САЙЁР УЧРАШУВЛАРДА СУД-ҲУҚУҚ ТИЗИМ МАСЪУЛЛАРИ АЁЛЛАР ВА ЁШЛАРГА ҲУҚУҚИЙ ЁРДАМ КЎРСАТИШДИ

Юртимизда хотин-қизлар ва ёшлар – аҳолининг катта қисмини ташкил қилади. Шу боис ижтимоий муаммоларнинг кўпчилиги улар билан боғлиқ. Уларни  ижтимоий қўллаб-қувватлаш, моддий кўмак бериш мақсадида ҳар бир маҳалла, туман, шаҳар ва вилоят кесимида “ёшлар дафтари” ва “аёллар дафтари” шакллантирилди. Ушбу дафтарга ижтимоий, ҳуқуқий, психологик қўллаб-қувватлашга, билим ва касб ўрганишга эҳтиёжи ва иштиёқи бор бўлган ишсиз ёшлар ва хотин-қизлар киритилди. Бунинг натижасида улар билан тизимли, манзилли ишлаш бўйича тегишли чора-тадбирлар йўлга қўйилди.

“Аёллар дафтари”га киритилган хотин-қизларга манзилли ҳуқуқий ёрдам кўрсатиш бўйича Амударё туманида ҳам Қорақалпоғистон Республикаси судлари, қуйи судлар, туман ҳокимлиги, бошқа идора ва ташкилотлар ҳамкорлигида қатор ишлар амалга оширилиб келинмоқда.

23 январь куни туман Маҳалла ва оилани қўллаб-қувватлаш бўлими биносида, Гулзор маҳалла фуқаролар йиғини маъмурий биносида, Чойкўл овулидаги 42-сонли мактабда, Қипчоқ овули ва Қипчоқ шаҳарчасининг маъмурий биносида “Аёллар дафтари”ни юритиш оркали тизимли равишда ҳал этиш ва уларни ижтимоий қўллаб-қувватлаш бўйича тадбир ўтказилди. Унда Қорақалпоғистон Республикаси Жиноят ишлари бўйича суди раиси, маъмурий ва фуқаролик ишлари бўйича судьялар ва суд ходимлари иштирок этдилар. Масъуллар ижтимоий-иқтисодий ва ҳуқуқий жиҳатдан кўмакка муҳтож хотин-қизларнинг муаммоларини ҳал этиш чораларини ўрганиб чиқдилар.

Жиноят ишлари бўйича Қорақалпоғистон Республикаси суди раиси Гулнора Бозорбоева, Маъмурий ишлар бўйича Қорақалпоғистон Республикаси суди судьяси Пўлат Дошмурадов, Фуқаролик ишлари бўйича Амударё тумани суди раиси Қайрулла Атамурадов, Жиноят ишлари бўйича Амударё тумани суди раиси Султонмурод Давлетмуродовлар ҳамда туман ҳокимлиги, прокуратура, ИИБ, мажбурий ижро бюроси, Адлия бўлими, “Мадад” ННТ ва бошқа ташкилотлар ходимларидан иборат масъуллари “Аёллар дафтари”га киритилган ҳамда суд-ҳуқуқ соҳасига оид масалалар юзасидан ҳуқуқий ёрдамга муҳтож бўлган жами 79 нафар хотин-қизлар билан сайёр учрашувлар ҳамда уйма-уй юриб ўрганиш тадбирлари ўтказишди.

Сайёр учрашувлар давомида хотин-қизлардан қабул қилинган мурожаатларнинг 8 таси суд-ҳуқуқ масалаларига, 17 таси мажбурий ижро бюросига, 20 таси бандлик масалаларига, 7 таси тиббиёт масалаларига, 2 таси Маҳалла ва оилани қўллаб қувватлаш бўлимига, 4 таси банк соҳасига, 7 таси пенсия жамғармаси масаласига оид бўлиб, 14 таси ижтимоий-иқтисодий ва бошқа масалаларга оид бўлди. Шундан, 75 та мурожаат оғзаки ва 1 таси ёзма равишда қабул қилинди.

Суд-ҳуқуқ масалаларига оид жами 8 та мурожаатлар юзасидан мурожаат этувчиларга амалий ёрдам кўрсатилди. Айримларига “Мадад” ННТ томонидан аризаси ёзиб берилди.  Мурожаатлардан 1 тасининг ижроси назоратга олинди. Шунингдек, 4 таси бўйича ҳуқуқий тушунтиришлар берилиб, уларни қонунда белгиланган тартибда ҳал қилишга қаратилган механизмлар тўғрисидаги таклифлар билдирдилар.

Ижтимоий қўллаб-қувватлаш, муаммоларини бартараф этишда яқиндан кўмак бериш мақсадида ўтказилган сайёр учрашувларда суд-ҳуқуқ тизими масъуллари томонидан мурожаатлари тингланиб, эътиборга олинганидан аёл-қизлар ва ёшлар ниҳоятда мамнун бўлдилар.

Озода Худойберганова.