ЖИСМОНИЙ ФАОЛЛИК ЎҚИТУВЧИГА КУЧ-ҚУВВАТ БАҒИШЛАЙДИ, ЎҚУВЧИ ЭСА РУҲАН СОҒЛОМ БЎЛАДИ

Юртимизда таълим-тарбия соҳасида амалга оширилаётган барча ислоҳотлар замирида ягона мақсад – ёш авлодни ҳар томонлама комил, жисмоний жиҳатдан етук ва соғлом қилиб тарбиялашда хизмат қилувчи маҳоратли ва малакали педагог кадрларни тайёрлашдан иборат.
Президентимиз Ш.Мирзиёев Ўзбекистонда умумий ўрта ва мактабдан ташқари таълим тизимини ислоҳ қилишнинг устувор йўналишларини, шу баробарида ўсиб келаётган ёш авлодни маънавий-ахлоқий, жисмоний жиҳатдан етук, соғлом қилиб тарбиялаш, уларни мустақил ҳаётга тайёрлаш педагогларнинг асосий вазифаси эканлигини белгилаб берди.
Бугунги кунда ҳар бир инсон ўзини соғлом, тетик, бақувват ҳис қилишга, ишчанлик қобилиятини сақлашга ҳаракат қилади. Бу борада бизнинг 41-сонли  умумтаълим мактабимизда сезиларли ютуқларга эришилмоқда. Албатта, инсоннинг, айниқса, педагог кадрларнинг соғлом бўлиши биринчи галда, спорт ва бадантарбия машғулотлари туфайлидир. Барчанинг ҳам юқори малакали спортчи ёки мусобақаларда қатнашиб, бирор-бир мукофотни олиши шарт эмас. Лекин ҳар бир ўқитувчи ўз имкониятларидан келиб чиққан ҳолда спорт ва бадантарбия машғулотлари билан шуғулланишни одат қилса, кун ўтган сайин хотираси яхшиланиб, фикри теранлашиб, жисмида куч йиғилаётганини ҳис этади.
Жисмоний тарбия ва спорт билан шуғулланиш, ўсиб келаётган авлоднинг баркамол бўлиб вояга етишида муҳим аҳамиятга эга. Шу билан бирга уларнинг бўш вақтларидан унумли  фойдаланишларига имкон яратади. Айниқса, болалик ва ўсмирлик давридан бошланган чиниқиш машғулотлари жуда фойдалидир.
Демак, ўз жисмини чиниқтириш, меҳнат унумдорлигини ошириш, соғлиқни мустаҳкамлаш асосида узоқ умр кўришни истаган ҳар бир киши доимо жисмоний тарбия билан шуғулланишлари зарур. Мунтазам равишда бадантарбия машқларини бажариш ўқитувчига жисмоний куч-қувват бағишлайди, ўқувчи эса руҳан тетиклашиб, дарсларни яхши ўзлаштиради. Агар буюк бобокалонимиз Абу Али Ибн Синонинг “Бадантарбия – соғлиқни  сақлашда улуғвор усулдир” деган ўгити ҳар бир инсоннинг ҳаётий шиорига айланса, киши ҳеч қачон касалликка чалинмайди.

Манас НУРЖОНОВ,
41-сонли мактабнинг жисмоний тарбия фани ўқитувчиси.