МАКТАБДА ҲАРБИЙ-ВАТАНПАРВАРЛИК МАВЗУСИДА ТАДБИР ЎТКАЗИЛДИ

Умумий ўрта таълим ташкилотларида таълим-тарбия олаётган ўқувчиларни миллий ғоя ва Ватанимизга садоқат руҳида тарбиялаш, уларнинг қалбига Ватан ҳимояси муқаддас бурч эканлигини чуқур сингдириш, қадимий тарихимиз ва маданиятимиз, жонажон Ватанимизнинг мустақиллиги ва равнақи йўлида фидокорона курашган миллий қаҳрамонларимиз билан фахрланиш, уларга муносиб бўлиш туйғусини шакллантириш долзарб вазифадир. Шу тариқа уларда миллий армиямизнинг куч-қудрати ва салоҳиятига бўлган ишончи мустаҳкамланади ва ҳурмат-эҳтироми уйғотилади, миллий армиямизга жисмонан бақувват, маънан етук, юксак салоҳиятли ёшлар зарурлиги, ҳарбий хизмат ҳар бир йигитнинг шарафли вазифаси эканлиги сингдириб борилади.

Мамлакатимиз умумий ўрта таълим муассасаларида ёшларни чақириққа тайёрлаш фани ўқитувчилари зиммасига бу борада улкан вазифалар юкланган. Улар ўқувчи-ёшларда ён-атрофимизда ва жаҳонда рўй бераётган сиёсий-ижтимоий жараёнларга миллий манфаатларимиздан келиб чиққан ҳолда ёндошиш кўникмаларини, ёт ғояларга қарши иммунитетни шакллантиришга ҳаракат қилишмоқда. Бу вазифаларни адо этишда туманимиз таълим муассасалари туман Мудофаа бўлими, Ўзбекистон Республикаси Миллий гвардиясининг Қорақалпоғистон Республикаси бўйича бошқармаси билан мустаҳкам ҳамкорлик ўрнатган.

Шу йилнинг 30 январида Миллий гвардия, Жисмоний тарбия ва спорт бўлими, Мудофаа бўлими, туман Халқ таълими бўлими ҳамкорлигида 22-сонли умумий ўрта таълим мактабида ҳарбий ватанпарварлик мавзусида тадбир бўлиб ўтди. Тадбирга мактаб ўқитувчилари, ўқувчиларидан ташқари тумандаги барча мактабларнинг ёшларни чақириққа тайёрлаш фани ўқитувчилари иштирок этдилар.

Тадбирни Жисмоний тарбия ва спорт бўлими бошлиғи Ғуломжон Қурбонбоев очди ва мазкур тадбир мақсади ҳақида батафсил маълумотлар берди.

Тадбирга Ўзбекистон Республикаси Миллий гвардиясининг Қорақалпоғистон Республикаси бўйича бошқармасининг катта лейтенант Абдураҳмон Абдуллаев рағбарлигида келган бир гуруҳ ҳарбий хизматчилари қатнашди. Абдураҳмон Абдуллаев Миллий армиямизнинг куч-қудрати ва салоҳияти тобора юксалиб бораётганини, соҳага замонавий технологиялар жорий қилиниши чегараларимиз дахлсизлигини ишончли қўриқлашга хизмат қилаётганини тушунтирди. Шунингдек, ўқувчиларга замонавий қурол-аслаҳалар ҳамда зирҳланган техникалар, уларнинг ишлатилиши ҳақида маълумотлар берилди ва улар билан ўқувчилар таништирилди. Ўқувчилар ушбу техникаларни катта  қизиқиш билан томоша қилдилар.

Тадбирда бугунги ўқувчи-ёшлар Ватанимиз келажаги эканлиги, юртимиз тинч-осойишталигини асраш келгусида уларнинг шарафли бурчи эканлиги кенг тарғиб этилди.

Ўқувчилар ҳарбий хизматчиларга ўзларини қизиқтирган саволларни бериб, атрофлича жавоб олдилар.

Тадбир барча ўқувчиларда ҳарбий соҳага ҳавас ва қизиқиш уйғотди, кўнгилларига шу азиз ва муқаддас Ватанимиз сарҳадларини собит туриб қўриқлаш, она юртимизга фидойи хизмат қилишдек эзгу орзуларни жойлади.

Ойгул РАЖАБОВА.