“ЎЗБЕК АРСЛОНИ” ФИЛЬМИ — ҚАҲРАМОНЛИК ВА ЖАСОРАТ ТАРАННУМИ

Тарих саҳифаларида шундай қаҳрамонлар борки, уларнинг жасорати ва матонати йиллар ўтса-да, авлодлар хотирасида мангу яшайди. Яқинда Шимоли-ғарбий ҳарбий округининг Маънавият ва маърифат марказида айнан шундай мардларнинг асл намунаси, фарғоналик 2-жаҳон уруши қаҳрамони Мамадали Топиволдиев ҳаётига бағишланган “Ўзбек арслони” фильмининг тақдимоти бўлиб ўтди.

Мазкур картина томошабинлар томонидан катта қизиқиш билан кутиб олинди. Ушбу фильм халқимизнинг мардлик, ватанпарварлик ва жасорат каби юксак қадриятларини тараннум этувчи, ёш авлодни миллий ғурур ва тарихий хотирага ҳурмат руҳида тарбиялашга хизмат қилувчи муҳим экран асари сифатида эътироф этилмоқда.

Мамадали Топиволдиев 1919 йил 20 сентябрда Риштон туманидаги Пандигон қишлоғида, меҳнаткаш деҳқон оиласида дунёга келган. Мамадали ўзининг илк меҳнат фаолиятини Риштон алоқа бўлимида почтальонлик вазифасидан бошлайди. Бироқ кейинчалик тракторчилик касбига меҳр қўйиб, махсус курсда ўқийди. Унинг тинч ва мазмунли ҳаёти 1939 йилда ҳарбий хизматга сафарбар этилиши билан бутунлай ўзгариб кетди.

2-жаҳон уруши йилларида Мамадали Топиволдиев ўзининг чинакам жасоратини намоён этди. Унинг фронтдаги ҳаракатлари душман учун ҳақиқий даҳшатга айланди. Тарихий маълумотларга кўра, у душманнинг жами 19 та эшелонини портлатиб юборган. Қўл жангида 76 нафар немис аскарини ер тишлатиб, 1 нафар немис генералини асирга олган. Асосий қуроли пулемёт бўлган бу қаҳрамоннинг қайд варақасида 150 дан ортиқ немис аскари ва офицерларини қириб ташлагани, 180 нафарини асирга олгани, шунингдек 20 дан ортиқ автомашинани йўқ қилгани тарихий факт сифатида келтириб ўтилган. Бундай улкан талафотлардан ғазабланган Гитлер Топиволдиевни тутган немис аскарларига 50 минг, айрим манбаларга кўра эса 25 минг рейхсмарка миқдорида пул мукофоти ваъда қилгани ҳам унинг фашистлар учун нақадар катта хавф туғдирганини исботлайди.

Уруш якунлангач, 1945 йил 8 майда хизматдан озод этилган Мамадали маълум муддат Минск шаҳрида Белоруссия Қишлоқ хўжалиги халқ комиссарлигида ҳайдовчи бўлиб ишлайди ва сўнг ўз қишлоғига қайтади. Тинчлик даврида ҳам у тиним билмади. 1947 йил 16 февралда Ўзбекистон Олий Советининг 1-чақириқ депутати этиб сайланди. Фаолияти давомида 1946 йилда колхоз раиси, кейинчалик туман истеъмолчилар уюшмаси бўлими раҳбари, Риштон гидроэлектр станцияси раҳбари, колхоз раиси каби лавозимларда самарали фаолият юритади.

Афсуски, 1969 йил 6 май куни Мамадали Топиволдиев ўз ишхонасида номаълум шахслар томонидан пичоқланиб, фожиали тарзда ҳалок бўлади. Бироқ қаҳрамоннинг ёрқин хотираси халқ қалбидан ўчгани йўқ. Кўплаб шаҳар ва қишлоқларда унинг ҳайкаллари ўрнатилган, кўчаларга, мактабларга унинг номи берилган. Шубҳасиз, бу мард ўзбек ўғлонининг жасорати келажак авлодлар учун ватанпарварликнинг олий намунаси бўлиб хизмат қилади.

"Ўзбек арслони" фильмининг тақдимоти шунчаки маданий тадбир бўлиб қолмасдан, балки тарихий ҳақиқат ва ўлмас жасоратнинг катта экранлардаги ёрқин аксига айланди. Ушбу киноасар орқали томошабинлар фақатгина ўтмиш воқеаларини кузатиб қолмай, балки юрт озодлиги йўлида жонини фидо қилишга тайёр бўлган ботирларимизнинг ички кечинмалари, қатъияти ва чексиз ватанпарварлигини ўз юракларидан ўтказиш имконига эга бўлдилар. Экранда гавдаланган Мамадали Топиволдиев образи ҳар бир инсонни бугунги мусаффо осмон ва тинчликнинг қадрига етишга, бу йўлда тўланган буюк бадалларни ҳеч қачон унутмасликка ундайдиган кучли маънавий омил вазифасини ўтайди.

Мазкур фильм, айниқса, бугунги кунда сафда турган аскарлар ва ҳарбий хизматчилар учун тенгсиз тарбиявий аҳамиятга эгадир. Ҳарбий либос кийиб, Ватан сарҳадларини қўриқлаётган ёш ўғлонлар экрандаги "Осиё арслони"нинг шижоати, садоқати ва юксак иродасини кўрар экан, томирларида айнан шундай енгилмас қаҳрамонларнинг қони оқаётганини теран ҳис қиладилар. Фильм ҳарбий хизматчиларда жанговар руҳни шакллантириш, касбга бўлган садоқатни мустаҳкамлаш ва Ватан ҳимоясидек муқаддас бурчни шараф билан бажаришга ундовчи беқиёс мотивация манбаи бўлиб хизмат қилади.