Қалбларда яшаётган нурли сиймо
(Меҳнат фронти қатнашчиси, азиз бувижоним Катча Беканова хотирасига)
Бу ёруғ оламда азиз бувижонларнинг ўрни бўлакча. Улар борида хонадонимиз файзли, кўнглимиз хотиржам, йўлларимиз эса доимо чароғон бўлади. Бугун бағримизни ўртаётган соғинч азоби бизга бир ҳақиқатни яна бир бор англатди: Амударё туманининг мўътабар онахонларидан бири, хонадонимиз қуёши — севимли бувижоним Катча момо Бекчанованинг ўрни оиламизда бўш, хотираси қалбларимизда....
Бувижоним 1917 йил 1 январда Амударё туманида дунёга келиб, бир асрдан зиёд сермазмун ва ибратли ҳаёт йўлини босиб ўтдилар. У кишининг ҳаёти — сабр, матонат ва ҳалол меҳнатнинг чинакам мактабидир.
Бувижоним суронли уруш йилларида ва ундан кейинги тикланиш даврида (1942–1967-йиллар) Амударё туманидаги жамоа хўжалигида ишчи бўлиб, фидокорона меҳнат қилдилар. Меҳнат фронти қатнашчиси сифатида мамлакатимиз ривожига қўшган улкан ҳиссаси ва қилган фидойиликлари муносиб баҳоланиб, давлатимиз томонидан “Шуҳрат” медали билан тақдирланган эдилар.
У киши узоқ йиллар туманимиздаги Чойкўл овули, Қорақипчоқ аҳоли пунктидаги файзли хонадонда яшаб, нафақат оиласининг, балки бутун маҳалладошларининг ҳурмат-эътиборида бўлдилар. 4 нафар фарзанд, 18 нафар невара ва 42 нафар чевара, 2 нафар эварага бош бўлиб, уларни эл-юрт корига ярайдиган инсонлар қилиб тарбияладилар.
Фарзандлари-ю неваралари ардоғида умргузаронлик қилган бувижонимдан 100 ёшдан ошиб ҳам тетик юришларининг сири ҳақида сўрашганда: “Тўғри овқатланиш, меҳнат қилиш ва меҳр-оқибатли бўлиш”, дея жавоб берардилар. У кишининг ҳаётдаги бош шиори эса битта эди: “Яхшилик қилиш!”
Биз, набираларга берган ўгитлари, “Яхшилик қил, ҳалол яша, элнинг дуосини ол”, дея қайта-қайта уқтирган насиҳатлари қулоғимиз остида худди кечагидек жаранглаб турибди.
Эсимда, болалигимда бувижонимнинг бағрига бош қўйганимда, дунёдаги энг бахтли инсон эдим. У кишининг қадоқ қўлларидан ҳамиша иссиқ нон ва чинакам меҳрнинг ҳиди келарди. Бугун ўша нурли юзларни, дуога очилган табаррук қўлларни жуда-жуда соғиндик.
Инсон бу дунёни жисмонан тарк этса-да, унинг қолдирган яхши номлари ва солиҳ зурриётлари хотирасида яшашда давом этаркан. Биз гарчи айрилиқ ғамидан эзилсак-да, шундай муқаддас, фозила ва қаҳрамон аёлнинг зурриёти эканлигимиздан чексиз фахрланамиз.
Азиз бувижон! Сиз бизни жисмонан тарк этган бўлсангиз ҳам, қалбларимизда, ширин хотираларимизда ва дуоларимизда абадий яшайсиз. Охиратингиз обод, жойингиз жаннат боғларидан бўлсин. Сизни чексиз соғинч ва ҳурмат билан эсловчи набирангиз
Шаҳноза Собирова, Бердақ номидаги Қорақалпоқ давлат университети талабаси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
