ТЕЗЛИКНИ МЕЪЁРДАН ОШИРИШ – БИР ФУҚАРОНИНГ ТАН ЖАРОҲАТИ ОЛИШИГА САБАБ БЎЛДИ
Йўл тасодифларга тўла деймиз-у аслида ушбу тасодифлар сабабчиси одамларнинг ўзлари эканлигини ўйлаб ҳам кўрмаймиз. Остона хатлаб кўчага чиққан одам хоҳ уловда, хоҳ пиёда бўлсин, йўл ҳаракати қоидаларига амал қилса, ўзининг ҳам, ўзгаларнинг ҳам хавфсизлигини қайғурса, эҳтимол бу тасодифлар бироз камаярмиди?
Афсуски, ўзимизда ишлаб чиқарилган янги русумдаги автомашина эгаси бўлган Анвар Турсунов (исм, фамилия ўзгартирилди) бу ҳақда ўйлаб ҳам кўрмади, янги машинани юқори тезликда бошқариб бораётиб, бир бегуноҳ фуқарони автомашинасининг олд томони билан уриб юборди ва йўл-транспорт ҳодисасини содир қилди. Натижада ўша фуқаро тан жароҳати олиб, касалхонада даволанишга мажбур бўлди.
Бу ҳаракатлари билан Анвар Турсунов Ўзбекистон Республикаси Вазирлар Маҳкамасининг 2015 йил 24 декабрь кунги 370-сон қарори билан тасдиқланиб, 2016 йил 1 мартдан амалга киритилган «Йўл ҳаракати қоидалари»нинг 11-бандининг, 2-кичик банди, 77-банди ва ушбу банднинг 3-қисми талабларини қўпол равишда бузганликда айбланди. Ҳодиса жабрланувчиси оғир тан жароҳати олди. Ушбу ҳолат юзасидан тайинланган судга оид автотехника экспертизасининг 327-сонли хулосасига кўра, транспорт воситасини тормозлаш йўли билан йўл-транспорт ҳодисасининг олдини олиш техник имконияти бўлган ҳолда ҳайдовчи бунга эришмаган. Натижада у Ўзбекистон Республикаси Жиноят Кодексининг 266-моддаси 1-қисмида назарда тутилган жиноятни содир этганликда гумон қилинувчи тариқасида ишга жалб қилинди.
Яқинда Анвар Турсунов қаршисига қўзғатилган жиноят иши у яшайдиган маҳалла фуқаролар йиғини маъмурий биносида йиғин масъул ходимлари, аҳоли иштирокида Жиноят ишлари бўйича туман судининг суд мажлисида кенг муҳокама этилди.
Суд ҳайъати гумон қилинувчи ва жабрланувчининг, маҳалла фаолларининг сўзларини эшитиб, прокурорнинг фикрини тинглаб, иш материаллари билан чуқур танишиб чиқиб, томонлар тегишли тартибда ярашганлиги муносабати билан ишни ҳаракатдан тўхтатиш юзасидан қарор қабул қилди. Бу – Анвар Турсуновга бир умрлик сабоқ бўлди.
С.Давлетмуродов, Жиноят ишлари бўйича Амударё туман суди раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
