ХОТИРАЛАРДА ЯШАЁТГАН ҚАҲРАМОН ЖАНГЧИ
Туманимизнинг сўлим қишлоқларидан бири – Хитой овулида туғилиб-ўсган Бахтжон Тожимбетов Ўринбой оға билан Гулсара оналарнинг ўнта бўлса – ўрни, қирқта бўлса – қилиғи бошқа 12 нафар фарзандларининг бири эди. Табиатан меҳрибон, бир сўзли ва қатъиятли Бахтжон ўзининг эпчиллиги, меҳнатсеварлиги, уддабуронлиги билан ака-укалари, опа-сингиллари орасида ажралиб турарди...
Агар Бахтжон Тожимбетов ҳаёт бўлганида айни баҳорда 57 ёшга тўлган, ўғил-қизларини камолга етказиб, эл-юртда обрўли оила соҳиби даражасига етган бўларди. Афсус... Бахтжоннинг тақдири совуқ Афғон уруши жанггоҳларига туташди. У Афғонистонда кечаётган даҳшатли муҳорабаларда илк жангга кирганида 19 ёшда эди. Собиқ СССР Армиясининг моторлашган ҳарбий қисмларидан бирида пулемётчи сифатида 1982 йилнинг 4 март куни Ганжитол тоғидаги беаёв жангларда илк марта душман билан яккама-якка тўқнашди. Жасур ва эпчил Бахтжон ўз пулемётидан тинимсиз ўқ ёғдириб, душманни эсанкиратиб қўйди. У биринчи жангидаёқ рота командирининг назарига тушди. Шу боис, рота командири Бахтжон хизмат қилаётган қисм навбатдаги муҳим топшириқни қабул қилиб олганида душманни тўсиб туриш нуқтасига пулемётчи Бахтжонни танлади. 1982 йилнинг 5 майида муҳим топшириқни бажаришга киришган Бахтжон ва унинг ротадошлари учун оғир ва қақшатқич жанглар бўлди. Тиш-тирноғигача қуролланган душман тўдасига қарши жангларда Бахтжоннинг пулемёти душманга кўп талофат етказди. Тинимсиз ўқ ёғдираётган пулемёт нуқтасини йўқ қилиш мақсадида душман ўта аниқлик билан жанг қилишга ўтди ва... манфур ёв ўз ниятига етди. Юрагига яқин жойидан оғир яраланган Бахтжон Тожимбетов юрагини чангаллаб туриб ҳам душманга қарата бир-икки марта ўқ узишга улгурди...
Шу куни рота аскарлари Бахтжоннинг қаҳрамонлиги эвазига муҳим топшириқни адо этдилар... Бахтжон эса...
Хотира ва қадрлаш куни байрами арафасида Бахтжон Тожимбетов таҳсил олган 27-сонли умумтаълим мактабида қаҳрамон жангчининг хотирасига бағишланган хотира маросими ўтказилди.
Хотира маросимини мактаб директорининг маънавий-маърифий ишлар бўйича ўринбосари Жумабой Сапарбоев очди ва Бахтжон Тожимбетовнинг ўқувчилик даври ҳақидаги хотираларидан сўзлаб берди. Тадбирда Ўзбекистон Республикаси “Veteran” жангчи-фахрийлар ва ногиронлари бирлашмаси Қорақалпоғистон Республикаси бўлимининг Амударё тумани бўйича вакили Баҳодир Жуманиёзов, Бахтжон Тожимбетовнинг синфдош дўстлари Саъдулла Исмоилов, Раҳимбой Матқурбонов, Гулимбат Ситрзаев, Бахтжоннинг укаси Кенгесбой Тожимбетов, туманимиздаги собиқ афғончи жангчи-фахрийлар ҳамда 27-сонли мактаб ўқувчилари иштирок этдилар.
Шунингдек, хотира тадбирида Баҳодир Жуманиёзов Бахтжон Тожимбетовнинг жангларда кўрсатган жасорати, ҳарбий қасамёдига содиқлик билан мардлик ва жасурлик намуналарини намоён эта олгани, ўлимидан сўнг “Қизил юлдуз” ордени билан тақдирлангани ҳақида батафсил маълумот берди.
Хотира тадбирида собиқ афғончи жангчи-фахрийлардан Раҳимбой Халиллаев ва Озодбой Хўжаниёзов, 27-сонли мактаб ўқувчиларидан Дилшод Отахонов, Воҳиджон Бобожонов, Умида Халиллаева, Жавоҳир Қўчқоров, Диёрбек Раҳимбоевлар ҳам сўзга чиқдилар.
Бўлиб ўтган хотира тадбири давомида иштирокчилардан бир гуруҳи Бахтжон Тожимбетов мангу қўним топган “Қумқалъа” қабристонига бориб, унинг қабрини зиёрат этишди ва Бахтжоннинг руҳига Қуръон оятларидан тиловатлар қилдилар.
Собиқ афғончи жангчи, фахрий, тадбиркор Солижон Хўрозов ҳомийлигида ўтказилган мазкур хотира тадбири инсон хотираси ҳамиша муқаддаслигини, тинчлик ва осойишталикнинг қадри ҳамма моддиятлардан ҳам улуғлигини, бу муқаддас туйғуларга содиқ яшаш халқимиз учун олий қадрият эканлигини амалда намоён этгани билан муҳим аҳамият касб этди.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
