XOTIRALARDA YaShAYoTGAN QAHRAMON JANGChI

Tumanimizning soʻlim qishloqlaridan biri – Xitoy ovulida tugʻilib-oʻsgan Baxtjon Tojimbetov Oʻrinboy ogʻa bilan Gulsara onalarning oʻnta boʻlsa – oʻrni, qirqta boʻlsa – qiligʻi boshqa 12 nafar farzandlarining biri edi. Tabiatan mehribon, bir soʻzli va qatʼiyatli Baxtjon oʻzining epchilligi, mehnatsevarligi, uddaburonligi bilan aka-ukalari, opa-singillari orasida ajralib turardi...

Agar Baxtjon Tojimbetov hayot boʻlganida ayni bahorda 57 yoshga toʻlgan, oʻgʻil-qizlarini kamolga yetkazib, el-yurtda obroʻli oila sohibi darajasiga yetgan boʻlardi. Afsus... Baxtjonning taqdiri sovuq Afgʻon urushi janggohlariga tutashdi. U Afgʻonistonda kechayotgan dahshatli muhorabalarda ilk jangga kirganida 19 yoshda edi. Sobiq SSSR Armiyasining motorlashgan harbiy qismlaridan birida pulemyotchi sifatida 1982-yilning 4-mart kuni Ganjitol togʻidagi beayov janglarda ilk marta dushman bilan yakkama-yakka toʻqnashdi. Jasur va epchil Baxtjon oʻz pulemyotidan tinimsiz oʻq yogʻdirib, dushmanni esankiratib qoʻydi. U birinchi jangidayoq rota komandirining nazariga tushdi. Shu bois, rota komandiri Baxtjon xizmat qilayotgan qism navbatdagi muhim topshiriqni qabul qilib olganida dushmanni toʻsib turish nuqtasiga pulemyotchi Baxtjonni tanladi. 1982-yilning 5-mayida muhim topshiriqni bajarishga kirishgan Baxtjon va uning rotadoshlari uchun ogʻir va qaqshatqich janglar boʻldi. Tish-tirnogʻigacha qurollangan dushman toʻdasiga qarshi janglarda Baxtjonning pulemyoti dushmanga koʻp talofat yetkazdi. Tinimsiz oʻq yogʻdirayotgan pulemyot nuqtasini yoʻq qilish maqsadida dushman oʻta aniqlik bilan jang qilishga oʻtdi va... manfur yov oʻz niyatiga yetdi. Yuragiga yaqin joyidan ogʻir yaralangan Baxtjon Tojimbetov yuragini changallab turib ham dushmanga qarata bir-ikki marta oʻq uzishga ulgurdi...

Shu kuni rota askarlari Baxtjonning qahramonligi evaziga muhim topshiriqni ado etdilar... Baxtjon esa...

Xotira va qadrlash kuni bayrami arafasida Baxtjon Tojimbetov tahsil olgan 27-sonli umumtaʼlim maktabida qahramon jangchining xotirasiga bagʻishlangan xotira marosimi oʻtkazildi.

Xotira marosimini maktab direktorining maʼnaviy-maʼrifiy ishlar boʻyicha oʻrinbosari Jumaboy Saparboyev ochdi va Baxtjon Tojimbetovning oʻquvchilik davri haqidagi xotiralaridan soʻzlab berdi. Tadbirda Oʻzbekiston Respublikasi “Veteran” jangchi-faxriylar va nogironlari birlashmasi Qoraqalpogʻiston Respublikasi boʻlimining Amudaryo tumani boʻyicha vakili Bahodir Jumaniyozov, Baxtjon Tojimbetovning sinfdosh doʻstlari Saʼdulla Ismoilov, Rahimboy Matqurbonov, Gulimbat Sitrzayev, Baxtjonning ukasi Kengesboy Tojimbetov, tumanimizdagi sobiq afgʻonchi jangchi-faxriylar hamda 27-sonli maktab oʻquvchilari ishtirok etdilar.

Shuningdek, xotira tadbirida Bahodir Jumaniyozov Baxtjon Tojimbetovning janglarda koʻrsatgan jasorati, harbiy qasamyodiga sodiqlik bilan mardlik va jasurlik namunalarini namoyon eta olgani, oʻlimidan soʻng “Qizil yulduz” ordeni bilan taqdirlangani haqida batafsil maʼlumot berdi.

Xotira tadbirida sobiq afgʻonchi jangchi-faxriylardan Rahimboy Xalillayev va Ozodboy Xoʻjaniyozov, 27-sonli maktab oʻquvchilaridan Dilshod Otaxonov, Vohidjon Bobojonov, Umida Xalillayeva, Javohir Qoʻchqorov, Diyorbek Rahimboyevlar ham soʻzga chiqdilar.

Boʻlib oʻtgan xotira tadbiri davomida ishtirokchilardan bir guruhi Baxtjon Tojimbetov mangu qoʻnim topgan “Qumqalʼa” qabristoniga borib, uning qabrini ziyorat etishdi va Baxtjonning ruhiga Qurʼon oyatlaridan tilovatlar qildilar.

Sobiq afgʻonchi jangchi, faxriy, tadbirkor Solijon Xoʻrozov homiyligida oʻtkazilgan mazkur xotira tadbiri inson xotirasi hamisha muqaddasligini, tinchlik va osoyishtalikning qadri hamma moddiyatlardan ham ulugʻligini, bu muqaddas tuygʻularga sodiq yashash xalqimiz uchun oliy qadriyat ekanligini amalda namoyon etgani bilan muhim ahamiyat kasb etdi.

Robiya YOʻLDOShEVA.