Дилимда қасамёд

Ватан! У юракда уйғонган Қуёш,

Ҳарорати баланд, йўқдир ҳеч қиёс.

У тенгсиз жасорат, матонат, бардош,

Меҳр-муҳаббати дилларга туташ.

Киндик қони томган она тупроғим –

Она Юрт! Ўзингсан кўзим, қароғим!

Отам, деб эмрансам, бошимни силаб,

Болам, деб улғайтдинг, суйиб, эркалаб.

Чағир сўқмоқларда асраб-авайлаб,

Манзилимга элтдинг баъзан елкалаб.

Сенгадир меҳр-у ишқ, дилда ардоғим,

Она Юрт! Сен билан обод ҳар ёғим!

Сарҳадинг қўриқлаб турибман мағрур,

Дилимда қасамёд, дилимда ғурур.

Истиқлол шавқидан ҳар онда сурур,

Ҳар онда орият, имон юксалур.

Мозийдан то бугун ёниқ чироғим –

Ҳаловат қўйнида ҳар уй, чорбоғим.

Мафкура майдони минг турга дўнар,

Минг хил найранг билан зўр зўрни тунар.

Ким жоҳил, жаҳолат комига қулар.

Кўрдим, кўнгилларда ҳур фикр унар,

Ўзим бўлай Ватан, доно Широғинг,

Она Юрт! Ободон яқин-йироғинг!

Онамсан! Суянсанг, бир тоғ бўламан,

Пойингга тўкилган тупроқ бўламан.

Ғанимларинг учун бир чоҳ бўламан,

Тинчлигингга кафил, огоҳ бўламан –

Жалолиддин ҳамда Темур сиёғинг –

Она Юрт! Ўзимман меҳригиёҳинг!

Халқимга ЭРК йўли осон келган йўқ,

Неча марди-майдон унга етган йўқ.

Мустақиллик туғин бир бор ўпган йўқ,

Юракларда чандиқ ҳамон битган йўқ,

Фидойи жонларнинг йўқдир саноғи,

Она Юрт! Кечмишинг ҳаёт сабоғи.

Ватан! Тинчлигингга қилгум қасамёд,

Меҳр-у муҳаббатинг мен учун ҳаёт.

Сен борсан, миллат ва авлод барҳаёт,

Ҳар битта онингда бор тараққиёт.

Жонимда асрагум еринг – тупроғинг,

Юрагимга тикиб ўтгум Байроғинг!

Робия ЙЎЛДОШЕВА.