ҲУҚУҚНИ МУҲОФАЗА ҚИЛИШ ОРГАНЛАРИ ХОДИМЛАРИ ЎҚУВЧИ-ЁШЛАР БИЛАН УЧРАШДИ
Туманимиздаги 16-сонли умумтаълим мактабида 9 декабрь – Халқаро коррупцияга қарши курашиш куни муносабати билан ҳуқуқни муҳофаза қилиш идоралари раҳбар ходимлари ва ўқувчи-ёшлар билан бўлиб ўтган учрашувда ёшларга бу ҳақда батафсил тушунчалар ва маълумотлар берилди. Сана муносабати билан ўтказилган учрашув тадбирида туман прокурори Жавлонбек Муфтуллаев, Жиноят ишлари бўйича туман суди раиси Султонмурод Давлетмуродов, ИИБ бошлиғи ўринбосари Нурбек Камолов, халқ депутатлари туман Кенгаши депутати Ойбек Бегимовлар иштирок этишди.
Учрашув тадбирини халқ депутатлари туман Кенгаши депутати О.Бегимов очиб, учрашув иштирокчиларини кун тартибида кўрилаётган масала билан таништириб ўтди ва 9 декабрь – Халқаро коррупцияга қарши курашиш куни ҳақида қисқача маълумот берди.
Шундан сўнг, туман прокурори Жавлонбек Муфтуллаев 2003 йил 9 декабрь куни Мексикадаги Мерида шаҳрида Бирлашган Миллатлар Ташкилоти ташаббуси билан Коррупцияга қарши кураш бўйича халқаро конвенция имзоланганлиги, айни пайтга қадар ушбу конвенцияга 172 давлат қўшилгани, 2003 йил БМТ Бош Ассамблеясининг 53-сессиясида қабул қилинган резолюцияга мувофиқ, ушбу кун халқаро Коррупцияга қарши курашиш куни деб эълон қилинганлиги ва 2004 йилдан бери ушбу сана дунё миқёсида кенг нишонланиб келинаётгани ҳақида ўқувчи-ёшларга батафсил тушунчалар бериб ўтди.
Шунингдек, Жиноий ишлар бўйича туман суди раиси Султонмурод Давлетмуродов Халқаро Стандартлаштириш ташкилоти томонидан 2016 йилда Коррупцияга қарши бошқарув тизими жорий қилингани ҳақида айтиб ўтди. Шунингдек “Судъяларнинг чинакам мустақиллигини таъминлаш ҳамда суд тизимида коррупциянинг олдини олиш самарадорлигини ошириш чора-тадбирлари тўғрисида”ги Президент Фармонига кўра, мамлакатимизда ҳам коррупцияга қарши курашиш борасида самарали ишлар олиб борилаётганини таъкидлади.
Туман ИИБ бошлиғининг ўринбосари Нурбек Камолов жиноятчилик ва ҳуқуқбузарликларнинг салбий оқибатлари, уларнинг олдини олиш чоралари ҳақида сўз юритиб, бу борада туманимизда амалга оширилаётган ишларга тўхталди.
Ўз навбатида ўқувчи-ёшлар ўзларини қизиқтирган саволлар билан мурожаат қилдилар, таклифларини билдирдилар.
Ўқувчи-ёшлар томонидан берилган саволларга масъуллар батафсил жавоб бердилар. Шунингдек, ёшлар томонидан билдирилган таклифлар бўйича ҳам ўз фикрларини баён қилдилар.
Учрашув якунида мактаб ўқувчи-ёшларига китоблар совға қилинди. Мактаб директори Равшаной Ўрозбоева коррупцияга қарши курашиш – жамиятимизни янада ривожлантиришга хизмат қилишини таъкидлаб, бу борада ўқувчи-ёшларга кенг тушунчалар берганликлари учун учрашув меҳмонларига самимий миннатдорчилик билдирди.
Бўлиб ўтган учрашув мактаб ўқувчи-ёшларида катта таассуротлар қолдирди. Шу билан бирга, коррупцияга қарши курашишнинг аҳамияти ҳақидаги билимларини янада мустаҳкамлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
