ОРОМГОҲЛАРДА БОЛАЛАРНИНГ ФАВҚУЛОДДА ВАЗИЯТЛАРДА ҲАРАКАТ ҚИЛИШ КЎНИКМАЛАРИ ОШИРИЛМОҚДА
Мамлакатимизда ёзги болалар оромгоҳларида болаларнинг мириқиб ҳордиқ чиқариши учун қулай шароит яратиб берилган. Шу билан бирга бу ердаги фавқулодда вазиятларнинг олдини олиш, ёнғин хавфсизлигини таъминлаш муҳим аҳамият касб этади.
Вазирлар Маҳкамасининг 2020 йил 26 августдаги “Ўзбекистон Республикаси Фавқулодда вазиятларнинг олдини олиш ва бундай вазиятларда ҳаракат қилиш давлат тизимини янада такомиллаштириш тўғрисида”ги қарори қабул қилинган эди. Унга кўра, Фавқулодда вазиятлар вазирлигининг ҳудудий бошқармалари мутахассислари томонидан ёз мавсумида болалар вақтини сермазмун ўтказиш ҳамда фавқулодда вазиятларга оид билим ва кўникмаларини мустаҳкамлаш мақсадида жойларда бир қатор тадбирлар ташкил этилмоқда.
Ҳусусан, жорий йилнинг 10 июнь куни туманимиздаги “Қалдирғоч” номли болалар ёзги дам олиш оромгоҳида фавқулодда вазиятларнинг олдини олиш ва уларда ҳаракат қилиш мавзусида амалий махсус-тактик ўқув машғулоти ўтказилди. Ушбу амалий машғулотни ўтказишдан асосий мақсад фавқулодда вазиятлар содир бўлганда уларнинг оқибатларини бартараф этишда шахсий таркибнинг билим ва кўникмаларини мустаҳкамлашдан иборат.
Ўқув машғулот туман Фавқулодда вазиятлар бўлими ташаббуси билан оромгоҳ раҳбарияти ва тарбиячилар ҳамкорлигида ташкил этилди. Ҳар йилгидек оромгоҳларга Фавқулодда вазиятлар бўйича масъул ходимлар бириктирилди. Ушбу масъуллар ушбу объектларда хавфсизлик, оромгоҳларда ишчи-хизматчилар томонидан ёнғин хавфсизлиги қоидалари талабларига риоя этишларини, бундай вазиятлар содир бўлганида тўғри ҳаракат қилиш тартибларини билишларини, оромгоҳ ҳудуди ва хоналарида ёнғинга қарши режим сақлаётганлигини тушунтириш ҳамда мустаҳкам қўриқланишини таъминлаш мақсадидаги турли тадбирларни амалга оширишмоқда.
Бу ишларнинг самарасини янада ошириш мақсадида оромгоҳларга бириктирилган ходимлар томонидан кўргазмали тарғибот материаллари ҳамда махсус техникалар ёрдамида болалар билан турли учрашувлар, тушунтириш ишлари, давра суҳбатлари ўтказилиб келинмоқда. Бу эса ўз навбатида ёш авлодни ёнғин-қутқарув соҳасига қизиқтириш, уларни фавқулодда вазиятларда тўғри ҳаракатланишга ўргатиш, ёнғин хавфсизлиги қоидаларини ўзлаштиришларига, махсус техникаларнинг тактик имкониятлари, жиҳозларнинг вазифалари ҳақида маълумотларга эга бўлишларига замин яратмоқда.
Машғулот давомида дастлаб оромгоҳда дам олаётган болаларга ёнғин ўчириш асбоб-анжомлари билан кўргазмали учрашув ташкил этилди. Сўнгра болалар ётоқхонасида шартли равишда ёнғин содир қилиниб, оромгоҳдаги ишчи-хизматчилар ва ёнғин қутқарув хизмати ходимларининг болаларни хавфсиз жойга эвакуация қилишлари ҳамда ёнғинни бартараф этишлари амалда кўрсатилиб берилди. Машғулот якунида ишчи-хизматчилар ва ёнғин қутқарув ходимлари томонидан йўл қўйилган камчиликлар кўрсатилиб, келгусида бундай камчиликларга йўл қўймаслик борасида тушунчалар берилди.
Машғулотдан кейин Манғит шаҳри Аҳмад Яссавий ҳамда Исломобод кўчаларида жойлашган ёнғинга қарши сув олгич гидрантларининг техник ҳолатлари туман Сув тармоқлари корхонаси ҳодимлари билан биргаликда амалда ўрганилиб, мавжуд носозликлар жойида бартараф этилди.
Севара Исмоилова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
