“BARHAYoT SIYMOLAR” NOMLI TADBIR OʻTKAZILDI

Oʻzbek tili va mumtoz adabiyotining ravnaq topishida, sayqallanishida buyuk mutafakkir Mir Alisher Navoiy va Zahiriddin Muhammad Bobur bobolarimizning oʻrinlari beqiyosdir. Ularning yaratgan nodir asarlari-yu, mislsiz durdonalari butun dunyoga allaqachon maʼlum va mashhur boʻlib ulgurganligi quvonarli hol, albatta.

Xorijlik adabiyotshunoslar Navoiyni: “Millatni maʼnaviy tanazzuldan qutqargan buyuk mutafakkir” – deya goʻzal jumlalar bilan bejizga taʼriflashmagan. Ilmiy-tadqiqot markazining maʼlumotlariga koʻra, Eron davlatida Navoiy haqida film suratga olinishi mumkinligi va Navoiy nomidagi Milliy kutubxona 24 soat davomida ishlashga tayyorgarlik koʻrayotganini taʼkidlashmoqda.

Shu bilan birga, Zahiriddin Muhammad Bobur bobomizning shaxsiyatida ham insonparvarlik gʻoyalari va Vatanga muhabbat tuygʻusi barq urib turishi ham barchamizga kundek ravshan.

Shu sababli barcha taʼlim muassasalarida buyuk bobokalonlarimizning xotirasiga bagʻishlangan adabiy tadbir kechalari koʻtarinki ruhda oʻtkazilmoqda. Tumanimizning 1-umumiy oʻrta taʼlim maktabida ham bu ikki siymoga bagʻishlangan tadbir kechasi chiroyli va tantanali ravishda boʻlib oʻtdi.

Tadbirni maktabning maʼnaviyat-maʼrifiy ishlar boʻyicha direktor oʻrinbosari Qadam Allabergenov ochib berdi. Soʻngra maktabning 6 “v”-sinf oʻquvchilari buyuk mutafakkir bobolarimizning gʻazal, ruboiy va qitʼalaridan naʼmunlar keltirib, oʻqituvchi va murabbiylarning koʻnglini xushnud qilishdi.

Qolaversa, 7-sinf oʻquvchilari XV asr muhitini gavdalantirgan holda togʻrilikning qay darajada ezgu fazilatligini uqtirishgan boʻlsa, egrilikning ham naqadar yomon illatligini sahna koʻrinishi orqali oʻquvchilar qalbiga chiroyli tarzda yetkazishdi. Bundan tashqari, 9- va 6-sinf qizlarining “Jayrona” nomli mumtoz kuyga bagʻishlangan raqsi ham tadbirni yanada qiziqarli va maroqliroq oʻtishiga yordam berdi.

 “Chin soʻz – moʻʼtabar, yaxshi soʻz – muxtasar”, ­deganlaridek, muxtasar aytganda, biz mana shunday serqirra ijodkorlarning avdodlari ekanligimizdan faxrlanamiz va ularga munosib farzand boʻlishga harakat qilamiz.

Inobat ODILBOYeVA, 1-sonli umumiy oʻrta taʼlim maktabining ona tili va adabiyot oʻqituvchisi