ТАДБИРКОРЛИК ВА БАНДЛИК СОҲАСИДА ЯНГИ ҚАРОР ҚАБУЛ ҚИЛИНДИ

Тарихдан маълумки, ҳар бир шахс яхши яшашга, яхши таълим олишга ва яхши хаёт тарзини кечиришга интилиб яшайди. Аммо кўпчилик ишсизлик, камбағалчилик ва бошқа сабабларга кўра бунга эриша олмайди. Жаҳон тажрибаси шуни кўрсатадики, аҳолини камбағалликдан чиқариш ва иш билан таъминлашда уларни касбга ўқитиш ва шахснинг ўз тадбиркорлик фаолиятини амалга оширишга давлат томонидан кўмак берилиши энг тўғри йўлдир.
Аҳолини тадбиркорликка жалб қилиш тизимини такомиллаштириш, камбағалликни қисқартириш ва тадбиркорликни ривожлантириш мақсадида Ўзбекистон Республикаси Президентининг 2020 йил 13 октябрда ПҚ-4862-сонли “Аҳолини тадбиркорликка жалб қилиш тизимини такомиллаштириш ва тадбиркорликни ривожлантиришга доир қўшимча чора-тадбирлар тўғрисида”ги Қарори қабул қилинди.
Қарорга мувофиқ, 2020 йил 15 ноябрдан ёшлар ва хотин-қизларни касб-ҳунар ва тадбиркорлик кўникмаларига ўқитишни давлат томонидан қўллаб-қувватлаш мақсадида тадбиркорликни ривожлантириш агентлиги, бизнес ва тадбиркорлик олий мактаби томонидан маъқулланган дастурлар ҳамда белгиланган талаблар асосида ташкил этилган ўқув курсларини тамомлаган ҳар бир битирувчи учун касб-ҳунар ва тадбиркорликка ўқитиш бўйича нодавлат таълим ташкилотларига сарфланган харажатларнинг 70 фоизи, бироқ ҳар бир битирувчига 1 миллион сўмдан ортиқ бўлмаган миқдорда давлат томонидан компенсация қилинади. Эътиборлиси, ушбу курсларни муваффақиятли тамомлаб, сертификат олган шахсларга ўз бизнесини ташкил этиш учун микрокредитлар ажратилади.
Қарорда белгилаб ўтилганидек, “Микрокредитбанк” АТБ томонидан нодавлат таълим ташкилотлари махсус сертификатини олган тадбиркорлик ташаббусига эга жисмоний шахслар, шу жумладан, ёшлар ва хотин-қизларга ўз бизнесини ташкил этиш учун 33 миллион сўмгача микрокредитлар таъминотсиз ажратилади.
Шунингдек, микрофирма ва кичик корхона таъсис этган шахсларга учинчи шахс кафиллиги, суғурта полислари, кредит ҳисобига сотиб олинаётган мол-мулклар гарови, Тадбиркорлик фаолиятини қўллаб-қувватлаш давлат жамғармасининг кафиллиги асосида 225 миллион сўмгача микрокредитлар ажратилади.
Микрокредитлар 3 йил муддатгача 6 ойгача имтиёзли давр билан Марказий банкнинг асосий ставкасида ажратилади.
Қарорга кўра, Тадбиркорликни ривожлантириш агентлиги аҳолини тадбиркорлик фаолиятини қўллаб-қувватлаш, хусусан, уларни ўқитиш, микрокредит ажратиш бўйича ишларни мувофиқлаштириш борасида ваколатли давлат органи этиб белгиланди.
Бу каби имтиёзларнинг берилиши ёшлар, айниқса, хотин-қизларнинг иш билан банд бўлишига ва ўз тадбиркорлик фаолиятини бошлашига ва ривожлантиришга имкон яратади.

Ж.Бекимбетов, туман Адлия бўлими бош маслаҳатчиси.