ОЧИҚ САЙЁР СУДДА ОҒИР ОҚИБАТЛИ ТРАНСПОРТ ҲОДИСАСИГА ДОИР ЖИНОЯТ ИШИ КЎРИЛДИ

Шу йил 10 июнь куни Қипчоқ шаҳарча фуқаролар йиғини маъмурий биносида Жиноят ишлари бўйича Тахиатош туман суди томонидан очиқ сайёр суд мажлиси ўтказилди. Ушбу сайёр суд мажлисида суд раиси Арман Кощанов, давлат айбловчиси Амударё туман прокурорининг ёрдамчиси Аббоз Ниязимбетов ҳамда фуқаролар йиғини масъуллари иштирок этдилар. Суд мажлисида оғир оқибатли транспорт ҳодисасини содир қилган Қипчоқ шаҳарчаси фуқароси қаршисига тўпланган жиноят ишини кўриб чиқилди.

Ушбу фуқаро муқаддам Жиноят ишлари бўйича Амударё туман суди томонидан Ўзбекистон Республикаси Жиноят Кодексининг тегишли моддасида кўрсатилган жиноятни содир қилганликда айбли деб топиб, 3 йил муддатга озодликдан маҳрум қилиш жазоси тайинланган, тегишли асосга кўра 2 йилга шартли ҳукм қилинган, сўнг амнистия асосида жазодан озод этилган эди. Шундан тўғри хулоса чиқариши керак бўлишига қарамасдан, маст ҳолатда автомобиль бошқариб, оғир оқибатли йўл-транспорт ҳодисасини содир қилган.

Суд мажлисида судланувчининг, жабрланувчининг ва гувоҳнинг кўрсатувлари, тарафларнинг фикрлари, судланувчининг ҳимоя ва охирги сўзлари тингланди. Жиноят иши ҳужжатлари ўрганиб чиқилиб, ишда тўпланган далилларга баҳо берилди.

Судда аниқланган холатларга кўра, ушбу фуқаро 2021 йил 24 февраль куни ўзига тегишли бўлган автомашнасини «Йўл ҳаракати қоидалари»нинг тегишли бандида кўрсатилган талабларни қўпол равишда бузиб, спиртли ичимлик истеъмол қилган маст ҳолатда бошқарган. Овул ҳудудидаги тупроқ қопламали ички йўлда, тупроқ йўлни кесиб ўтган заҳкаш устидаги кўприкдан ўтаётганда, «Йўл ҳаракати қоидалари»нинг 77-бандида кўрсатилган талабларни бузиб, бошқарувни йўқотиши натижасида заҳкашга тушиб кетиб, йўл-транспорт ҳодисасини содир қилган.

Натижада, унинг бошқарувидаги транспорт воситасида бўлган йўловчи оғир тан-жароҳатини олиб, шифохонага ётқизилган ва кўрсатилган тиббий муолажаларга қарамасдан вафот этган. Судга оид тиббий экспертизаси хулосасида жабрланувчи юқори нафас йўлларининг сув билан тиқилиши натижасида келиб чиққан механик асфиксия, ўткир нафас олиш ва кўп органларнинг етишмовчилиги, чап елка ва чап тизза соҳаларининг қонталаши каби жароҳатлар олганлиги, бу унинг ўлимига сабаб бўлганлиги кўратилган.

Шунга кўра, оғир оқибатли йўл-транспорт ҳодисасини содир қилган ушбу фуқаро ўзининг юқоридаги ҳаракатлари билан Ўзбекистон Республикаси Жиноят кодексининг 266-моддаси 2-қисмида назарда тутилган жиноятни содир қилганликда айбланган.

Суд мажлисида судланувчи ўзининг айбига тўлиқ иқрорлик билдирди. Ҳодиса содир бўлган куни ўзига тегишли автомашинани бошқариб бораётганида бошқарувни йўқотиб заҳкашга тушиб кетганлиги, шу пайтда машинада бўлган йўловчини дарров касалхонага олиб кетилгани, унга дори ва бошқа харажатларига ёрдамлашиб турганлиги, кўрсатилган тиббий муолажаларга қарамасдан оламдан ўтганлигини айтиб ўтди.

Суд мажлисида иштирок этган жабрланувчининг қонуний вакили, марҳумнинг турмуш ўртоғи, судланувчининг дори ва бошқа харажатларга моддий томондан ёрдам бериб турганлигини, дафн маросим ва маъракаларига етказилган моддий зарар ҳам тўлиқ қоплаб берилгани, судланувчига нисбатан ҳеч қандай даъвоси йўқлиги ва уни кечирганлигини билдириб кўрсатма берди.

Судланувчига жазо тайинлашда, унинг ўз айбига тўлиқ иқрор бўлиб, содир қилган қилмишидан чин кўнгилдан пушаймонлигини, оилали, қарамоғида уч нафар фарзанди борлиги, жабрланувчиларга етказилган моддий ва маънавий зарарлар бартараф қилганлиги, жабрланувчининг қонуний вакилининг судланувчига ҳеч қандай даъвоси йўқлиги эътиборга олинди. Судланувчини жамиятдан ажратмаган ҳолда тарбиялаш мумкин деган хулосага келиниб, унинг меҳнатга қобилиятли эканлигини эътиборга олиниб, 3 йил муддатга ахлоқ тузатиш ишлари жазоси асосий жазо сифатида қўлланди ва муайян муддатга автотранспорт воситасини бошқариш ҳуқуқидан маҳрум қилиш жазоси қўшимча жазо сифатида тайинланди.

Элёр Жуманиёзов, судья ёрдамчиси.