ИҚТИДОРЛИ ШОГИРД
Иқтидорсиз инсоннинг ўзи бўлмайди. Фақат кичик ёшдан оилада катталар, ота-она ва таълим муассасаларида устозлар яқиндан кўмак беришса, ҳар қандай боладаги истеъдод янада шаклланиб, ривожланади ва юзага чиқади.
Беҳруз Жумамуродов ҳам болаликдан санъатга, мусиқага ихлоси бошқачалигини намоён қила бошлади. Айниқса, овулдаги 29-сонли мактабга 1-синфга ўқишга борганидан сўнг, тадбирларда қўнғироқдай овози билан ашулалар ижро этиб, иқтидор эгаси эканлигини кўрсатди. Беҳруздаги истеъдодни аллақачон пайқаган ота-онаси мактабдаги устозлар тавсияси билан Қангли маданият марказида ташкил этилган рубоб тўгарагига олиб боришди.
Маданият марказида эстрада ва рубоб йўналишлари бўйича 30 нафардан зиёд болага санъат сирларини ўргатаётган тўгарак раҳбарлари Беҳрузни дастлаб қайси санъат турига кўпроқ қизиқишини аниқлаб олишди. Унинг ўзи ҳам мусиқа асбобини чалишга, ҳам қўшиқ айтишга қизиқишини айтиб, рубоб тўгарагини танлади ва устози Олимбой Ешимбетовдан санъат сирларини, маҳоратини ўргана бошлади.
- Беҳруз иқтидорли бўлиш билан бирга интилувчан, тиришқоқ, – дейди “Қангли” маданият марказининг рубоб тўгараги раҳбари О.Ешимбетов. – Эшитиш, қабул қилиш, ўзлаштириш даражаси жуда яхши. Қисқа фурсат ичида рубоб чалишни ўрганиб олди. Ўзи мусиқа чалиб, ўзи қўшиқ айтади. У энг иқтидорли шогирдим.
“Қангли” маданият марказига овул ҳудудидаги 5 та мактаб, 8 та аҳоли пунктидан санъатсевар ёшлар ташриф буюриб, иқтидорларини ривожлантиради. Марказ мудири, мураббийлар Д.Эндирбоев, О.Ешимбетовлар уларнинг истеъдодларини шакллантириш, юзага чиқариш мақсадида астойдил шуғулланишади. Мураббийлар уларнинг саҳнага чиқишларига, овулдаги байрам тадбирлари, туман марказида ўтказиладиган катта тадбирларда яхши куй ва қўшиқлари билан қатнашишларига имконият яратиб, қизиқишларини янада орттиради. Айниқса, марказдаги тўгаракларнинг ҳаваскор ёшлари томонидан тайёрланган байрам дастурлари, томошалари байрамларга файз бағишлаш билан бирга аҳолига кўтаринки кайфият, байрам руҳини бағишлайди.
Беҳруз ҳам мана шундай тадбирларда иштирок этиб, ўзини танитди. Тўгарак машғулотларида ўрганган 15 тача куй ва қўшиқлардан “Чаманда гул”, “Гуллар рақси”, “Ўрганамиз-ўргатамиз” каби қўшиқлари аллақачон ўз мухлисларини топди. Ўтган йиллар давомида “Истеъдод шоу” танловининг ҳудудий босқич ғолиби бўлди. Туман Маданият марказида ўтказилган чораклик ҳисобот концерт дастурларида ҳам фаоллик кўрсатди. “Мустақиллик фарзандларимиз” онлайн кўрик-танловида эса якка ижрочилик йўналиши бўйича ҳам фахрли 1-ўринни эгаллади. Шунингдек, мустақиллигимизнинг 29 йиллигига, Ўқитувчи ва мураббийлар кунига бағишлаб ўтказилган онлайн концерт дастурларида ўзининг севиб ижро этадиган қўшиқлари билан иштирок этиб, устозлари, ота-онаси ва мухлисларининг меҳрини, эътиборини қозонди.
Ёш истеъдод эгаси Беҳруз Жумамуродов санъат йўлига энди қадам қўйди. Соз сеҳри чулғаган кўнглида куй ва қўшиққа ҳавас бор. У келажакда санъат соҳасида давом этишни мақсад қилган. Ўзи интилишда давом этса, шу билан бирга устозлари, ота-онаси уни қўллаб-қувватласа, албатта, мақсадига етади ва Амударёдан етишиб чиққан истеъдодли санъаткорлар сафи яна кўпаяди.
О. Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
