунидаги масалалар ташкил этди.

Шунингдек, қабулда кадастр ҳужжатининг дубликатини олиш, ер ажратиш, кўчмас мулк обектларига кадастр ҳужжатларини тайёрлаш, ишлаб чиқариш объектларини қуриш ва фермер хўжаликларини ташкил қилиш учун ер майдонлари ажратиш тартиблари каби қатор ўзларини қизиқтирган саволлар билан мурожаат қилдилар.

Келиб тушган мурожаатлардаги масалалар бўйича масъуллар фуқораларга ҳуқуқий изоҳлар бердилар ва айрим мурожатлар бўйича тегишли тартибда филиал ходимларига топшириқлар берилди. Фуқаролар томонидан соҳа бўйича берилган саволларга аниқ жавоблар келтирилди.

Чарос Арслонова, туман ҳокимлигининг Ахборот хизмати раҳбари.