САЙЁР ҚАБУЛ ЎТКАЗИЛДИ

19 январь куни Амударё тумани прокурори Жавлонбек Муфтуллаев, туман прокуратураси бошчилигида тузилган 2-сектор ишчи гуруҳ аъзолари ва тумандаги Халқ қабулхонаси, корхона ва ташкилотлар раҳбарлари иштирокида сайёр қабул ўтказди.

Сайёр қабулда туман прокурори, 2-сектор раҳбари Жавлонбек Муфтуллаев ҳудудида амалга оширилган ишлар тўғрисида аҳолига маълумотлар берди. У қарорлар ижросини таъминлаш мақсадида барча соҳалардаги муаммоларни аниқлаш ҳамда ҳал этиш бўйича аниқ мақсадларга қаратилган тадбирлар амалга оширилаётгани, туман ҳудудидаги ижтимоий соха объектлари, энг авало, соғлиқни сақлаш, таълим ва бошқа муассасаларнинг самарали фаолият кўрсатишини таъминлаш, тадбиркорлик субъектларига амалий ёрдам кўрсатиш, буларнинг натижасида янги иш ўринларини яратиш бўйича комплекс чора-тадбирлар амалга оширилаётганини гапириб ўтди. Фуқароларнинг ўзини ўзи бошқариш органлари ва фуқаролик жамиятининг бошқа институтлари билан ўзаро ҳамкорликда ҳуқуқбузарликларнинг олдини олиш, айниқса вояга етмаган ёшлар ўртасида профилактика чораларини амалга оширишда ишчи гуруҳ аъзоларининг ўрни жуда катта аҳамиятга эга эканлигини таъкидлаб ўтди.

Шунингдек, 2-сектор ишчи гуруҳ аъзолари ҳам сўзга чиқиб, фуқароларнинг фаровон яшаши учун яратилаётган имкониятлардан хусусида тўхталиб ўтдилар.

Шундан сўнг туман прокурори, 2-сектор раҳбари Жавлонбек Муфтуллаев сайёр қабулга келган маҳалла фуқаролари билан якка суҳбатлар ўтказиб, муаммоларини тинглади.

Фуқаролар фарзандларига гувоҳнома олиш, электр энергияси таъминотини яхшилаш, йўлларни таъмирлаш ва бошқа масалаларда амалий ёрдам беришни сўраб мурожаат қилдилар. Шунингдек аҳолидан иш билан таъминлаш, маҳалла ҳудудидаги  Шўрчи кўчаси аҳолисини ичимлик суви билан таъминлаш мақсадида водопровод тармоғини тортиш, ҳудуддаги ариқдан ўтиш учун кўприк қўриш, спорт майдончасини қуриш каби масалаларда ҳам мурожаатлар келиб тушди.

Шуниси эътиборлики, сайёр қабулда аҳоли томонидан билдирилган мурожаатларнинг айримлари жойида ҳал этилди, қолганларини ҳал этиш бўйича тегишли масъулларга топшириқлар берилди ва ижроси назоратга олинди.

Халқ билан мулоқот, унинг дарду ташвиши билан яшаш энг асосий мақсад бўлиб, ушбу мақсад рўёби юртимиз равнақига, унинг янада гуллаб-яшнашига, фуқароларнинг тинч, осуда, фаровон ҳаёт кечиришларини таъминлашга хизмат қилиши шубҳасиз.

О.РАЖАБОВА.