ВАТАННИ ҚЎРИҚЛАШ – ШАРАФЛИ БУРЧ ВА ВАЗИФА

Юртимиз сарҳадларини шараф билан ҳимоя қилиб келаётган Қуролли Кучларимиз ташкил қилинганига  бу йил 29 йил тўлади. Мамнуният билан айтиш мумкинки, бу қутлуғ сана мамлакатимизда ватанпарварлик, она юртга садоқат, мардлик ва жасурлик каби эзгу қадриятларни, халқимизга, буюк аждодларимизнинг муносиб ворисларига хос бўлган юксак фуқаролик фазилатларини ўзида мужассам этадиган том маънодаги умумхалқ байрамига айланди.

Таъкидлаш жоизки, Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёевнинг бевосита ташаббуси билан Қуролли Кучларимиз ислоҳ қилиниб, мудофаа салоҳияти янада оширилмоқда. Мамлакатимиз ҳарбий соҳасини замон талабларига мос ҳолга келтириш билан боғлиқ мутлақо янги, кўламдор ислоҳотлар жорий этилмоқда. Дарҳақиқат, бугун Миллий армиямиз Ватанимиз мустақиллиги, суверенитети, унинг ҳудудий яхлитлиги ва халқимиз тинч-осойишта ҳаётининг ишончли кафолати сифатида шаклланди. Ҳарбий хизмат эса том маънода эътибордаги ва мамлакат равнақи йўлидаги ўта масъулиятли касбга айланди.

Туман Мудофаа бўлими томонидан ҳам Ўзбекистон Республикасининг “Умумий ҳарбий мажбурият ва ҳарбий хизмат тўғрисида”ги Қонуни асосида туман ҳокимлиги билан ҳамкорликда чақирув ёшидаги фуқароларни ҳарбий хизматга чақирув, тайёрлов ва ёшлар онгида ватанпарварлик, юртга садоқат, бурч ва масъулият каби тушунчаларни сингдириб бориш мақсадидаги тадбирлар амалга оширилиб келинмоқда.

Ўтган 2020 йил давомидаги чақирув жараёнида муддатли ҳарбий хизматга 67 нафар чақирилувчи жўнатилди. Сафарбарлик чақируви резерви хизматига 610 нафар чақирилувчи тайинланди. Шу билан бир қаторда ҳарбийлик касбига қизиқиб, олий ҳарбий билим юртида ҳамда “Темурбеклар” мактабида таҳсил олиш мақсадида бўлган ёшларга ўз вақтида йўлланмалар берилди. Натижада олий ҳарбий билим юртига 4 нафар, “Темурбеклар” мактабига 12 нафар ёшлар ўқишга қабул қилинди.

Бўлимимиз томонидан пандемия даврида 2020 йил муддатли ҳарбий хизматдан резервга бўшатилган йигитлардан кўнгилли ёшлар гуруҳи тузилди ва назорат постларига ёрдамчи куч сифатида жўнатилиб, кўмак берилди. Шунингдек, ушбу гуруҳ карантин даврида жамоат жойларини дезинфекция қилиш ишларида ҳам фаол қатнашдилар. Пахта йиғим-терими мавсумида сафарбарлик чақирув резерви хизматига тайинланган ёшлардан тузилган кўнгилли ёшлар гуруҳи теримга ўз ҳиссаларини қўшдилар.

Ўтган йили 9 май – Хотира ва қадрлаш куни муносабати билан Иккинчи жаҳон уруши йилларида фронт орқасида меҳнат қилган 109 нафар фахрийлар хонадонига бориб хабар олинди.  Уларнинг ҳар бирига “1941-1945 йиллардаги Улуғ Ватан урушидаги Ғалабанинг 75 йиллиги” юбилей медали ва қимматбаҳо совғалар топширилди.

Айни кунларда “Ватанпарварлик ойлиги” доирасида таълим муассасалари ва жамоат жойларида ёшларни ватанпарварлик руҳида тарбиялаш мақсадидаги тадбирлар ўтказилмоқда. “Ким Ватанга содиқ бўлса, мендирман ўша!” шиори остида ўтаётган тадбирлар ёшлар қалбидаги юртга муҳаббат ва садоқат туйғуларини янада мустаҳкамлаб, кўтаринки руҳ бағишламоқда.

Эл-юртнинг ишончли посбони, ҳимоячиси бўлиш, халқ фаровонлиги, осойишталиги йўлида хизмат қилиш – ҳар бир инсоннинг шарафли бурчи. Ўзи улғайган заминни кўз қорачиғидек асраб-авайлаш инсон учун гўё ўз оиласини, шаънини, номусини, имон-эътиқодини ҳимоя қилиш кабидир. Жонажон мустақил юртимиз сарҳадларини сергаклик билан қўриқлаётган Ватан ҳимоячиларига, бутун юртдошларимизга байрам муборак бўлсин! Диёримиз осмони доимо мусаффо, тинчлигимиз барқарор бўлиб, мустақиллигимиз абадий яшасин!

Азизбек Жанузаков, туман Мудофаа бўлими бошлиғи.