“САВОДХОНЛИК БАЙРАМИ” МАВЗУСИДА ОЧИҚ ДАРС БЎЛИБ ЎТДИ

Бошланғич таълимнинг инсон ҳаётидаги ўрни беқиёс. Мурғак болажонларнинг қўлларига ручка тутқазиб ёзишни ўргатиш, уларни илм дунёси сари етаклаш, осон жараён эмас. Айнан шу даврдаги берилган сифатли таълим-тарбия уларнинг қандай инсон бўлиб етишишида муҳим роль ўйнайди. Ўқитувчи дарслар жараёнида ўз билими, малака, кўникмаларини турли машғулотлар орқали етказади.

Юртимизда таълим-тарбия тизимида амалга оширилаётган ислоҳотлар ҳақиқий маънода ёш авлодни ҳам жисмонан, ҳам маънан баркамол инсонлар этиб тарбиялашга хизмат қилмоқда, ўқувчиларга бошланғич синфларда мустаҳкам илм пойдевори қўйилишига замин яратмоқда.

Қиличбой овулида фаолият юритаётган 69-сонли мактабнинг бошланғич синф ўқитувчиси Дилноза Бобожонованинг соҳада меҳнат фаолиятини бошлаганига 18 йил тўлди. Бу вақт орасида у тўрт марта ҳудуд жажжи ўғил-қизларини  1-синфга қабул қилиб олиб, сифатли бошланғич таълим берди ва юқори синфларга кузатиб қўйди.

У жорий янги ўқув йилида яна 1-синфларни ўқита бошлади. Ўтган тўрт ой мобайнида синфидаги 27 нафар жажжи болажонларга илк сабоқ бериб, Алифбени ўзлаштиришларига, санашни, ҳисоблашни ўргатишга эришди.

Яқинда шу муносабат билан ва декабрь бошланғич синфлар фан ойлиги доирасида Дилноза Бобожонова ўзи таълим бераётган синф ўқувчиларига “Алифбе байрами” мавзусида очиқ дарс ўтди.

Очиқ дарсда алифбедаги ҳарфларни мукаммал ўрганиб, чиникам ўқувчига айланган жажжи ўғил-қизлар чиройли кийиниб, бошларига ҳар бири ҳал хил ҳарфлар шаклини кийиб доска олдида саф тортиб турдилар.

Устоз уларга очиқ дарс мазмуни ва мақсадини тушунтирди. Шундан сўнг, ўқувчилардан алифбе китобини ўқиб тугатгани муносабати билан “Саводхонлик байрами” мавзусидаги очиқ дарсга қандай тайёргарлик кўрганини сўради. Ўқувчилар ҳар бири ўқув йили бошланганидан бери ўрганган ҳарфларини шеърий ифодалаб бердилар.

Даврага “Алифбе” китоби кириб келди ва ўқувчилар билимини синовдан ўтказувчи саволлар, топшириқлар берди. Зеҳни ўткир болажонларнинг жавобларидан қониқиш ҳосил қилган илк савод берувчи китоб саҳифаларидаги билимларни чуқур ўзлаштиргани учун болажонларга миннатдорчилик билдирди.

Ўқувчилар илм ўрганишнинг аҳамиятини улуғловчи, мактаб, бахтиёр болалик, она Ватан ҳақида шеърлар, мақоллар айтиб, саводхонлигини намойиш этишди. Бундан устози Дилноза Бобожонова чексиз хурсанд бўлди.

Шуниси эътиборлики, мамлакатимизда коронавирус пандемияси туфайли ўрнатилган тартиб-қоидага кўра улкан байрам шаклида, мактаб миқёсида, ота-оналар иштирокида ўтказиладиган “Саводхонлик байрами” тадбири жорий йилда мазкур синфда очиқ дарс шаклида, фақат синф ўқувчилари иштирокида ўтказилди.

Ўқувчилар пухта тайёргарликлар кўрганлиги туфайли очиқ дарс уларда унутилмас таассуротлар қолдирди.

О.РАЖАБОВА.