Qalblarda yashayotgan nurli siymo
(Mehnat fronti qatnashchisi, aziz buvijonim Katcha Bekanova xotirasiga)
Bu yorugʻ olamda aziz buvijonlarning oʻrni boʻlakcha. Ular borida xonadonimiz fayzli, koʻnglimiz xotirjam, yoʻllarimiz esa doimo charogʻon boʻladi. Bugun bagʻrimizni oʻrtayotgan sogʻinch azobi bizga bir haqiqatni yana bir bor anglatdi: Amudaryo tumanining moʻʼtabar onaxonlaridan biri, xonadonimiz quyoshi — sevimli buvijonim Katcha momo Bekchanovaning oʻrni oilamizda boʻsh, xotirasi qalblarimizda....
Buvijonim 1917-yil 1-yanvarda Amudaryo tumanida dunyoga kelib, bir asrdan ziyod sermazmun va ibratli hayot yoʻlini bosib oʻtdilar. U kishining hayoti — sabr, matonat va halol mehnatning chinakam maktabidir.
Buvijonim suronli urush yillarida va undan keyingi tiklanish davrida (1942–1967-yillar) Amudaryo tumanidagi jamoa xoʻjaligida ishchi boʻlib, fidokorona mehnat qildilar. Mehnat fronti qatnashchisi sifatida mamlakatimiz rivojiga qoʻshgan ulkan hissasi va qilgan fidoyiliklari munosib baholanib, davlatimiz tomonidan “Shuhrat” medali bilan taqdirlangan edilar.
U kishi uzoq yillar tumanimizdagi Choykoʻl ovuli, Qoraqipchoq aholi punktidagi fayzli xonadonda yashab, nafaqat oilasining, balki butun mahalladoshlarining hurmat-eʼtiborida boʻldilar. 4 nafar farzand, 18 nafar nevara va 42 nafar chevara, 2 nafar evaraga bosh boʻlib, ularni el-yurt koriga yaraydigan insonlar qilib tarbiyaladilar.
Farzandlari-yu nevaralari ardogʻida umrguzaronlik qilgan buvijonimdan 100 yoshdan oshib ham tetik yurishlarining siri haqida soʻrashganda: “Toʻgʻri ovqatlanish, mehnat qilish va mehr-oqibatli boʻlish”, deya javob berardilar. U kishining hayotdagi bosh shiori esa bitta edi: “Yaxshilik qilish!”
Biz, nabiralarga bergan oʻgitlari, “Yaxshilik qil, halol yasha, elning duosini ol”, deya qayta-qayta uqtirgan nasihatlari qulogʻimiz ostida xuddi kechagidek jaranglab turibdi.
Esimda, bolaligimda buvijonimning bagʻriga bosh qoʻyganimda, dunyodagi eng baxtli inson edim. U kishining qadoq qoʻllaridan hamisha issiq non va chinakam mehrning hidi kelardi. Bugun oʻsha nurli yuzlarni, duoga ochilgan tabarruk qoʻllarni juda-juda sogʻindik.
Inson bu dunyoni jismonan tark etsa-da, uning qoldirgan yaxshi nomlari va solih zurriyotlari xotirasida yashashda davom etarkan. Biz garchi ayriliq gʻamidan ezilsak-da, shunday muqaddas, fozila va qahramon ayolning zurriyoti ekanligimizdan cheksiz faxrlanamiz.
Aziz buvijon! Siz bizni jismonan tark etgan boʻlsangiz ham, qalblarimizda, shirin xotiralarimizda va duolarimizda abadiy yashaysiz. Oxiratingiz obod, joyingiz jannat bogʻlaridan boʻlsin. Sizni cheksiz sogʻinch va hurmat bilan eslovchi nabirangiz
Shahnoza Sobirova, Berdaq nomidagi Qoraqalpoq davlat universiteti talabasi
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
